قازاقستان پارلامەنتىنىڭ سەناتى (جوعارعى پالاتاسى) 1992 جىلعى 13 ناۋرىزداعى سالىق ساياساتىنىڭ كەلىسىلگەن قاعيداتتارى تۋرالى تاۋەلسىز مەملەكەتتەر دوستاستىعىنا مۇشە مەملەكەتتەر اراسىنداعى كەلىسىمنىڭ قولدانىسىن توقتاتۋ تۋرالى زاڭ قابىلدادى.

"كەلىسىمگە تاۋەلسىز پوستكەڭەستىك مەملەكەتتەردىڭ قالىپتاسۋ كەزەڭىندە سالىق سالۋ قاعيداتتارى مەن ەرەجەلەرىن بىرىزدەندىرۋ نەگىزىندە كەلىسىلگەن سالىق ساياساتىن جۇرگىزۋ ماقساتىندا قول قويىلدى. تاراپتار سول كەزدە تمد-عا قاتىسۋشى بارلىق مەملەكەتتەردىڭ مۇددەسىن قوزعايتىن نەگىزگى سالىقتاردىڭ بىرىڭعاي تىزبەسىن قولدانۋعا ۋاعدالاستى. بۇدان باسقا، تاراپتار كسرو-نىڭ شەت مەملەكەتتەرمەن تابىس پەن مۇلىككە قوسارلانعان سالىق سالۋدى بولدىرماۋ تۋرالى بۇرىن جاساسقان كەلىسىمدەرىنىڭ ورىندالۋىن قامتاماسىز ەتۋ ماسەلەسىن كەلىستى", - دەلىنگەن سەناتتىڭ قارجى جانە بيۋدجەت كوميتەتىنىڭ قورىتىندىسىندا.

كەلىسىمگە قول قويىلعان كۇننەن باستاپ 30 جىل وتكەندىكتەن، قۇجات وزەكتىلىگىن جوعالتقانى ايتىلدى. بۇدان باسقا، قۇجاتتىڭ مەرزىمىن ۇزارتۋ تۋرالى وتىنىمدەردىڭ بولماۋىنا بايلانىستى تمد مەملەكەتتەرى ونىڭ قولدانىسىن توقتاتۋ تۋرالى شەشىم قابىلدادى.

سەنات قابىلداعاننان كەيىن تمد-عا قاتىسۋشى ۇكىمەتتەر اراسىنداعى كەلىسىمنىڭ قولدانىسىن توقتاتۋ تۋرالى زاڭ قازاقستان پرەزيدەنتىنىڭ قول قويۋىنا جىبەرىلەدى.

Abai.kz