بۇگىن «Nur Otan» توراعاسى نۇرسۇلتان نازارباەۆ پارتيانىڭ كەڭەيتىلگەن جيىنىن وتكىزىپ جاتىر. جيىن بارىسىندا پارتيا باسشىلىعىنىڭ تىزگىنىن ەل پرەزيدەنتى قاسىم-جومارت توقاەۆقا تاپسىراتىنىن مالىمدەگەن.

«Tengrinews» اگەنتتىگىنە بەرگەن سۇحباتىندا ەكس-پرەزيدەنتتىڭ ءباسپاسوز حاتشىسى ايدوس ۇكىباي نازارباەۆتىڭ بۇگىنگى شەشىمى «بيلىك ءترانزيتىنىڭ زاڭدى جالعاسى»، دەپ پىكىر بىلدىرگەن.

«پارتيا جارعىسىنا سايكەس، ونىڭ توراعاسىن سايلاۋ جانە قىزمەتتەن بوساتۋ «Nur Otan» پارتياسى سەزىنىڭ ايرىقشا قۇزىرەتىنە جاتادى. وعان دەيىن نۇرسۇلتان نازارباەۆ پارتيا توراعاسى بولىپ قالا بەرەدى»، - دەپتى ايدوس ۇكىباي.

ال ساياساتشىلار پارتياداعى بۇگىنگى ورگەرىستەردەن كەيىن بيلىكتە ءبىراز اۋىس-تۇيىستەر بولاتىنىن بولجاپ وتىر. بۇگىن-ەرتەڭ پارتيا توراعاسى اۋىسقان سوڭ، ونىڭ ءبىرىنشى ورىنباسارى دا اۋىسۋى مۇمكىن ەكەنىن ايتادى. قازىر بيلىكتەگى دومينانت پارتيا سانالاتىن «Nur Otan-نىڭ» ءبىرىنشى ورىنباسارى 47 جاستاعى باۋىرجان بايبەك.

باۋىرجان قادىرعاليۇلى بايبەك ساياسي قىزمەت جولىن گەرمانياداعى قازاقستان ەلشىلىگىندە رەفرەنت، اتتاشە بولىپ باستاعان. ەكى جوعارى ءبىلىمى بار. ءبىرى – مۋزىكالىق پەداگوگ بولسا، ەكىنشىسى – ەكونوميست.

پرەزيدەنت اكىمشىلىگىندە ءارتۇرلى قىزمەتتەر اتقارعان. پرەزيدەنت پروتوكولىندا قىزمەت ەتكەن. 2013-2015 جىلدار ارالىعىندا «Nur Otan-نىڭ» ءبىرىنشى ورىنباسارى بولعان. 2015-2019 جىلدار ارالىعىندا الماتى قالاسىن باسقاردى. 2019 جىلدىڭ 29 ماۋسىمىندا پارتيا باسشىلىعىنا قايتا اۋىستى.

ساياساتكەرلەردىڭ پىكىرىنشە، باۋىرجان بايبەك جۋىق ارادا ۆيتسە-پرەمەر اتانىپ قالۋى دا عاجاپ ەمەس.

ال كوپتەن بەرى ەل-جۇرتتىڭ ءنوپىر سىنىنا ۇشىراپ جۇرگەن اسقار مامين ورنىن بوساتىپ، «بايتەرەك» حولدينگىن باسقارۋعا، ونىڭ ورنىنا سوڭعى كەزدەرى ەلىشىلىك باق-تا ءجيى اتالىپ جۇرگەن تۇركىستان وبلىسىنىڭ اكىمى ومىرزاق شوكەەۆ كەلۋى مۇمكىن-مىس.

اسقار مامين قازىر 56 جاستا. 2019 جىلدىڭ 25 اقپانىندا تاعايىندالدى. ارتىنشا پرەزيدەنت سايلاۋى ءوتىپ، بيلىك تىزگىنى قاسىم-جومارت كەمەلۇلى توقاەۆقا وتكەن ساتتە دە، ۇكىمەتتى مامين باسقارىپ قالا بەردى. مامين ۇكىمەتى ۇنەمى قيىندىقتار مەن كەلەڭسىزدىكتەرگە تاپ بولدى. وتىرىك ەسەپ پەن كوزالداۋشىلىق جاساۋعا ابدەن ماشىقتانعان مامين ۇكىمەتىنىڭ سانسىز ولقىلىقتارىنىڭ از بولىگىن الگىندە عانا ەگجەي-تەگجەيلى جازدىق.

ونىڭ ورنىنا ۇكىمەت باسقارۋى مۇمكىن دەگەن ومىرزاق شوكەەۆ تە وڭدىرىپ تۇرعان ۇمىتكەر ەمەس. كۇنى كەشە عانا ومىرزاق شوكەەۆتىڭ كوپ وتىرىگىن قر ەسەپ كوميتەتى اشكەرەلەپ، ونىڭ تۇركىستان وبلىسى اكىمى رەتىندەگى جۇمىسىنا «2» دەگەن باعا قويعان.

ومىرزاق شوكەەۆ 2019 جىلدىڭ اقپانىنان بەرى تۇركىستان وبلىسىنىڭ اكىمى بولىپ ءجۇر. جاسى 57-دە. الگىندە عانا ونىڭ وبلىس اكىمى قىزمەتىندەگى ايلىق جالاقىسى 1 ميلليون 900 مىڭ تەڭگەنى قۇرايتىنىن اكىمدىك رەسمي جاريالادى. بۇل اقپارات قوعامنىڭ نارازىلىعىن تۋدىردى.

ومكەڭ دە كوپ قىزمەتتەن وتكەن ادام. پرەزيدەنت اكىمشىلىگىندە، ۇكىمەتتە، وبلىس اكىمدىكتەرىندە ءتۇرلى قىزمەتتەر اتقارعان. 3 مارتە مينيستر، 5 مارتە پرەمەر-ءمينيستردىڭ ورىنباسارى بولعان. قوستاناي وبلىسى، بۇرىنعى وڭتۇستىك قازاقستان وبلىسى، استانا قالاسىندا اكىم بولعان.

قر ۇكىمەت باسشىلىعىنا تاعى ءبىر ۇمىتكەر – ءاليحان سمايىلوۆ. جاسى 48-دە. 2019 جىلدىڭ اقپانىنان بەرى قر ۇكىمەت باسشىسىنىڭ ءبىرىنشى ورىنباسارى بولىپ ءجۇر. پرەزيدەنت اكىمشىلىگىنەن وتكەن. ستاتيستيكا اگەنتتىگىن باسقارعان. سىرتقى ىستەر مينيسترلىگىندە، قارجى مينيسترلىگىندە ورىنباسار قىزمەتتەرىن ىستەگەن. مەملەكەتتىك حولدينگتەردە باسشلىق قىزمەتتەر جاساعان. پرەزيدەنت كومەكشىسى، قارجى ءمينيسترى قىزمەتتەرىن اتقارعان.

بيىل وسىعان دەيىن بيلىكتە بولعان اۋىس-تۇيىستەرگە كوز جۇگىرتسەك، ءبىرىنشى ورىنباسار لاۋازىمىنداعى ءاليحان سمايلوۆتىڭ ۇكىمەت تىزگىندەۋگە جولى اشىلىق-اق تۇر دەپ بولجاۋعا بولادى. ويتكەنى بۇعان دەيىنگى بولعان از-كەم اۋىس-تۇيىستەردە ۆيتسە-مينيستر بولعان ازاماتتار مينيستر اتانىپ جاتتى.

مىسالى، بيىل لاۋازىم اۋىستىرعان ءبىر مينيستر – ەربول قاراشوكەەۆ ەدى. ول 2021 جىلدىڭ 1 قىركۇيەگىنە دەيىن قر اۋىل شارۋاشىلىق ۆيتسە-مينيستر لاۋازىمىندا ءجۇرىپ، 1 قىركۇيەكتە مينيستر اتاندى.

قر دەنساۋلىق ساقتاۋ ءمينيسترى الەكسەي تسوي دا 2020 جىلى سول كەزدەگى دسم ۆيتسە-مينيسترلىگىنە تاعايىندالىپ، اينالاسى ءۇش كۇننىڭ ىشىندە مينيستر لاۋازىمىن يەمدەنگەن.

قر ەڭبەك جانە حالىقتى الەۋمەتتىك قولداۋ ءمينيسترى سەرىك شاپكەنوۆ تە 2020 جىلى ۆيتسە-مينيستر قىزمەتىنە تاعايىندالعان. ال 2021 جىلدىڭ 18 قاڭتارىندا اتالعان مينيسترلىك باسشىلىعىنا اۋىستى.

2019 جىلى قر مادەنيەت جانە سپورت مينيسترلىگىن باسقارۋعا كىرىسكەن اقتوتى رايىمقۇلوۆا دا، 2016-2019 جىلدار ارالىعىندا اتالعان مينيسترلىك ۆيتسە-ءمينيسترى بولىپ جۇرگەن.

سول سەكىلدى 2020 جىلى قر ەكولوگيا، گەولوگيا جانە تابيعي رەسۋرستار ۆيتسە-ءمينيسترى بولىپ جۇرگەن سەرىكقالي برەكەشەۆ ورىنباسارلىقتان مينيستر دارەجەسىنە اۋىسقان ادام.

سول ەسەپكە جۇگىنسەك، بۇگىن ۇكىمەت باسشىسىنىڭ ءبىرىنشى ورىنباسارى بولىپ وتىرعان ءاليحان سمايلوۆ تا ەرتەڭ ءماميننىڭ ورنىن باسۋى عاجاپ ەمەس.

ونان سوڭ، ساياساتشىلار ۇكىمەتپەن بىرگە ءبىرلى-جارىم اكىمدەردىڭ دە قىزمەت اۋىستىرۋى مۇمكىن ەكەنىن بولجايدى.

اكىمدەر ىشىنەن زەينەتكەر دانيال احمەتوۆ پەن اماندىق باتالوۆ ءبىرىنشى بولىپ كەتۋى مۇمكىن-مىس.

دانيال احمەتوۆ قازىر 67 جاستا. 2014 جىلدان بەرى شىعىس قازاقستان وبلىسىن باسقارىپ كەلەدى.

ال اماندىق باتالوۆ 68-دە. ول دا 2014 جىلدان بەرى الماتى وبلىسىن باسقارىپ كەلەدى.

بۇل ەكى اكىمگە دە كەزىندەگى پرەزيدەنت نۇرسۇلتان نازارباەۆ ارنايى قاۋلى شىعارىپ، زەينەت جاسىنا جەتسە دە، قىزمەتتەرىن جالعاستىرۋعا مۇمكىندىك جاساعان.

ساياساتكەر ەربول ەدىلوۆ، ءوزىنىڭ Telegram ارناسىندا اماندىق باتالوۆتىڭ ەرتەڭ قىزمەتتەن كەتەتىنىن، ونىڭ ورنىنا وبلىستى باسقارۋعا قانات بوزىمباەۆ پەن بەيبىت اتامقۇلوۆتىڭ بىرەۋى كەلەتىنىن ايتىپتى.

سونىمەن، ەرتەڭ اقوردا جاقتان جاڭالىق كۇتەتىنىمىز انىق. قالاي دەسەكتە، جاڭا وزگەرىستەر بولماسى انىق. وزگەرىس دەگەنىمىز باياعىدان كەلە جاتقان ەسكى كادرلاردىڭ كەزەكتى ورنىن اۋىستىرۋى.

Abai.kz