شەكارالىق اۋدانداردىڭ ماسەلەسى – شەتىن ماسەلە. اسىرەسە، جانى سانى ميللياردتان اسىپ، باتىس ءوڭىرىن يگەرۋگە وڭمەڭدەي ۇمتىلىپ كەلە جاتقان قىتايمەن اراداعى شەكارانىڭ قاۋىپسىزدىگى، شەكارالىق ايماقتاردا تۇراتىن ەلدىڭ تۇرمىس-احۋالى، شارۋاشىلىق جايى، حالىقتىڭ تابيعي ءوسىمى، كوبەيۋى، توپتاسۋى ۇكىمەتتىڭ ۇنەمى نازارىندا بولۋى كەرەك. بىراق قازاق ۇكىمەتى كۇنى بۇگىنگە دەيىن شەكارالىق ەلدىمەكەندەرگە شەكەسىنەن قاراپ كەلدى. ءتىپتى، ول جاقتا نە بولىپ جاتقانىنا مۇلدە كوڭىل بولگەن دە جوق.

«حالىق 25 جىل قان قاقسادى» دەپ، جازدى ءماجىلىس دەپۋتاتى ەرلان سايروۆ فەيسبۋكتەگى جەكە پاراقشاسىندا. ەرلان بياحمەتۇلى – ماجىلىستە شەكارالىق اۋدانداردى قالپىنا كەلتىرۋ تۋرالى تۇراقتى ماسەلە كوتەرىپ جۇرگەن دەپۋتات.

– ماعان جاڭا وبلىستاردىڭ اشىلۋىنا بايلانىستى، سول وبلىستارداعى قىتايمەن شەكارالاس، كەزىندە جابىلىپ قالعان اۋدانداردىڭ تاعدىرى جونىندە كوپتەگەن ازاماتتاردان سۇراقتار ءتۇسىپ جاتىر، – دەيدى دەپۋتات. – وسى ماسەلە بويىنشا مەنىڭ پوزيتسيامدى بىلگىسى كەلەتىندەر دە كوپ.

وبلىستاردى بىرىكتىرىپ، تەرريتوريالىق وڭتايلاندىرۋ ساياساتىن دەپۋتات ساياسي ۆوليۋنتاريزمگە تەڭەدى.  

– ءومىر كورسەتكەندەي، 1997 جىلعى تەرريتوريانى وڭتايلاندىرۋ ساياسي قاتەلىك بولعان.  بۇنى ساياسي ۆوليۋنتاريزم دەسە دە بولادى.

ارقالىق قالاسى ويسىراپ قالدى، سەمەي مەن جەزقازعاننىڭ دامۋى تەجەلدى.

ال شەكارالىق اۋدانداردا، اسىرەسە شقو-نىڭ قاتون-قاراعاي، مارقاكول،  تارباعاتاي سياقتى ەلدىمەكەندەرىندە گۋمانيتارلىق توقىراۋ بولدى. بۇل اۋدانداردان حالىقتىڭ 60 پايىزى كوشىپ كەتتى!

حالىق 25 جىل قان قاقسادى! بيلىكتىڭ ءوز حالقىنا جاساعان الىمجەتتىگى دەپ وسىنى ايتادى!

دەپۋتات مەملەكەت باسشىسىنىڭ ناۋىرزداعى جولداۋىندا بۇرىنعى تاراپ كەتكەن وبلىستاردىڭ قايتادان اشىلاتىنىن، ءوز كەزەگىندە وڭتايلاندىرۋدىڭ ورامىندا كەتكەن اۋدانداردىڭ دا قايتادان قالپىنا كەلەتىنەندىگىنە سەنىم ءبىلدىردى.

– پرەزيدەنت قاسىم-جومارت توقاەۆ وسى تاريحي ادىلەتتىلىكتى قالىپقا كەلتىردى!

ەندى قايتادان اشىلعان وبلىستاردا (وڭىرلەردە) تىرشىلىك قايتادان باستالادى.

بۇل ءوز كەزەگىندە ەلىمىزدەگى حالىقتىڭ تەپە-تەڭ ورنالاسۋىنا،  سول وڭىرلەرگە ينۆەستيتسيانىڭ كەلۋىنە، حالىقتىڭ قايتا كوشۋىنە سەپتىگىن تيگىزەرى انىق.

قىتاي حالىق رەسپۋبليكاسىمەن شەكارالاساتىن جەرلەرىمىز – شقو-دا –قاتون-قاراعاي،  مارقاكول، اباي وبلىسىندا – ماقانشى، جەتىسۋ وبلىسىندا – ۇيگەنتاس،  قاپال. بۇلار ءبىر كەزدەرى بىرنەشە شارۋاشىلىقتاردىڭ باسىن قوسقان، مالدى، جاندى اۋداندار ەدى. سول اۋداندار وبلىس ورتالىقتارى قىزمەتىنە كىرىسىپ،  اكىمشىلىك تەرريتوريالىق ءبولىنىس انىقتالعان سوڭ، ەكىنشى كەزەكتە قايتادان قالپىنا كەلەدى.  ارينە، بۇل ماسەلەنى شەشۋگە ءبىراز ۋاقىت كەرەك بولادى. ءبىز ونى ىستەيمىز.

بىزدە وسىناۋ كۇردەلى ماسەلەگە  بيزنەستى ءتيىمدى ارالاستىرۋدىڭ پراكتيكادا ىسكە اسقان باعدارلاماسى بار.

بۇگىن، ورتا بيزنەس مەملەكەتتىك ماسەلەنى شەشۋگە ءوزىنىڭ كومەگىن بەرۋگە دايىن.

ويتكەنى مەملەكەتكە شەكتەن تىس ەكونوميكالىق اۋىرتپالىق سالۋعا بولمايدى.

سوندىقتان، اۋدانداردى اشۋدىڭ ءبىراز ەكونوميكالىق-قارجىلىق سالماعىن بيزنەس وكىلدەرى وزدەرى كوتەرۋى كەرەك.ءبىز ولارمەن جۇمىس ىستەۋدەمىز.

شەكارانى شەگەندەي ءتۇسۋدىڭ قاجەتتىلىگىنە نازار اۋدارتقان ءماجىلىس دەپۋتاتى فەيسبۋكتەگى جازباسىندا قىتاي قاۋىپىن دە ەسكەرتە كەتىپتى.

– بۇگىنگىدەي كۇردەلى گەوساياسي كەزەڭدە قىتايمەن اراداعى شەكارانى قالت جىبەرمەي كۇزەتىپ، شەكارالىق اۋداندارداعى حالىقتىڭ تۇرمىسىن كوتەرۋ وتە ماڭىزدى!

ول جاقتان ۇلكەن قىسىم كەلەدى. ول قىسىمدى ءبىز ءالى سەزىنگەن جوقپىز.

اۋدان، وبلىستاردى ءبولۋ – بيۋدجەتتەن كوپ قاراجاتتى تالاپ ەتپەيتىندىگىن كورسەتتى. كەرىسىنشە بۇل ادام كاپيتالىن دامىتا وتىرىپ، سول وڭىرلەردىڭ ءال-اۋقاتىن جاقسارتىپ،  ەكونوميكالىق دامۋىنىڭ لوكوماتيۆى بولادى.

سوندىقتان،  وسى باعىتتا جۇمىس جالعاسادى.

ءبىز سول ءۇشىن جۇمىس ىستەيتىن بولامىز.

ويتكەنى، بۇل – مەملەكەتىمىزدىڭ بولاشاق تاعدىرىنا تىكەلەي قاتىستى ماسەلە!

Abai.kz