وبلىس دەگەن ءسوزدى ايماق دەپ اۋىستىراتىن مەزگىل الدەقاشان جەتتى. دەگەنمەن، بۇل ءىستى ءالى دە ىسكە اسىرا الماي كەلەمىز. مۇمكىن ويىمىز، تۇسىنىگىمىز نەمەسە ءبىلىمىمىز جەتپەيتىن شىعار. بيلىگىمىز قورقادى-اۋ، دەپ ويلايمىن. 

ايتايىن دەگەن ويىم، ەگەر ءبىز وبلىس ءسوزىن ايماق دەپ وزگەرتسەك قازاقستان ءبىر تابان ۇلتتىق رەنگە جاقىندار ەدى (ناتسيونالنىي كولوريت). ايتپەسە، قايسىبىر ۇلت وكىلدەرىنىڭ ايتپايتىن ءسوزى جوق. سولارعا ايتارلىقتاي توسقاۋىل بولار ەدى. سونىمەن قاتار، قازىرگى كەيبىر وبلىس اتاۋلارىندا ءمانى مەن ماعىناسىنا جانە جەر-سۋ اتاۋلارىنا قاراپ قايتا اتاعانىمىز جونگە كەلەتىن سەكىلدى.

مىسالى، بىلاي دەپ كورسەتسەك:

تۇركىستان وبلىسىن - تۇركىستان ايماعى،

الماتى وبلىسىن  - جەتىسۋ ايماعى،

قاراعاندى وبلىسىن - سارىارقا ايماعى،

شىعىس-قازاقستان وبلىسىن - التىن التاي ايماعى،

اقمولا وبلىسىن - كوكشەتاۋ ايماعى،

قىزىلوردا وبلىسىن سىرداريا وزەنى جارىپ وتەتىن بولعاندىقتان - سىرداريا ايماعى،

باتىس قازاقستان وبلىسىن - اق جايىق ايماعى،

اتىراۋ وبلىسىن - اتىراۋ ايماعى،

پاۆلودار وبلىسىن – ەرتىس ايماعى،

سولتۇستىك قازاقستان وبلىسىن - قىزىلجار ايماعى،

پاۆلوداردى  – ءوزىنىڭ تاريحي اتاۋىمەن تۇزكەنت قالاسى دەپ،

پەتروپاۆلوسك قالاسىن  – كونە اتاۋىمەن قىزىلجار دەپ اتاۋ كەرەك شىعار.

سونىمەن قاتار، كەيبىر اۋدانداردىڭ اتتارىن وزگەرتۋ ۋاقىت كۇتتىرمەيتىن ءىس.

ايتار بولساق :

تسەلينوگراد اۋدانىن – اقمولا اۋدانى (ورتالىعى اقمول ەلدىمەكەنى ەمەس پە),

ششۋچينسك قالاسىن – بۋراباي نەمەسە ابىلايحان قالاسى دەپ،

ۇيعىر اۋدانىن – قارادالا ايتپەسە شارىن اۋدانى دەپ وزگەرتۋ جونگە كەلەتىن سەكىلدى.

مىنە وسىلاي جالعاسا بەرەدى. وسىلاي ەتپەسەك، قايسىبىر وبلىس ورتالىعى بولىپ سانالاتىن قالالاردىڭ اتىن تۇتاس ايماققا كورپەشە سەكىلدى كەرىپ تاستاعانبىز. شىندىعىندا سول ايماقتاردىڭ حالىق اۋىزىنداعى جەر-سۋ اتاۋى كونەدەن كەلە جاتقان اتى بولعاندىقتان جاراسىمدى، ادەمى، تۋعان ەلىمىزگە سونشالىقتى جاقىن.

بۇل اتاۋلار ەل-جۇرتىمىز ءۇشىن باعا جەتپەس ماقتانىشقا اينالارى انىق. شىعىس قازاقستان وبلىسىنىڭ ورتالىعىن، الداعى ۋاقىتتا ەگەر مۇمكىندىك بولسا ەرتىس نەمەسە التاي دەپ وزگەرتسە، سلاۆيان جۇرتى دا ەشتەڭە دەمەس ەدى. نەگە دەسەڭىز، ەرتىس وزەنى رەسەيدى دە كەسىپ وتەدى. ەرتىس – تۇركى-قىپشاق ءسوزى بولعانىمەن ولار بۇل سوزگە ەرتەدەن داعدىلانعان. التاي سوزىنەدە سولاي. سوندىقتان، قوڭسى ەل وسى اتاۋعا ەشتەڭە دەي قويماس. بۇل ارينە، مەنىڭ ءوز پىكىرىم. قالاي دەسەكتە، ەل اۋىزىنداعى اتاۋلاردى جاڭعىرتۋدىڭ جانە قالپىنا كەلتىرۋدىڭ ۋاقىتى كەلدى دەۋگە بولادى.

مەملەكەتىمىزدىڭ ەكونوميكاسى مەن الەۋمەتتىك جاعدايىن كوتەرە جاتىرمىز. بۇل ەندى بيلىكتىڭ ىسكەرلىگىنە بايلانىستى. الايدا، وسىنى سىلتاۋ ەتىپ، جوعارىدا ايتىلعان اتاۋلاردى جانە پىكىرلەردى ەسكەرمەي، سولتۇستىكتەگى كورشىمىزدەن  ورىنسىز سەسكەنە بەرۋ، سونىمەن قاتار، ىشكى كەيبىر ۇساق ەتنوسقا جالتاقتاي بەرۋ جاراسپايدى.

بەيسەنعازى ۇلىقبەك،

قازاقستان جۋرناليستەر وداعىنىڭ مۇشەسى

Abai.kz