قازىرگى تاڭدا الماتى وبلىسىندا 47 379 پەداگوگ قىزمەت ىستەيدى. «پەداگوگ مارتەبەسى تۋرالى» زاڭ قابىلدانعاننان كەيىن بىلتىردان باستاپ مۇعالىمدەردىڭ ەڭبەكاقىسى 25 پايىزعا وسكەن، ءارى شىعارماشىلىقپەن اينالىسۋعا كوڭىل ءبولۋ ءۇشىن ۇستازداردىڭ اپتالىق جۇكتەمەسى 18 ساعاتتان 16 ساعاتقا قىسقارعان. مۇعالىمدەردىڭ ەڭبەك دەمالىسى بۇرىن 42 كۇن بولسا بۇگىندە 56 كۇنگە ۇزارتىلىپ، كاسىپتىك قىزمەتىنە كىرمەيتىن جۇمىستاردان بوساتىلدى.

ۇستازداردىڭ بىلىكتىلىگى مەن تاجىريبەسىنە وراي ۇستەماقى بەرۋ بەلگىلەنگەن. 2018 جىلدان باستاپ ەنگىزىلىگەن جاڭا فورماتتاعى اتتەستاتسيالاۋدان الماتى وبلىسىندا 19 703 مۇعالىم ءوتتى. ونىڭ ىشىندە 18 مەكتەپ ديرەكتورى مەن 147 مەكتەپ ديرەكتورىنىڭ ورىنباسارلارى دا اتتەستاتسيادان ءوتىپ، جالاقىلارىنا 30-دان 100 پايىزعا دەيىن ۇستەماقى تولەنىپ وتىر. جالپى ءبىلىم سالاسىندا  2209 پەداگوگ-ماگيستر جۇمىس ىستەيدى. پەداگوگتارعا ماگيستر دارەجەسى ءۇشىن 10 اەك مولشەرىندە قوسىمشا اقى تولەنەدى. ءبىلىم سالاسىنا ەرەكشە كوڭىل ءبولىنىپ  بيىلعى جىلى مەملەكەتتەن 347,5 ملرد تەڭگە ءبولىندى.

ءبىلىم سالاسىندا ءجۇرىپ جاتقان رەفورمالار مەكتەپ ۇستازدارىنىڭ ۇزدىكسىز دامىپ، بىلىكتىلىگىن ارتتىرۋعا ۇلكەن مۇمكىندىكتەر بەرىپ وتىر. الماتى وبلىسىندا مۇعالىمدەرگە ارنالعان 19 يننوۆاتسيالىق جوبا دايىندالعان. سونىڭ ىشىندە اۋىل مەكتەپتەرىن قالا مەكتەپتەرىنە سايكەستەندىرۋ ماقساتىندا «ءبىلىم ساپاسىن ارتتىرۋدا ءتيىمدى جۇمىس ىستەۋ رەجيمى»، پەداگوگيكالىق مەنەدجمەنتتى جەتىلدىرۋدە «تابىستى باسشى»، «تابىستى مەكتەپ اكسەلەراتورى» اتتى جوبالار ايرىقشا ماڭىزعا يە. سونىمەن قاتار، وبلىستا ءپان مۇعالىمدەرىنىڭ 27 ءتۇرلى اسسوتسياتسياسى قۇرىلىپ، تاجىريبەلى پەداگوگتاردىڭ كاسىبي قارىم-قاتىناس جاساپ، دامي تۇسۋىنە ۇلكەن ۇلەس قوسىپ وتىر.

بيىل سارقان اۋدانى №1 مەكتەپ-گيمنازياسىنىڭ مۇعالىمى ت.ستانكەۆيچ «قازاقستان مۇعالىمى – 2021» ۇلتتىق سىيلىعىنىڭ 10 ۇزدىك مۇعالىمنىڭ قاتارىنا ەنىپ، قازاقستان رەسپۋبليكاسىنان «الەم مۇعالىمى» حالىقارالىق سىيلىعىنىڭ ىرىكتەۋ كەزەڭىنە جولداما العان. سونىمەن بىرگە «Samruk-Kazyna Trust» «قازاقستان مۇعالىمى» جوباسىن ىسكە اسىرۋ شەڭبەرىندە 10 پەداگوگ 1 000 000 تەڭگەلىك شاعىن گرانت ۇتىپ الدى.

Abai.kz