كۇنى كەشە رەسەي دۋماسىنىڭ دەپۋتاتى گەننادي زيۋگانوۆ دەگەن كارى سۇيەك كوممۋنيست قازاق جەرىنەكوز الارتىپ، «سولتۇستىك قازاقستان تۇتاستاي ورىستىكى», - دەپ سويلەگەن ەدى.

ول دۋما عيماراتىندا تۇرىپ: «سولتۇستىك قازاقستان تۇتاستاي العاندا ورىستىكى، ال وڭتۇستىك قازاقستاندا ورىس ءتىلى مەكتەپتەردە وقىتىلماۋدا. سوندىقتان مەن بۇگىنگى تاڭدا پرەزيدەنت، ۇكىمەت جانە مەملەكەتتىك دۋما بۇل ماسەلەنى شەشۋ بويىنشا ناقتى شەشىمدەر شىعارۋى ءتيىس دەپ سانايمىن. ەڭ الدىمەن ورىستىلدىلەردى بۇل ەلدە بولىپ جاتقان ناتسيوناليزمنەن قورعاۋ كەرەك. ءبىزدىڭ بايقوڭىر نىسانىمىز، قارۋعا ارنالعان ۋران شىعارۋ زاۋىتىن، پوليگوندى دا قورعاۋعا الۋعا ءتيىسپىز. ءبىز رۋحاني، مادەني، تىلدىك تۇرعىدان تولىق قورعالۋعا ءتيىس شارالار قابىلداۋعا مىندەتتىمىز»، - دەپ كوكىگەن ەدى.

زيۋگانوۆتىڭ بۇل سوزدەرىنە قر پارلامەنتى ءماجىلىسىنىڭ دەپۋتاتى، پارلامەنتتەگى حالىقارالىق ىستەر كوميتەتىنىڭ توراعاسى ايگۇل قۇسپان جاۋاپ قايتارىپتى. ءماجىلىس دەپۋتاتى گەننادي زيۋگانوۆ دەگەن دۋماداعى كومپارتيا جەتەكشىسى سوقتىعارعا سەبەپ تاپپاي ءجۇر دەپ سانايدى.

«تىرناق استىنان كىر ىزدەپ، قيسىنعا كەلمەيتىن، ويدان قۇراعان دۇنيەنى داۋعا ۇلاستىرماقشى. «سولتۇستىك قازاقستان تۇتاستاي العاندا ورىستىكى، ال وڭتۇستىك قازاقستاندا ورىس ءتىلى مەكتەپتەردە وقىتىلماۋدا» دەگەنىن باسقاشا ءتۇسىندىرۋ مۇمكىن ەمەس. رەسەي بيلىگىن شۇعىل شارا قابىلداۋعا شاقىرۋى دا اشىقتان-اشىق ارانداتۋ. ايتىلعان ءسوز – اتىلعان جوق.

شوۆينيستىك ۇندەۋ جاساعان زيۋگانوۆ قازاقستان مەن رەسەيدىڭ سەنىمدى سەرىكتەس، ودان قالدى وداقتاس ەكەنىن ۇمىتىپ كەتسە كەرەك. كوممۋنيستىك پارتيانىڭ كوسەمى ءوزىن الىس-جاقىن شەتەلدەگى ورىستاردىڭ جاناشىرى، ۇلت پاتريوتى رەتىندە دارىپتەگىسى كەلگەندەي. مۇنداي مالىمدەمە ارقىلى زيۋگانوۆ سەكىلدى ساياساتكەرلەر رەسەيدىڭ سۇيكىمىن كەتىرۋدە. ەل مەن ەلدى ارازداستىرۋدا»، - دەيدى دەپۋتات قۇسپان.

ول سونداي-اق، قازىرگىدەي قۇبىلمالى ۋاقىتتا رەسەي ساياساتكەرلەرى ەڭ الدىمەن ءتىلىن تىيۋى قاجەت ەكەنىن ايتقان. «اسىرەسە، كورشىلەرىنە كەلگەندە اۋىزدان شىققان ءار سوزگە اباي بولعان ءجون»، – دەيدى دەپۋتات.

Abai.kz