قر ۇلتتىق قاۋىپسىزدىك كوميتەتىنى،

قر ىشكى ىستەر مينيسترلىگىنىڭ نازارىنا!

رەسەيدىڭ وكتەمشىل دە وزبىر ساياساتىن جۇزەگە اسىرۋ ماقساتىمەن، بەيبىت قانا ءومىر ءسۇرىپ جاتقان ۋكراينا حالقىنا قارسى سوعىس اشىپ، ۇزدىكسىز بومبالاپ جاتقانىن بۇكىل الەم كورىپ وتىر.

ازاتتىق سۇيگىش ۋكرايندار قازىر باسقىنشىلارعا قارسى جان بەرىپ، جان الىسقان كۇرەسىن جالعاستىرىپ جاتىر. بىلاي قاراعاندا ۋكراينا ەلى بىزگە قاشىقتاۋ سەكىلدى كورىنگەنىمەن، ونىڭ باسىنا تۋعان كۇن ەرتەڭ بىزگە دە ءتيۋى ابدەن ىقتيمال. ويتكەنى ءبىزدىڭ ارامىزدا دا ۇنەمى سول رەسەيگە قاراپ بۇيرەگى بۇراتىنداردىڭ وزىڭە قاراپ كۇلە سويلەگەنىمەن، وزدەرىنىڭ ارامزا نيەتى وسىنداي الماعايىپ زاماندا شىعا كەلەتىندىگى الميساقتان بەلگىلى.

وسىندايلاردىڭ ءبىرى وتكەندە قوستانايدان شىعىپ، ەلدى ءبىر دۇرلىكتىرىپ ەدى. تاتيانا ميحايلوۆا دەگەن ءوزىن مۇعالىممىن دەپ تانىستىرىپ، بۇل ولكە قاشاننان ورىستىكى بولعانىمەن قازىر قازاقتاردىڭ قاپتاپ كەتكەندىگىن، ورىس مەكتەپتەرىنىڭ جابىلىپ جاتقاندىعىن ايتىپ، رەسەيگە قاراپ ۇلىعانى بار.

ەندى مىنە، وسكەمەندە ونىڭ ءبىر نيەتتەسى شىعىپتى. الەۋمەتتىك جەلىدە كەڭ تاراعان بۇل پوستىدا ورىستىڭ جاپ-جاس قىزى ءبىزدىڭ ەلدە ءناتسيزمنىڭ ەتەك الىپ بارا جاتقاندىعىن ايتىپ، كوز جاسىن توگىپ، اناۋ-مىناۋ ەمەس، وزدەرىنىڭ قامقورشىسى سانايتىن پۋتيننەن كومەك سۇرايدى. ياعني، جاۋ ىزدەپ، تيىسەرگە قارا تاپپاي جۇرگەن قالىڭ ورىس اسكەرىن وسىندا كىرگىزىپ، «ورىستىلدىلەردى قورعاۋعا كەلدىك» دەگەن سىلتاۋمەن ءبىزدى دە بومبانىڭ استىنا العاندى قالايدى.

جالپى، رەسەي تەلەارناسىنداعى سولوۆەۆ پەن سيمونيان سەكىلدى پروپوگانديستەردىڭ وتىرىگىنە ابدەن ميى ۋنالعان، سونىسىمەن مۇلدەم زومبيلانعان مۇنداي مىسكىندەر اياق استىنان پايدا بولا قويعان جوق. ولار ولگەلى جاتقان جيرينوۆسكي سەكىلدىلەردىڭ «قازاقستاننىڭ سولتۇستىگى ەجەلدەن ورىستىڭ جەرى» دەگەن ناسيحاتىنا قۇلاي سەنىپ، وزدەرىنڭ ومىرلىك ۇستانىمىنا اينالدىرعان. ونىڭ ۇستىنە، كۇنى كەشە عانا رەسەيدەگى كوممۋنيستەردىڭ كوسەمى زيۋگانوۆ تا الەۋمەتتىك جەلىدە وسى ءسوزدى قايتالاعان پوستىسى تاعى دا شىعىپ، وتقا ماي قۇيا تۇسۋدە. ال بىزدەگى كوممۋنيستەر شە؟ ولار نەگە ۇندەمەيدى؟ الدە، بىزدەگى كوممۋنيستەردىڭ ويى دا سولارمەن بىرگە شىعىپ جاتىر ما؟ بۇل وينارالىق جايت.

جالپى، رەسەيدىڭ باسقىنشىلىق سوعىسىنان كەيىن ءپۋتيننىڭ بۇل ارانداتۋشىلىعىن اشىق قولدايتىندار كوبەيىپ كەتتى. مۇنى ەڭ الدىمەن ءوزىمىزدىڭ «دانىشپان ستراتەگ»، «عۇلاما ساياساتكەر»، كەزىندە پرەزيدەنت جانىنداعى ستراتەگيالىق زەرتتەۋ ينستۋتىن باسقارعان بولات سۇلتانوۆ دەگەن ەلىمىزدىڭ بەلگىلى پورتالىنىڭ بىرىنە قۇلاشتاي ماقالا جازىپ، ونىڭ ۇستانعان ۇلى دەرجاۆالىق ساياساتىنا تۇسىنىستىكپەن قارايتىندىعىن اشىق ايتتى.

سوسىن «ەرگەجەيلى سۇلتانوۆتار» دۇرە كوتەرىلدى. الەۋمەتتىك جەلىدەگى ورىس ۇلتىنىڭ جاپ-جاس وركەندەرىنىڭ اۋزىنا كەلگەنىن ايتىپ، قازاق حالقىنا اشىقتان-اشىق جالا جاۋىپ، پۋتيننەن اسكەري كومەك سۇراپ، ەلىمىزدى قانعا بوكتىرۋدى كوكسەيتىندەردىڭ كوبەيىپ كەتكەندىگىنە تاڭ قالۋدىڭ رەتى جوق. الدىمەن استانا مەن شىمكەنتتە، سوسىن ورالدا ماشينالارىنا رەسەيدىڭ ۋكرايناعا قارسى باسقىنشىلىق سوعىسىنا قولداۋ كورسەتۋ نيەتىمەن، ولاردىڭ تەحنيكاسىنداعى «Z» بەلگىسىن سالىپ الىپ، كوشەمىزدە ويقاستاپ جۇرەدى. سوسىن الەۋمەتتىك جەلىگە شىعىپ الىپ، قازاقستانعا قارسى سوعىس اشۋعا ۇندەيدى. كەلەسى كەزەكتە تاعى نەنى ويلاپ شىعارادى؟ قوينىنداعى كەزەكتى تاسى قانداي؟ بۇعان مىنا ەلىمىزدەگى جۇرتتىڭ ءبارىن الدەقاشان ىعىر قىلعان قازاقستان حالقى اسسامبلەياسى دەگەن ۇيىم نە دەيدى؟ الدە سول باياعى قالىپتاسقان ادەتىمەن، اۋزىن بۋعان وگىزدەي ۇندەمەي قالا ما؟

جايبەرگەن بولاتوۆ

Abai.kz