امانگەلدى كەڭشىلىكۇلى. پاراسات مايدانى (جالعاسى)
***
«ادامنىڭ ناعىز ءومىرى، ونىڭ بويىندا اقىل-پاراساتتىڭ ساناسى ويانا باستاعاندا عانا باستالادى» دەيدى ۇلى تولستوي. ال قوعامنىڭ اسپانىن زۇلىمدىقتىڭ قارا بۇلتى تورلاپ، ادامشىلىقتىڭ نە ەكەنى ۇمىتىلىپ، ەلىم دەپ ەڭىرەگەن ازاماتتاردىڭ قۇيرىعىنا شالا بايلانىپ، اۋزىنا تەمىر سۋلىق سالىنىپ، جاۋىزدىق سالتانات قۇرعان زاماندا، ادامنىڭ بويىنداعى اللانىڭ نۇرىنداي جارقىراعان اقىل-پاراسات ساۋلەسىنىڭ سونبەۋى مۇمكىن بە؟ قانشا كۇشتى دەگەنىمىزبەن، قۇداي جاراتقان پەندەنىڭ الەمدەگى ەڭ نازىك قۇراقتان دا ءالسىز ەكەنىن دانىشپان پاسكال باياعىدا دالەلدەگەن جوق پا ەدى. ەندەشە سول اللانىڭ ءالسىز پەندەسىنە، تاعدىردىڭ الاپات داۋىلى سوعىپ، دۇنيەنىڭ استاڭ-كەستەڭىن شىعارىپ، ەسكى ءداۋىر مەن جاڭا ءداۋىر بەتتەسىپ، ءبىر-بىرىنە وتكەل بەرگىسى كەلمەگەن ءومىردىڭ ءولىاراسىندا، بويىنداعى ادامدىق قاسيەتىن قالاي جوعالتىپ الماۋىنا بولادى؟ قالاي؟
تولەن ابدىكۇلىنىڭ شىعارماشىلىق كەمەلدىگىنىڭ ەڭ بيىك شىڭى بولىپ تابىلاتىن «ءولىارا» رومانىن وقىعانىڭدا، وسىنداي ءبىر مازاسىز ساۋالدار جانىڭنىڭ تىنىشتىعىن بۇزىپ، بايىز تاپقىزباي قويادى.
***
«ادامنىڭ ناعىز ءومىرى، ونىڭ بويىندا اقىل-پاراساتتىڭ ساناسى ويانا باستاعاندا عانا باستالادى» دەيدى ۇلى تولستوي. ال قوعامنىڭ اسپانىن زۇلىمدىقتىڭ قارا بۇلتى تورلاپ، ادامشىلىقتىڭ نە ەكەنى ۇمىتىلىپ، ەلىم دەپ ەڭىرەگەن ازاماتتاردىڭ قۇيرىعىنا شالا بايلانىپ، اۋزىنا تەمىر سۋلىق سالىنىپ، جاۋىزدىق سالتانات قۇرعان زاماندا، ادامنىڭ بويىنداعى اللانىڭ نۇرىنداي جارقىراعان اقىل-پاراسات ساۋلەسىنىڭ سونبەۋى مۇمكىن بە؟ قانشا كۇشتى دەگەنىمىزبەن، قۇداي جاراتقان پەندەنىڭ الەمدەگى ەڭ نازىك قۇراقتان دا ءالسىز ەكەنىن دانىشپان پاسكال باياعىدا دالەلدەگەن جوق پا ەدى. ەندەشە سول اللانىڭ ءالسىز پەندەسىنە، تاعدىردىڭ الاپات داۋىلى سوعىپ، دۇنيەنىڭ استاڭ-كەستەڭىن شىعارىپ، ەسكى ءداۋىر مەن جاڭا ءداۋىر بەتتەسىپ، ءبىر-بىرىنە وتكەل بەرگىسى كەلمەگەن ءومىردىڭ ءولىاراسىندا، بويىنداعى ادامدىق قاسيەتىن قالاي جوعالتىپ الماۋىنا بولادى؟ قالاي؟
تولەن ابدىكۇلىنىڭ شىعارماشىلىق كەمەلدىگىنىڭ ەڭ بيىك شىڭى بولىپ تابىلاتىن «ءولىارا» رومانىن وقىعانىڭدا، وسىنداي ءبىر مازاسىز ساۋالدار جانىڭنىڭ تىنىشتىعىن بۇزىپ، بايىز تاپقىزباي قويادى.
شىعارمانىڭ «ءبىسسىمىللاسىندا» ءبىز اۋەلى، ەشكىمگە سوقتىعىسپاي، باراقات تىرشىلىك كەشىپ جاتقان قازاقتىڭ ءومىرىن كورەمىز. مىنە، جانى جومارت، ادامدىق مۇراتتى تەمىرقازىق ەتىپ ۇستاعان جانە سول جولدان ءومىردىڭ مۇز-ايدىنىندا تايعاناپ كەتپەگەن اسقار وقۋدان كەلگەن باۋىرى بايتەندى تاي سويىپ، دۇركىرەتىپ توي جاساپ، قارسى الىپ جاتىر. مارە-سارە بولعان اعايىن مەن اتا-بابا داستۇرىمەن تىرشىلىك ەتكەن حالىقتىڭ قۋانىشىندا شەك جوق.
ءبىر كەزدە ومىرگە جازمىش ارالاستى. پاراسات كۇنىن زۇلىمدىقتىڭ تۇمانى تۇمشالاپ تاستادى. باتىرلىق پەن ادىلەتتىلىكتىڭ تۋىن بيىك كوتەرگەن قازاقتىڭ داۋرەنى اياقتالىپ، بازارى تارقادى. ادامنىڭ بويىنداعى سۇيىسپەنشىلىك، يماندىلىق، باۋىرمالدىق، پاراساتتىلىق سەكىلدى ەڭ اسىل قاسيەتتەرى كۇرەسىنگە لاقتىرىلىپ، پەندە بالاسىنىڭ تاعدىرىن جاڭقا قۇرلى دا كورمەي ۇشىرىپ اكەتكەن، زۇلىم زاماننىڭ دولى داۋىلى ىشقىنىپ سوقتى. اعايىننىڭ باۋىرمالدىق سەزىمى جويىلىپ، ناعاشىلى-جيەندى بولىپ ازىلدەسكەن قالجىڭ ەندى ەرەگەسكە، ادامنىڭ بويىنداعى ءبىر-بىرىنە دەگەن سۇيىسپەنشىك سەزىمى بىرتە-بىرتە جاۋىزدىققا ۇلاستى. اتاقتىنىڭ اياعىنان تارتىپ، ءبىلىمدىنى كورە المايتىن، ادام بولىپ ءومىر ءسۇرۋدىڭ بارلىق مۇمكىندىگى سارقىلعان، ەرلىك ەسەرسوقتىققا، ادىلەتتىلىك قياناتقا ورنىن بوساتىپ بەرگەن، يماني قۇندىلىقتاردىڭ قۇنى جويىلعان، الماعايىپ زامان ورنادى، قازاق دالاسىنا.
قولىڭداعى بيلىكتىڭ كۇشىن پايدالانىپ، كۇنى كەشە عانا ءبىر قۇدىقتان سۋ ءىشىپ، ءبىر داستارحاننان ءدام تاتقان زامانداسىڭنىڭ قولىنا كىسەن سالىپ يتجەككەنگە ايداتىپ جىبەرەتىن زۇلىمدىق تا ۇلى ەرلىك بولا باستادى، مىنا دۇنيەدە. بىرەۋدىڭ سۇيگەن قىزىن زۇلىمدىقپەن تارتىپ الۋ دا ناعىز باتىرلىق سانالا باستادى، مىنا جالعاندا.
ادامنىڭ اقىل-پاراساتى جاۋىزدىقتىڭ تۇرمەسىنە قامالعان ءولىارادا زۇلىمدىق پەن ىزگىلىكتىڭ شەكاراسى جويىلىپ كەتتى. ادامدىق قۇندىلىقتاردىڭ ءبارى شاتاسىپ كەتكەن زاماندا زۇلىمدىق پەن ىزگىلىكتىڭ نە ەكەنىن كىم اجىراتىپ بەرە الادى؟ كىم؟ ونىڭ بەلگىسى پەن سيپاتى قانداي؟
روماننىڭ دارالىق سيپاتىن انىقتاۋ ءۇشىن، ونداعى سۋرەتتەلەتىن كەيىپكەرلەرگە جەكە-جەكە توقتالىپ، ولاردىڭ مىنەز-قۇلقىن تالداۋدىڭ قاجەتى شامالى. مۇنداي ءتاسىل اداسۋشىلىققا ۇرىندىرىپ، اۆتوردىڭ ايتپاق يدەياسى مەن ويىنىڭ تەرەڭدىگىن تۇسىنۋگە كوپ كەدەرگىسىن كەلتىرەدى. جانە پاراسات مايدانىنداعى شايقاستا جەڭىلىسكە ۇشىراپ، ادامدىق جولدان اداسقان كەيىپكەرلەر روماندا وتە كوپ بولعاندىقتان، ونداي تالداۋدى جاساۋ مۇمكىن دە ەمەس. سوندىقتان دا ءبىز بۇل ماقالامىزدا جازۋشى تولەن ابدىكۇلىنىڭ ايتقىسى كەلگەن يدەياسىنا عانا توقتالىپ، شامامىز جەتكەنشە شىعارمانىڭ رۋحىنا بويلاپ، سۋرەتكەردىڭ الەمدى تانىپ، تىرشىلىكتىڭ ىشىنە ەنىپ كەتكەن دۇنيەتانىمىن كورسەتۋگە تاۋەكەل ەتتىك. ويتكەنى وسى ۋاقىتقا دەيىن ونى جاساۋعا تالپىنىس جاساعان ەشكىم بولعان جوق. ءبىر ماقالىنىڭ ىشىندە ءبىز رومانداعى بارلىق كەيىپكەرلەردىڭ دارالىق سيپاتىن ايگىلەپ بەرەمىز دەپ ايتا المايمىز. جازۋشىنىڭ شىعارماسىنداعى ءبىر-بىرىنە ۇقسامايتىن جۇزدەگەن ادامداردىڭ وبرازى تۋرالى سەزىمىڭدى قالاي جەتكىزەسىڭ. ءبىز ءوز ماقالامىزدا روماننىڭ نەگىزگى يدەياسىن ءتۇسىندىرىپ بەرىپ، قولىمىزدان كەلگەنشە جازۋشىنىڭ ءومىردى تانۋداعى جۇمباعىن اشۋعا تىرىستىق.
سۋرەتكەر ابدىكۇلىنىڭ دۇنيەنى تانۋداعى ەشكىمگە ۇقسامايتىن ءوز جۇمباعى بار. «ءولىارا» رومانىندا جازۋشىنىڭ ءومىردى تانۋداعى سول جۇمباعىن، اسقان شەبەرلىكپەن سومدالعان اسقاردىڭ بولمىسىنان تانىعانداي بولاسىڭ. تاعدىردىڭ نايزاعايى ءتۇسىپ، پەندەلەردىڭ جانى وتقا ورانعان ءداۋىردىڭ ءولىاراسىندا دا زۇلىم زاماننىڭ نوقتاسىن موينىنا سالعىزباي، ادامدىق قاسيەتتى تالاق قىلماي ارپالىسىپ وتۋگە بولاتىنى اسقاردىڭ بەينەسى ارقىلى اسقان شەبەرلىكپەن اشىلعان.
شىعارمانىڭ باستى كەيىپكەرلەرىنىڭ ءبىرى اسقار ءومىردىڭ رۋحاني بيىگىنە كوتەرىلگەن ازامات. مۇنداي ادامدارعا بارلىق ۋاقىتتا دا قيىن. ويتكەنى مىنا دۇنيەدە ساناۋلى ادامدار عانا ءومىردىڭ رۋحاني بيىگىنە كوتەرىلىپ، قالىڭ توبىر، ونىڭ ەتەگىندە قالىپ قويادى. ۋاقىت توبىرعا قىزمەت ەتەدى. قوعامنىڭ زاڭدىلىعى دا توبىردىڭ سۇرانىسىن قاناعاتتاندىرۋ ءۇشىن سالتانات قۇرادى. سوندىقتان دا رۋحى كەمەلدەنگەن ادامدار مەن قۇمىرسقانىڭ يلەۋىندەي قۇجىناعان مادەنيەتسىز توبىر، قانداي زاماندا ءومىر سۇرسە دە، ەش ۋاقىتتا دا ءبىرىن-ءبىرى تۇسىنە الماي وتەدى.
بىراق قارا توبىردىڭ ورتاسىندا ءجۇرىپ تە، ادامدىق قاسيەتىڭدى جوعالتپاي، جارقىراپ ءومىر سۇرۋگە بولادى. اسقار - ۋاقىتتىڭ داۋىلى سوندىرە الماعان، قاراڭعى تۇنەكتە دە كۇن سياقتى جارقىراعان - ءومىردىڭ ساۋلەسى. ونىڭ جان كۇيزەلىسىن كورگەندە، توبىردىڭ ناداندىعىنا نازالانىپ، باس كەيىپكەردىڭ رۋحاني تەرەڭدىگىن تاني تۇسەمىز. ول ولگەن كۇنى جالپ ەتىپ، ادامنىڭ جانىنا شۋاعىن شاشىپ تۇرعان، رۋحاني ءومىردىڭ ساۋلەسى دە ونىمەن بىرگە سونەدى. سول ساۋلە سونە جازداپ، جارىعى السىرەگەن شاقتا، كارتينانىڭ قاق ورتاسىنان، سوۆەتتىك داۋىردە ءومىر سۇرە وتىرىپ، ونىڭ ۇلتىمىزدى قان قاقساتقان زۇلىمدىعىنا نازالانعان جازۋشىنىڭ، ءتۇرلى كەيىپكەرلەر ارقىلى جەتكىزگەن جان ايقايى، قايتا-قايتا ەستىلەدى:
- مىڭعىرعان مالدان ءبىر ءۇزىم نانعا قاراعان كۇنگە ءتۇسۋ سوراقىلىق ەمەي نە؟ قازاقتىڭ كەدەيى دە مۇنداي قايىرشىلىقتى باستان كەشكەن جوق. الدە سەندەردىڭ ماقساتتارىڭ بايلىق ەمەس، قايىرشىلىق پا؟...
- سەن بار بولعانى قولشوقپارىسىڭ. ال، قوجايىندار - باسقالار، تاريحتى جاسايتىندار دا سولار. جانە ولار وزدەرىنە كەرەك تاريحتى عانا جاسايدى..
- مەن ءۇشىن ەل سەنىڭ شىندىعىڭنان دا قىمبات. شىندىق ءۇشىن جەكە ادامداردى قۇربان ەت، بىراق ەلدى قۇربان ەتۋگە بولمايدى...
- وسپان قوجا ەلدى الداسا، وعان دا ءدىن كىنالى ەمەس، ءدىننىڭ شاريعاتىن ساقتاي الماي وتىرعان وسپان قوجا كىنالى. ەكەۋىن شاتاستىرۋعا بولمايدى. شاريعاتتىڭ ۇكىمەتكە قارسى جەرىن كورگەم جوق. وتىرىك ايتپاۋ، ۇرلىق قىلماۋ، ادال ەڭبەكپەن كۇن كورۋ، كىسىگە قيانات جاساماۋ، بايلىققا قۇنىقپاۋ، كەدەيگە قايىر، عارىپكە كومەك - وسىنىڭ ءبارى شاريعاتتا بار نارسە. ال مۇنىڭ قاي جەرى بۇرىس؟...
زاماننىڭ زۇلىمدىعى شەكتەن شىعىپ، شارىقتاۋ شەگىنە جەتكەندە، جازۋشى ءتىپتى، حالىقتى قان قاقساتقان سوۆەتتىك داۋىرگە بار قاھارىن توگىپ، ونى قارعاي باستايدى. «زورلىقشىل مەملەكەتتەردىڭ ءبىرىن-ءبىرى باسىپ العىسى كەلەتىنى سەكىلدى، ادامدار دا ءبىرىن-ءبىرى باسىپ الىپ، بيلىكتەرىن جۇرگىزگىسى كەلەدى عوي. بىراق بۇل كۇرەستە ءاماندا كۇشى باسىم جەڭە بەرمەيدى، كەيدە كۇشتىنى السىزدەر دە جەڭىپ كەتە بەرەدى. ول جولدا ءالسىزدىڭ ەڭ ۇلكەن قارۋى - جاعىمپازدىق».
سوۆەتتىك ءداۋىردىڭ ۇلتىمىزعا تارتقىزعان تاۋقىمەتى مەيلىنشە شىنايى جىرلانعان «ءولىارا» رومانى جيىرماسىنشى عاسىردىڭ اۋقىمدى ەپوپەياسى عانا ەمەس، بارلىق ۋاقىتتا دا قۇندىلىعىن جويمايتىن، بايلىعى ەشقاشان دا سارقىلمايتىن ادەبيەتىمىزدىڭ التىن قازىناسى بولىپ قالا بەرەدى. روماندا دارالىق سيپاتى ءبىر-بىرىنە ۇقساماي كەستەلەنگەن وبرازداردىڭ تۇتاس الەمى بار. ال، الاسۇرعان ءومىر تەڭىزىنىڭ ۇستىندە سەڭدەي سوعىلىسىپ، جانتالاسقان ادامداردىڭ تاعدىرى تۋرالى سەزىمىڭدى جەتكىزۋ ءتىپتى دە مۇمكىن ەمەس. بايتەن مەن حاديشانى ءبىر-بىرىنە ىنتىزار ەتكەن، اقسۇيەك ويناعان كەش قانداي تاماشا! ال سول كەشتەن كەيىن ءومىرى اجىراماستاي بولعان حاديشانىڭ بايتەنگە جاساعان وپاسىزدىعىنا كۇيىنگەن اشۋ-ىزاڭدى سوزبەن قالاي جەتكىزە الاسىڭ. ومىردەن تىرەك ىزدەگەن قانشاما ادام زۇلىم ءداۋىردىڭ بورانىندا اداسىپ ءجۇر. جىندى حامزانىڭ تراگەديالىق بەينەسى قالاي ادەمى سومدالعان. روماننىڭ سوڭىندا ومىردەن تۇڭىلگەن اسقار وزىنە-ءوزى قول سالىپ ولمەك بولعاندا، ونى اجالدان قۇتقارعان سول جىندى حامزانىڭ اقىلدى ادامداردىڭ بارىنەن دە اسقان كەمەڭگەرلىگىنە قالاي قايران قالمايسىڭ. قوعامنىڭ سايتانىنا اينالعان نۇربەكتىڭ وبرازىن تالدايتىن بولساق، اڭگىمەمىز ءتىپتى ۇزاققا سوزىلىپ كەتۋى مۇمكىن. بىراق ولاردىڭ ءبارىن جىپكە تىزە بەرۋدىڭ قاجەتى جوق.
«ءولىارا» رومانىنىڭ سول جىلدارى جازىلعان باسقا تۋىندىلاردىڭ بارلىعىنان بيىكتەتىپ تۇرعان دارالىق سيپاتى تەك سوندا عانا ەمەس. وقىرماننىڭ مۇلگىپ كەتكەن ويىن ءتۇرتىپ، روماندى ومىرشەڭ ەتىپ تۇرعان قۇدىرەتتىڭ ەڭ عاجايىپ سىرى مۇلدە باسقادا.
شىعارماعا جان ءبىتىرىپ، ونىڭ شىرايىن كەلتىرىپ تۇرعان ەڭ ۇلكەن قۇدىرەت - زاماننىڭ زۇلىمدىعىن اشكەرەلەۋدەن قايمىقپاعان، تولەننىڭ اقىندىق جۇرەگى. روماننىڭ ءار بەتىن پاراقتاعان سايىن، زۇلىمدىقپان ايقاسقان سول اقىندىق جۇرەكتىڭ ءدىرىلىن ايرىقشا سەزىنە تۇسكەندەي بولاسىڭ.
عاجايىپ ەپوپەيانى تۋعىزعان تولەن تالانتىنىڭ دارالىعى ومىر توپىراعىنىڭ استىندا كومىلىپ قالعان اقيقاتتى قازىپ الىپ، تاريحي ءداۋىردىڭ زۇلىم شىندىعىن ءبىزدىڭ سانامىزدا قايتا تىرىلتە بىلگەن شەبەرلىگىندە جاتىر.
روماننىڭ سوڭىندا «ءبىرىنشى كىتاپتىڭ سوڭى» دەگەن تۇسىنىكتەمە بەرىلگەنىمەن، ءبىزدىڭ ويىمىزشا تولەن ابدىكۇلىنىڭ بۇل شىعارماسى اياقتالىپ، سوڭعى نۇكتەسى قويىلعان تۋىندى. ءىنىسى وقۋدان كەلگەندە تاي سويىپ، توي جاساعان اسقاردى، شىعارمانىڭ سوڭىندا سول تۋعان باۋىرى بايتەننىڭ الدىنا سالىپ ايداپ اكەتىپ بارا جاتقانىنان كەيىن، ءداۋىردىڭ زۇلىمدىعىن كورسەتەتىن باسقا ءبىر دەتال ىزدەۋدىڭ قاجەتى شامالى شىعار.
تاقىرىپتىڭ ءتۇيىنى
جازۋشى تولەن ابدىكۇلى ادامنىڭ رۋحىن كەمەلدەندىرە تۇسەتىن پاراسات مايدانىندا تولايىم تابىسقا جەتكەن سۋرەتكەر. وقىرمانداردىڭ زور سۇيىسپەنشىلىگىنە بولەنگەن مۇنداي جەڭىسكە ول، بويىنداعى تالانتى، جازۋ شەبەرلىگى مەن ونەردەگى ىزدەنىسىنىڭ ارقاسىندا عانا جەتكەن جوق. ايلاسى شەكسىز، امالى شولاق عاسىردا ءومىر سۇرگەن سۋرەتكەردى ونەردىڭ اسقار بيىگىنە كوتەرگەن ەكى قاناتى بولدى - ادال ماحاببات پەن ادامدىق پاراسات.
ونەردى سۇيگەن ماحابباتىنا ادال بولعاندىقتان، «ءولىارا» رومانىنداعى اسقارداي بارلىق ۋاقىتتا دا ول ادام بولىپ قالۋدىڭ جولىن ىزدەپ، داڭعويقۇمارلىقتان، جاعىمپازدىقتان، ەكىجۇزدىلىكتەن، وتىرىك پەن وسەكتەن بويىن اۋلاق ۇستادى. شىعارماشىلىق ءومىرىنىڭ قوس قاناتى - ادال ماحاببات پەن ادامدىق پاراسات ونى ىلعي ونەردىڭ اسپانىنداعى شەكسىزدىككە قاراي ۇمتىلدىردى.
ونەرگە ۇلى ماقسات قۋىپ كەلگەنىمەن، ارمانداعان بيىگىنە جەتە الماي قاناتى قىرقىلىپ قالاتىن قانشاما تالانتتار بار. جانە ولاردىڭ بارلىعى شىعارماشىلىق قۋاتىنىڭ ازدىعىنان عانا سول بيىككە كوتەرىلە الماي قالعان جوق. ونەردى سۇيگەن ماحابباتى مەن ادامدىق پاراساتىن جوعالتىپ العاندىقتان ولاردىڭ قاناتى سىنىپ، شىعارماشىلىعى ءولدى. جۇرەكتەرى تازا كەزىندە ءبىراز بيىككە سامعاعانىمەن، ۋاقىتقا قىزمەت ەتە ءجۇرىپ ولار، پاراسات كۇنىن تۇمشالاپ تاستاعان بۇلتتاردىڭ اراسىندا اداسىپ كەتتى.
جازۋشى شىعارماداعى تەرەڭ ويدى ىزدەنىس پەن كىتاپتان عانا ەمەس، ەڭ الدىمەن رۋحىنىڭ تازالىعى مەن جانىنىڭ تەرەڭدىگىنەن تابادى. كوپ وقىپ، كوز ىزدەنگەنىمەن، ومىردەگى الاياق، ەكىجۇزدى، داڭعويقۇمار، ماقتانشاق، پىسىق، جاعىمپاز بولىپ تۋعان ادامداردىڭ نەگە كەمەل دۇنيەلەر تۋعىزا المايتىنىنىڭ سەبەبىن ويلانىپ كوردىڭىز بە؟ ويتكەنى اللانىڭ التىن سارايىنداي جارقىراعان ۇلى رۋحتاردىڭ قاقپاسى، شىعارماشىلىعى بىلعانباعان، ادال ماحابباتى مەن ادامدىق پاراساتىن جوعالتپاعان ادامدار ءۇشىن عانا اشىلادى.
ادەبيەت - ادامتانۋدى عانا ەمەس، ادام بولىپ قالۋدى ۇيرەتەتىن ۇلى ونەر. مىنە، سوندىقتان دا شىن تالانت ادەبيەتكە، ادامدىق باستاۋدىڭ قاينارىن لايلايتىن قوعامنىڭ زۇلىمدىعىنان ءومىردى تازارتۋ ءۇشىن كەلەدى. جۇرەگى وتتاي جانىپ، ءومىردىڭ زۇلىمدىعىمەن كۇرەسە الماعان جازۋشى ەش ۋاقىتتا دا ادام جانىنىڭ سۋرەتكەرى بولا المايدى.
ونەرگە بەرىلگەن ادالدىعى مەن ادامدىق پاراساتىنىڭ ارقاسىندا تولەن ابدىكۇلى ادام جانىنىڭ سۋرەتكەرى بولا ءبىلدى. ونىڭ قالامىنان تۋعان شىعارمالارىندا زۇلىمدىققا قارسى پاراسات مايدانىن اشقان وتتىڭ جالىنى لاۋلايدى. سول جالىننان قۋات العان ءبىزدىڭ رۋحىمىز دا ونىڭ جازعان ءار شىعارماسىمەن بىرگە كەمەلدەنىپ، ادامدىق جولدان تايعاناپ كەتپەي، پاراسات مايدانىندا جازۋشىمەن بىرگە جەڭىسكە جەتىپ كەلەدى.
سوڭى
«Abai.kz»
