بۇگىن الماتى وبلىسى، قاراساي اۋدانىنا قاراستى ءىرى بازار «التىن وردانىڭ» كاسىپكەرلەرى شاعىم ءبىلدىردى. ولار: «ەسكى بازار ورنىنا سالىنىپ جاتقان جاڭا ساۋدا كەشەنىنەن ورىن ساتىپ الدىق، بىراق، سوعان قاراماستان دالادا قالۋىمىز مۇمكىن»، - دەپ الاڭدايدى.

«التىن وردا» بازارى 2007 جىلدان باستاپ «قۇرىلىس LTD»  جشس-عا تيەسىلى بولدى. سەرىكتەستىك بازاردى «Altyn Orda QazTrade LTD» جشس-عا كەلىسىم شارت نەگىزىندە جالعا بەرىپ وتىرعان. 2020 جىلى جاڭا قۇرىلىس باستالار ۋاقىتتا ساۋداگەرلەر عيماراتتان ورىن الۋ ءۇشىن «Altyn Orda QazTrade LTD» جشس-عا 4 ملرد تەڭگە قارجى قۇيادى، كەلىسىم-شارتقا وتىرادى.

الايدا 2022 جىلى بازاردىڭ يەلىگى دانيار الپيەۆ اتتى ازاماتقا وتەدى. ساۋداگەرلەردىڭ ايتۋىنشا ەسكى باسشىلىق جاڭا باسشىلىققا ساتىپ الىنعان ورىندارى تۋرالى ەشقانداي مالىمەت بەرمەي وتىر. سوندىقتان ولار «ەكى ورتادا شىبىن ولەدىنىڭ» كەبىن كيۋ قاۋپى بارىن ايتادى.

ءابدىجانوۆا ءاليا: 

«مەن 2005 جىلدان بەرى بازاردا ىستەيمىن. ەسكى ورنىمدا ءتورت دۇكەنىم بولدى. ولاردى ءسۇرىپ تاستادى. ورنىنا ەشتەڭە بەرگەن جوق، تەك جاڭا ورىندى ساتىپ الۋعا 5 پايىز جەڭىلدىك بەرەمىز دەدى. بىراق ول جەڭىلدىكتىڭ ءوزىن 2021 جىلى جويىپ جىبەردى. مەن جاڭا عيماراتتان ءتورت دۇكەن الۋ ءۇشىن ەكەۋىنە 36 مىڭ دوللور تولەدىم، تاعى ەكەۋىنە 30 پايىزىن، ياعني 7200 دوللور تولەپ قويدىم. مەنىڭ تالابىم مىناۋ: وسى بازاردى سالۋ ءۇشىن بىزدەن اقشا الدى ەكەن، ەندەشە جالعا بەرۋ اقشاسىن الماسىن. مەملەكەتكە سالىقتى عانا تولەپ وتىرايىق»، - دەيدى بازار كاسىپكەرى.

ەلەۋوۆا گۇلشات:

«جاڭا بازاردان 5 دۇكەن الۋعا 33 ميلليون تەڭگە اقشا سالدىم. قازىر جاڭا بازاردىڭ 95 پايىزى ءبىتىپ تۇر. ەندىگى كەزەكتە جاۋاپتى ادامدار ءبىزدى ەكى باسشىلىقتىڭ ورتاسىندا قالدىرماي، عيماراتتىڭ ىشىنە كىرگىزىپ بەرسىن. ءبىز مامىر ايىندا كوشۋىمىز كەرەك ەدى. جاڭا باسشىلىق «قۇرىلىستى بىتىرگەن سوڭ كىرەسىزدەر» دەپ ايتىپ جاتىر. بىراق بىزگە قاعاز جۇزىندە «اقشا تولەگەندەرگە ەش ماسەلەسىز ورىندى بەرەمىز» دەگەن قۇجات كەرەك. 33 ميلليون تولەگەنىمدى دالەلدەيتىن كەلىسىم-شارت قولىمدا بار»، - دەدى  بازاردان ناپاقاسىن تاۋىپ وتىرعان تاعى ءبىر كاسىپكەر.

الىمبەتوۆا زويا:

«مەن بازاردا 18 جىلدان بەرى ىستەپ كەلەمىن. 2020 جىلدان باستاپ بۇرىنعى باسشىلىق جاڭا قۇرىلىسقا بىزدەن اقشا جيناي باستادى. مەن ءتورت دۇكەنگە 20 ميلليون اقشا تولەدىم.  مىنە، جاڭا باسشىلىق كەلگەلى 3 كۇن ءوتتى. ءبىز ەكى باسشىلىقتىڭ دا الدىنا باردىق. بىراق ناقتى جاۋاپ بەرمەيدى. ەكى ورتادا قالىپ تۇرمىز. ەكى باسشىلىق كەلىسىمگە كەلمەي وتىر»، - دەيدى ساۋداگەر.

ساۋداگەرلەردىڭ ايتۋىنشا، جاڭا بازاردان ورىن ساتىپ الۋعا تولەگەن اقشا سوماسىن ايدوس ەسىمدى ازامات داپتەرگە جازىپ وتىرعان. الايدا، ساۋداگەرلەرگە چەك بەرىلمەگەن. جاڭا باسشىلىق سول داپتەردى، باسقا دا اقشا تولەندى دەگەن قۇجاتتاردى الا الماي وتىر ەكەن.

Abai.kz