الماتى قالاسىنىڭ اكىمى

احمەتجان ەسىموۆ مىرزاعا

مادەنيەت جانە اقپارات ءمينيسترى

دارحان مىڭباي مىرزاعا  جانە

قر پارلامەنت ءماجىلىسىنىڭ دەپۋتاتتارىنا،

«الماتى» تەلەارناسىنىڭ

جۇمىستان كەتكەن جۋرناليستەرىنەن

اشىق حات

الماتى قالاسىنىڭ اكىمى

احمەتجان ەسىموۆ مىرزاعا

مادەنيەت جانە اقپارات ءمينيسترى

دارحان مىڭباي مىرزاعا  جانە

قر پارلامەنت ءماجىلىسىنىڭ دەپۋتاتتارىنا،

«الماتى» تەلەارناسىنىڭ

جۇمىستان كەتكەن جۋرناليستەرىنەن

اشىق حات

1-ءنشى قازاننان باستاپ «الماتى» ارناسىنىڭ قازاق ءبولىمى تۇتاستاي،  جاڭالىقتاردىڭ ورىس رەداكتسياسىنىڭ ءبىر بولىگى قىزمەتتەن كەتتىك.   نەگىزگى سەبەپ الماتى اكىمدىگى ءباسپاسوز قىزمەتىنىڭ باسشىسى س.ل. كۋيانوۆپەن ءتىل تابىسپاۋىمىز.  ناقتىراق ايتقاندا، كۋيانوۆتىڭ تۇتاس ءجۋرناليستىڭ  قوجاسىنا اينالىپ العانىنا نارازىلىق بىلدىردىك. بۇل وقيعانىڭ بارىسى اقپارات قۇرالدارى ارقىلى تۇتاس قازاقستانعا تاراپ جاتىر. سوندىقتان بۇگە-شىگەسىنە دەيىن جازا بەرۋدىڭ رەتى جوق.  ءبىزدىڭ حات جازۋداعى باستى سەبەبىمىز وسى وقيعادان تۇيگەن ويىمىزدى پاش ەتۋ. ءبىر ارنانىڭ  جۋرناليستىك توبىنىڭ  60-70 پايىزى جۇمىستان كەتىپ جاتىر ەكەن دەپ ەلەڭ ەتكەن باسشىنى بايقامادىق.  كۋيانوۆ پەن باس ديرەكتور ە. گريۋنبەرگ اۋەلى ورىس رەداكتسياسىندا جىك شىققانىن، قازاق ءبولىمى سولاردى قولداعانىن جاسىرىپ قويىپ،  جاعدايدى ۇلتتىق باعىتقا بۇرۋعا بارىن سالۋدا.  گريۋنبەرگ Tengrinews  سايتىنا  «س. سارىباەۆ (قازاق بولىمىنە جاۋاپتى ورىنباسار) كەتىپ جاتىر سونىمەن بىرگە قىزمەتكەرلەرى دە جۇمىستان شىعۋعا شەشىم قابىلدادى» دەيدى دە ماسەلەنى ەكى جارىم اپتا بۇرىن ءوتىنىشىن بەرىپ قويعان ورىنباسارىنا تىرەيدى،  ورىس بولىمىنە جاۋاپتى ورىنباسارى قايرات بالتابايدىڭ دا سول كەزدە  جۇمىستان كەتۋگە نيەت ەتكەنىن بۇركەمەلەپ قالادى.  كۋيانوۆ بولسا  ۇلت.كز سايتىنا «بۇل ادەيى ۇيىمداستىرىلعان شارا دەپ ويلايمىن، ورىس رەداكتسياسىنان ارىز جازعان ەشكىمدى كورىپ وتىرعان جوقپىن»  دەپتى.  ( بالتابايدان بولەك  ورىس رەداكتسياسى جۋرناليستەرى  يلزات اكچۋرين قىزمەتىنەن كەتىپ ۇلگەردى،    ايەركە ەرمەك ارىز بەردى )   ۇجىمنىڭ وزىمەن كەزدەسۋگە تالپىنعانى، ماملەگە كەلۋدىڭ جولىن ىزدەگەنى، ولاردى ەلەمەي جاعدايدى ۋشىقتىرعانى جونىندە ءبىر اۋىز ءسوز جوق.   قازىردە ويىن اشىق ايتۋعا تالپىنعاندارعا ۇلتشىل، وپپوزيتسيونەر دەگەن سىندى ايدار تاعىپ، ءوزىن  قازاقستاننىڭ تۇتاستىعى ءۇشىن كۇرەسكەر  ەسەبىندە كورسەتىپ، «ەكى جەپ بيگە شىعۋ»    سانگە اينالعان. ۇلتشىل دەسە، وزدەرى ءبىلسىن. ۇلتىن سۇيمەگەن، ۇلتى ءۇشىن قىزمەت ەتپەگەن ادامدى قۇر سۇلدەر دەپ ەسەپتەگەن ءجون. ال وپپوزيتسيا دەسە، بۇل ۇعىمنىڭ انىقتاماسىن وقىسىن. وپپوزيتسيا - مەملەكەتتىك بيلىككە بالاما ساياسات ۇستانۋشى. ەگەر مەملەكەت دەگەن ۇعىم كۋيانوۆ دەگەن فاميليانىڭ ءسينونيمى بولسا، جەتكەن جەرىمىز وسى ەكەن! سوندا كەلىسىم-شارتتى بۇزۋ تۋرالى بۇيرىقپەن تانىسىپ، قولىن  قويىپ ۇلگەرگەن 37 ادام  37-جىلدان قالىپ قويعان «حالىق جاۋلارى» ما؟ كۋيانوۆ پەن گريۋنبەرگتىڭ  ويى وسىدان الىستاماپتى.  الدە ءبارىن ءوز ۇستانىمدارىنىڭ  تار شەڭبەرىندە توپشىلاي سالدى ما!؟ دەسە دە ولاردىڭ پيعىلى ناتيجەسىن بەردى.  «شۋلاپ جاتقان كىل قازاق» دەگەن حابار تاراسىمەن ورىس ءتىلدى اقپارات قۇرالدارىنىڭ  وقيعاعا دەگەن قىزىعۋشىلىعى كۇرت تومەندەدى.  «وزدەرىنە دە وبال جوق» دەۋشىلەر كوبەيدى.   بۇل جاعداي لەزدە تەك قازاق ءتىلدى باق اياسىنداعى تاقىرىپقا اينالدى.  بۇنداي ساياسي «ەپتىلىككە» قايران قالماسقا امالىمىز جوق. تەك 31-ارنا، 7-ارنا  وسى جاعداي تۋرالى ەكى تىلدە اقپارات بەرگەن. اباي.كز ، ۇلت كز  سايتتارى جانايقايىمىزدى جاريالاۋدا.

ەندى  تۇپكى ويعا كەلسەك... ءبىز بۇل حاتتى ايانىش سەزىمىن تۋدىرۋ ءۇشىن، بىرەۋ باسىمىزدان سيپاسىن دەگەن ماقساتپەن جازىپ وتىرعان جوقپىز. دەنىمىز ساۋ، قول-اياعىمىز ءبۇتىن،  تۇمسىعىن جىلىتار قولتىق تاپقانىنا  ءىسىنىپ،  قۇدايعا اينالعان ەكەنمىن دەپ ويلايتىن   كۋيانوۆتارعا كىرىپتار  بولماي-اق  قاي سالادا بولسا قىزمەت ەتە بەرەمىز.  جاپقان ەسىكتى قايتا اشساق دەگەن نيەت جوق. ورنىمىز ويسىراپ قالمايدى. تۇرمىستىق جاعدايى قىسقان نەمەسە  كۋيانوۆپەن ءتىل تابىسا الاتىن ماماندار تابىلاتىنىنا، تابىلىپ جاتقانىنا دا ءشۇبا جوق.  تەك قازىرگى جۋرناليستەردىڭ، جۋرناليستيكانىڭ قانداي  كۇيگە تۇسكەنىن  بىلسەڭىزدەر بولعانى.  وسى وقيعانى مىسال ەتىپ   سوز بوستاندىعىنا سالىنعان اۋىزدىقتىڭ  ءسال بوساۋىنا ىقپال ەتسەڭىزدەر. قولدارىڭىزدان كەلسە «پوشتابايلاردىڭ» قيقۋىن ازايتىپ، «قامشى ءۇيىرۋىن» شەكتەڭىزدەر...  ناتيجە بولارىنا ءشۇبامىز كوپ ەكەنىنە قاراماستان جۇگىنگەندى، ءمان-جايدى تۇسىندىرگەندى  جون سانادىق.  ال ءبىز... جاقسىلار ساناتىندا جۇرگەن   بىرەۋلەرگە  ۇقساپ ارتىنىپ-تارتىنىپ، شەتەلگە تايىپ تۇراتىنداي دۇنيەمىز دە،  پيعىلىمىز دا، بوتەن اتامەكەنىمىز دە جوق.   ەلىمىز امان  بولسىن...   وسى ەلدە تۋدىق، وسى ەلدە، وسى ەل ءۇشىن  ءومىر سۇرەمىز....

«Abai.kz»