سوڭعى 15-20 جىلدا ناقتى ساياسات بولعان جوق

قازاق، سەن ساياساتتى جاقسى كورمەيسىڭ بە؟ مۇنىڭىز دۇرىس دەيىك. بىراق ساياساتتىڭ ءسىزدى قورلاۋىنا جول بەرمەڭىز. ۇمىتپا، ەگەر بۇگىن ءۇنسىز قالساڭ (ماسەلەن، سايلاۋعا، شەرۋگە قاتىسپاي، كونستيتۋتسياعا ەنگىزىلەتىن تۇزەتۋلەردى تالقىلاۋعا بارماساڭ) وندا بۇگىنگى ەنجارلىعىڭ ەرتەڭ بالالارىڭا تىكەلەي اسەر ەتەدى. بۇل تۋرالى پۋبليتسيست بيگەلدى  عابدۋللين facebookتەگى پاراقشاسىندا جازدى، دەپ حابارلايدى Almaty-akshamy.kz.

ءپۋبليتسيستىڭ جازۋىنشا، قازاق حالقى بولاشاعىنا الاڭداۋشىلىق بىلدىرگەنىمەن، ونى جاقسارتۋعا ەش تالپىنىس جاسامايدى.

«ءبىزدىڭ حالىققا تاڭ قالامىن. ءبىز قيىن تاعدىرىمىزعا شاعىمدانعاندى جاقسى كورەمىز، ناشار تۇرامىز، بيلىك قاراپايىم حالىقتى ويلامايدى دەپ كوپ ايتامىز. سويتە تۇرا، حالقىمىز اينالامىزدا بولىپ جاتقان بارلىق نارسەلەرگە نەمقۇرايلى قارايدى، قوعامدىق ومىرگە ارالاسپايدى، بيلىككە ىقپال ەتىپ، تاعدىرىمىزدى جاقسى جاققا وزگەرتۋ مۇمكىندىگى تۋعاندا قوعامدىق ومىرگە ارالاسپايدى. ۇزاققا بارماي-اق قويايىق، ءتىپتى تۇرعىنداردىڭ جينالىسىندا ولاردىڭ باسىن قوسۋ قيىن، ال ۇلكەن ءارى ماڭىزدى ناۋقاندار تۋرالى نە ايتۋعا بولادى؟» - دەپ جازدى ب.عابدۋللين.

ونىڭ ويىنشا، سوڭعى جىلدارى حالىقتىڭ ساياسي بەلسەندىلىگى تومەندەپ كەتكەن. وعان سوڭعى كەزدە، اسىرەسە، الماتى قالاسىندا، وتكەن سايلاۋ شارالارى دالەل بولا الادى، - دەدى ول.

«مۇنى نەمەن تۇسىندىرەمىز؟ بۇل، ەڭ الدىمەن، ەلدەگى ساياسي ءومىردىڭ ءبىرشاما توقىراۋعا تۇسۋىمەن بايلانىستى. ويتكەنى، بىزدە سوڭعى 15-20 جىلدا ناقتى ساياسات بولعان جوق. تەك، 2022 جىلى قاندى قاڭتاردىڭ كەلۋىمەن ەلدە شەرۋلەر مەن وپپوزيتسيانىڭ اكتسيالارى وتە باستادى. ونىڭ ءوزى شامالى. ەكىنشىدەن، حالىقتىڭ ەنجارلىعى ءبىزدىڭ حالىقتىڭ باسىم كوپشىلىگىنىڭ ساياسي ساۋاتسىزدىعىمەن تۇسىندىرىلەدى. ەگەر سەنبەسەڭىز، جوعارى ءبىلىمى بار كەز كەلگەن تۇرعىننان، ماجوريتارلىق سايلاۋ جۇيەسى مەن پروپورتسيونالدى سايلاۋدىڭ ەرەكشەلىگىن سۇراپ كورىڭىز. ءسوز بەرەم، 10 ادامنىڭ 8-ءى دۇرىس جاۋاپ بەرە المايدى. ونىڭ باستى سەبەبى – ءبىزدىڭ ءالسىز مەملەكەتتىك تەلەارنالارىمىزدا جاتىر. ولاردا نە كورسەتىلەدى؟ وندا جاپپاي ويىن-ساۋىق سيپاتىنداعى باعدارلامالار، ودان وزگە ءتۇرلى تۇرمىستىق ماسەلەلەر مەن جەكە ادامداردىڭ ماسەلەسىنە قاتىستى باعدارلامالار. (كتك - وعان جاقسى مىسال), - دەپ جازدى ول.

سونىمەن قاتار ول حالىق ەنجار بولعان سايىن، بيلىك بەلسەندى بولا تۇسەتىنى تابيعي زاڭدىلىق ەكەنىن جەتكىزدى.

«قاڭتار وقيعاسى حالىق ساناسىنا وزگەرىس ەنگىزگەنى ءسوزسىز. بىراق قانشالىقتى؟ بۇل سۇراقتىڭ جاۋابى 5 ماۋسىمدا وتەتىن رەفەرەندۋمدا بەلگىلى بولادى»، - دەپ جازدى ب.عابدۋللين.

Abai.kz