قىرعىزستان پرەزيدەنتى سادىر جاپاروۆتىڭ جارلىعىمەن پارلامەنت دەپۋتاتتارىنىڭ جالاقىسى قىسقارتىلىپ، قىزمەتتىك اۆتوكولىكتەردەن ايرىلدى، دەپ حابارلايدى orda.kz سايتى. 

«رەسپۋبليكالىق بيۋدجەت شىعىستارىن وڭتايلاندىرۋ، مەملەكەتتىك ورگاندار مەن جەرگىلىكتى ءوزىن-ءوزى باسقارۋ ورگاندارىنىڭ بيۋدجەت قاراجاتىن پايدالانۋ تيىمدىلىگىن ارتتىرۋ جونىندەگى شارالار تۋرالى» جارلىعى بويىنشا جوگوركۋ كەنەش دەپۋتاتتارىن ۇستاۋعا جۇمسالاتىن شىعىنداردى ازايتۋ بويىنشا قاجەتتى شارالار قابىلداندى.

قر پرەزيدەنتىنىڭ سايتىندا حابارلانعانداي، جارلىق اياسىندا پارلامەنتشىلەردىڭ لاۋازىمدىق جالاقىلارى ازايتىلدى.

• جوگوركۋ كەنەشتىڭ لاۋازىمدىق جالاقىسى 30 مىڭ سوم مولشەرىندە بەلگىلەندى;
• جوگوركۋ كەنەش توراعاسىنىڭ ورىنباسارلارى – 27 مىڭ سوم:
• دەپۋتاتتىق فراكتسيالاردىڭ كوشباسشىلارى مەن كوميتەت توراعالارى – 26 مىڭ سوم:
• دەپۋتاتتار – 25 مىڭ سوم.

جارلىقتا بيۋدجەت سالاسىنداعى جاعدايدى جاقسارتۋ تەتىگى بار. بۇل رەتتە ءىس جۇزىندە ەشقانداي قاراجات جۇمسالمايدى.

«مەحانيزمدى «مەملەكەت ءوز قاراجاتى بويىنشا ءومىر سۇرۋگە ءتيىس» دەگەن جالپىعا ءمالىم قاعيدات ارقىلى سيپاتتاۋعا بولادى. باسقاشا ايتقاندا – مەملەكەتتىك اپپاراتتى ۇستاۋعا ارنالعان مەملەكەتتىك بيۋدجەتتىڭ شىعىستارىن ۇنەمدەۋ. مەحانيزم ءاردايىم كۇردەلى ەكونوميكالىق رەفورمالار كەزىندە ءارتۇرلى ەلدەردە ءساتتى قولدانىلدى. «قاراجاتپەن ءومىر ءسۇرۋ» ۇرانىمەن بالتىق، شىعىس جانە ورتالىق ەۋروپا ەلدەرىندە (ەستونيا، لاتۆيا، پولشا، چەحيا، ۆەنگريا) مەملەكەتتىك باسقارۋ رەفورمالارى ءساتتى جۇرگىزىلدى» دەلىنگەن پرەزيدەنت ءباسپاسوزىنىڭ حابارلاماسىندا.

سونداي-اق رەسپۋبليكالىق بيۋدجەتتەن شىعىستاردى رەتكە كەلتىرۋ ءۇشىن نەگىزگى شارالاردى ىسكە اسىرۋ كوزدەلەدى. مىسالى، بۇرىن جوگوركۋ كەنەش دەپۋتاتتارىنا تۇرعىن ۇيگە وتەماقى تولەنگەن. ەندى وتەماقىلار مەن قىزمەتتىك اۆتوكولىكتەر الىنىپ تاستالدى. ال قولدانىستاعى قىزمەتتىك پاتەرلەر تۇرعىن ءۇيى جوق پارلامەنت دەپۋتاتتارى اراسىندا بولىنەتىن بولادى.

Abai.kz