جۋىردا اقپارات قۇرالدارى كۇدىكتىنىڭ ادۆوكاتىنا سۇيەنە وتىرىپ، تەرگەۋ ورگاندارى قۇدايبەرگەننەن "تەرگەۋگە قاجەت جاۋاپ الۋ ءۇشىن" قىسىم جاساپ جاتقانىن حابارلاعان.

پروكۋراتۋرا مالىمەتىنشە، الەۋمەتتىك جەلىلەردە "قۇدايبەرگەننىڭ قۇقىق قورعاۋ ورگاندارىنىڭ قىسىمىنا شاعىمدانعان مالىمدەمەسى" تاراعان. پروكۋراتۋرا وكىلدەرىنىڭ ايتۋىنشا، "تەرگەۋ شارالارى قىلمىستىق-پروتسەسسۋالدىق زاڭناماعا سايكەس" قاتاڭ ءجۇرىپ جاتىر. "بۇعان قوسا، ايتىلعان ايعاقتار قۇقىقتىق باعا بەرۋ جاعىنان تەكسەرىلەدى" دەدى پروكۋراتۋرا وكىلدەرى.

شاعىمدا اۆتور باس پروكۋرور بەرىك اسىلوۆتان "ۆەدومستۆوارالىق تەرگەۋ-جەدەل توبىنىڭ قۇرامىنا ەنگەن" ءبىر تۇلعانى جاۋاپقا تارتۋدى سۇراعان. اۆتوردىڭ سوزىنە قاراعاندا، اتالعان قىزمەتكەر ادۆوكات جوق كەزدە "جالعان كۋالىك الۋ ءۇشىن" كۇدىكتىگە پسيحولوگيالىق جانە مورالدىق قىسىم جاساعان.

حاتتاعى مالىمەتكە سۇيەنسەك، وقيعا 26 ساۋىردە شامامەن ساعات 10-30-دا بولعان.

الەۋمەتتىك جەلىلەردە سونىمەن بىرگە قايرات قۇدايبەرگەندى قولداۋ پەتيتسياسى دا پايدا بولدى. ونى كۇدىكتىنىڭ اناسى بيبىگۇل قابدولدينا باستاعان دەپ ايتىلادى. پەتيتسيا اۆتورلارى قامالعان دەپۋتاتتىڭ قاڭتارداعى تارتىپسىزدىككە قاتىسى جوعىن ايتىپ، "قۇدايبەرگەندى دەرەۋ بوساتۋ" قاجەتتىگىن ايتقان.

قايرات قۇدايبەرگەننىڭ ۇستالعانى 22 ساۋىردە بەلگىلى بولعان. الماتى پروكۋراتۋراسىنىڭ مالىمدەۋىنشە، قاڭتار وقيعاسى كەزىندە قۇدايبەرگەن قاماۋدا وتىرعان "ديكي ارمان" دەپ اتالىپ كەتكەن ارمان جۇماگەلديەۆتىڭ جانىندا بولعان، "قازاقستان" قوناق ۇيىنە ادامداردى جيناپ، "جاپپاي تارتىپسىزدىككە قاتىسقان". قاڭتار وقيعاسى كەزىندە تۇسىرىلگەن ۆيدەولاردان قۇدايبەرگەن مەن جۇماگەلديەۆتىڭ جۇرگەندەرى بايقالادى. اقپاندا اتى-ءجونىن ايتقىسى كەلمەگەن ەر ادام ازاتتىققا "قازاقستان" قوناق ۇيىندە سوققىعا جىعىلعانىن ايتىپ، دەپۋتاتتىڭ ارەكەتىن تەرگەۋگە ۇندەگەن.

اقپان ايىندا قايرات قۇدايبەرگەننىڭ ءوزى "ارمانمەن تانىستىعى جوعىن، تارتىپسىزدىك كەزىندە الاڭدا كورگەنىن، ول جاققا حالىقتى باسۋ ءۇشىن بارعانىن" ايتقان.

قايرات قۇدايبەرگەن 2021 جىلى الماتى قالاسى ءماسليحاتىنىڭ دەپۋتاتى بولىپ سايلانعان.

Abai.kz