جاڭا پارتيالار قۇرىلا ما؟..
پرەزيدەنت توقاەۆ 16 ناۋرىزدا حالىققا ساياسي رەفورمالارىن تانىستىردى. رەفورمادا ەندىگى تاڭدا پارتيا قۇرۋدىڭ وڭاي بولاتىنى ايتىلدى. ناقتىلاپ ايتقاندا ەندى پارتيا قۇرۋ ءۇشىن 20 مىڭ قول ەمەس، 5 مىڭ قول جەتكىلىكتى. بۇل وزگەرىس ساياسي ساحناعا كوپتەگەن جاڭا پارتيالاردىڭ شىعۋىنا ىقپال ەتۋى مۇمكىن. قوعامدا پارتيا قۇرعىسى كەلەتىن جاندار جەتەرلىك.
2020 جىلى كاسىپكەر احمەتبەك نۇرسيلا «سەن» اتتى پارتيا قۇراتىنىن جاريالاعان بولاتىن. ول بۇل تۋرالى ءوزىنىڭ فەيسبۋك پاراقشاسىندا جازعان.
«مەن ساياساتكەر ەمەسپىن. بىراق, ءوزىمدى وقىعانىم، توقىعانىم، ومىردەن، ەكونوميكادان تاجىريبەسى بار اداممىن دەپ سانايمىن. وقىعانىم، بىلگەنىمدى حالىقتىڭ يگىلىگىنە جاراتۋ ءۇشىن دەپۋتاتتىققا بارسام دەگەن ويىم بار. مەن پارتيا قۇرسام مەنى قانشا ادام قولدايدى دەپ ويلايسىزدار؟ ءسىز قولدايسىز با؟ ەگەر دە شىنىمەن حالىق قولداسا، وندا مەن بەل شەشىپ كىرىسەمىن», – دەپ جازعان بولاتىن.
ارتىنشا بىرنەشە سۇحباتتا پارتيانى قولداۋعا دايىن 100 مىڭ ادام بارىن دا ايتتى. دەگەنمەن كەيىن بۇل تاقىرىپ جايلى قوزعامادى.
ازاماتحان ءامىرتاي دا پارتيا قۇرۋدى ماقسات تۇتىپ جۇرگەن جانداردىڭ ءبىرى. ول ەكولوگيا باعىتىنداعى پارتيا قۇرىلۋ كەرەك دەپ سانايدى. جاقىندا ول «بايتاق» حالىقتىق ەكولوگيالىق پارتياسىن قۇرۋعا تالپىنىپ، ادىلەت مينيسترلىگىنە قۇجاتتارى وتكىزىلگەنىن مالىمدەدى.
«باستاماشىل توپ بولىپ بارلىق قۇجاتتى جاقسىلاپ قاراپ، تاپسىردىق. ەلىمىزگە ەكولوگيا باعىتىنداعى پارتيا كەرەك», – دەدى ول.
پارتياسىن تىركەتە الماي جۇرگەندەردىڭ ءبىرى – توعجان قوجالى. ول «حاق» اتتى پارتيا قۇرۋدى ماقسات ەتۋدە.
«ءبىز «حاق» پارتياسىن قۇرعالى جاتىرمىز. قازىر سوعان دايىندىق جۇمىستارى ءجۇرىپ جاتىر. بىراق، ءبىز ونى ءالى پارتيا دەپ جاريالامايمىز. بىزدەگى ساياساتكەرلەردىڭ كوبى قاتەلىك جىبەرەدى. پارتيا قۇرامىز دەپ جۇرتتى جيناپ، پرەسس-كونفەرەنتسيا وتكىزەدى. بىراق، قۇرامىز دەگەن سوزدەن باسقا ەشتەڭە جوق. نە باعدارلاماسى جوق، نە جارعىسى جوق، نە الدىنا قوياتىن ماقساتتارى مەن جوسپارلارى جوق. سول قاتەلىكتى قايتالاماس ءۇشىن ءبىز قازىر پارتيانىڭ باعدارلاماسى مەن جارعىسىن جاساپ جاتىرمىز. ءبىز پارتيامىز حالىققا تانىمال بولۋ ءۇشىن الدىمەن ىسپەن دالەلدەمەكشىمىز. پارتيانىڭ ءىسى ەل اۋزىنا ىلىگە باستاعاندا پارتيا قۇرۋعا بولادى.
ءبىزدىڭ پارتيانىڭ ارتىندا تەك قانا ءوزىمىز تۇرمىز. ءبىز الاياق، وزىندىك كوزقاراسى جوق ادامدار ەمەسپىز. ماعان كوپ ايتادى، مەنىڭ ارتىمدا قايىناعام بەكبولات تىلەۋحانوۆ تۇر،- دەپ. ويتكەنى كەلىندەرىمىن عوي. ساتىپالدى تۋرالى ءبىرىنشى رەت ەستىپ وتىرمىن. داريعا دا تۇر دەپ تە ەستيمىن. حالىق ساياساتكەر ايەلگە ۇيرەنە بەرسىن دەپ توعجانعا پارتيا اشىپ بەرىپتى-مىس. مەن تيمۋر قۇلىباەۆتا سەگىز جىل جۇمىس ىستەدىم. سوندىقتان، قۇلىباەۆتىڭ دا پارتياسى دەپ ايتادى. دارحان كالەتاەۆپەن تۇسكەن سۋرەتتەرىمە قاراپ، توقاەۆتىڭ نەمەسە اپ-نىڭ پروەكتىسى دەپ تە ايتادى. ءبىز تۋرالى اڭىزدار كوپ. مۇحامەدجان تازابەكوۆ تۋىسقانىمىز. ول كىسىلەردىڭ ءبىزدىڭ پارتياعا قاتىسى جوق. ولاردىڭ كوزقاراستارى بولەك. مەنىكى بولەك.ءبىز ەشكىمنىڭ دە جوباسى ەمەسپىز! ءبىز – قازاقستان حالقىنىڭ پارتياسىمىز. ءبىزدىڭ دەۆيز – حالىققا ادال قىزمەت. حاق!», - دەگەن ەدى 2019 جىلى توعجان قوجالى ءبىر سۇحباتىندا. الايدا اراعا ءۇش جىل سالسا دا، پارتيانى تىركەتۋ جاعىن رەتتەي الماۋدا.
پارتيا قۇرۋدى ماقسات تۇتقانداردىڭ ءبىرى – قوعام بەلسەندىسى مۇحتار تايجان. جەر ماسەلەسىن كوتەرىپ جۇرگەن ول «جەر قورعانى» اتتى پارتيا قۇرماق. بۇل تۋرالى ول 16 ناۋرىز كۇنى ءوزىنىڭ فەيسبۋك پاراقشاسىندا مالىمدەدى.
«دوستار، اعايىن! بۇگىننەن باستاپ مەن جاڭا ساياسي پارتيانى قۇرۋعا كىرىسەمىن. ناعىز ساياسي جانە ەكونوميكالىق رەفورمالاردى جۇزەگە اسىرتۋ ءۇشىن بۇگىنگى بيلىك - ياعني بۇگىنگى زالىندا وتىرعانداردىڭ - ءماجىلىس، سەنات جانە ۇكىمەت 80-90% ءسوزسىز اۋىسۋ كەرەك.
ول ءۇشىن ءبىز - ەل مەن ۇلت جاناشىرلارى - جاڭا پارتيا قۇرىپ كەلەسى سايلاۋدا نۇر وتان-امانات پارتياسىن ادال جارىستا جەڭىپ - بيلىككە كەلۋىمىز قاجەت!
ءبىزدىڭ جاڭا ساياسي پارتيامىزدىڭ اتاۋى جەر قورعانى بولسىن. جەر دەگەن ۇعىم ءار قازاق ءۇشىن قاسيەتتى دەپ بىلەم. جەرىمىزدى قورعاي الساق ۇرپاق ءۇشىن بولاشاققا جول اشامىز دەگەن ءسوز.
مەنىڭ جانجاقتى ۇستانىمدارىمدى، پىكىرلەرىمدى جاقسى بىلەسىزدەر دەپ ويلايمىن. ەگەر مەنىڭ ساياسي جانە ەكونوميكالىق كوزقاراسىمدى قولدايتىن بولساڭىزدار - بۇل سىلتەمەگە كىرىپ تىركەلىڭىزدەر!
كەلەسى سايلاۋدىڭ ناتيجەسىندە (بالكىم بيىل) ءبىزدىڭ پارتيامىزدىڭ بەلسەندىلەرىمىز پارلامەنت پەن مۇلدەم جاڭا ۇكىمەتتە تابىلىپ ەلىمىزگە ناعىز، وتىرىك ەمەس، شىنايى رەفورمانى ەنگىزەتىن بولامىز»، - دەپ جازدى ول.
جۋرناليست ساۋلە ابىلداحانقىزى دا پارتيا قۇرۋدا ويلاپ وتىر.
«اقجۇنىس» ايەلدەر پارتياسىن قۇرامىن! بارلىق قازاق ايەلدەرى، بىرىگىڭدەر! كىم جاڭا پارتيا زاڭگەرى بولعىسى كەلەدى، ءوز-وزىڭىزگە، بىلىكتىلىگىڭىزگە سەنىمدى بولساڭىز، حابارلاسىڭىز! 2-3 جىل بۇرىن قوعامدىق بىرلەستىگىمدى تىركەيتىن مەكەنجاي تاپپاي، قىرىق تۋىس، ءجۇز دوسقا جالىنىپ، «زيانىڭ تيەدى، بيلىك مەنىڭ سوڭىما ءتۇسىپ الادى، قورقامىن» دەپ، ەشكىم ءوز ۇيىنە تىركەگىسى كەلمەي، اقىرىندا قولىمدى ءبىر سىلتەپ قويعان ەدىم. ايەلدەر پارتياسىن پروپيسكاعا قوياتىن ادام تابىلا ما ەكەن؟»، - دەپ جازدى ول ءوز پاراقشاسىنا.
ۋتيلالىم ماسەلەسىن كوتەرىپ جۇرگەن سانجار بوقاەۆ «نامىس» اتتى پارتيا قۇردى. ول پارتياسىن ارنايى تانىستىرىپ، ەندى تىركەۋ جۇمىستارىمەن ءجۇر. 17 اقپاندا وتكەن ءباسپاسوز ءماسليحاتىندا بوقاەۆ جۋرناليستەرگە پارتياسىنىڭ باعىتىن تانىستىرىپ، نەگىزگى مىندەتتەرىن اتاپ كورسەتكەن بولاتىن.
Abai.kz
