اقش مەملەكەتتىك دەپارتامەنتى مەملەكەتتىك حاتشىنىڭ ورتالىق جانە وڭتۇستىك ازيا بويىنشا كومەكشىسى دونالد لۋ اقش پەن ايماقتاعى قارىم-قاتىناستى نىعايتۋ ماقساتىندا 23-27 مامىر ارالىعىندا قىرعىزستان، وزبەكستان، تاجىكستان جانە قازاقستانعا بارادى دەپ مالىمدەدى. 

دەلەگاتسيا قۇرامىندا ۇلتتىق قاۋىپسىزدىك كەڭەسىنىڭ رەسەي جانە ورتالىق ازيا بويىنشا ديرەكتورى ەريك گرين، اقش قورعانىس ءمينيسترىنىڭ اۋعانستان، پاكىستان جانە ورتالىق ازيا بويىنشا كومەكشىسى رەبەككا تسيممەرمان، اقش-تىڭ حالىقارالىق دامۋ اگەنتتىگىنىڭ ازيا بويىنشا بيۋرو اكىمشىلىگى كومەكشىسىنىڭ ورىنباسارى اندجالي كاۋر جانە اقش-تىڭ دامۋدى قارجىلاندىرۋ كورپوراتسياسى اپپاراتىنىڭ ساياسات ماسەلەلەرى بويىنشا ورىنباسارى ناز ەل-حاتيب بار.

23 مامىردا قىرعىزستاننىڭ سىرتقى ىستەر ءمينيسترى جەەنبەك كۋلۋباەۆ بىشكەكتە اقش-تىڭ مەملەكەتتىك حاتشىسىنىڭ وڭتۇستىك جانە ورتالىق ازيا ىستەرى بويىنشا كومەكشىسى دونالد لۋمەن كەزدەسكەن. مەكەمە تاراتقان مالىمەتتە، وندا تاراپتار قىرعىز-امەريكا قارىم-قاتىناسى، ايماقتىق جانە عالامدىق ماسەلەلەردى تالقىلاعان.

"حالىقارالىق سانكتسيالاردىڭ قىرعىزستان ەكونوميكاسىنا تيگىزەتىن تەرىس اسەرىن ازايتۋ، شەكارا قاۋىپسىزدىگىنە كومەك كورسەتۋدى ارتتىرۋ ماسەلەلەرى قارالدى. "س5+1" پلاتفورماسى اياسىندا مەملەكەتتەردىڭ ءوزارا قارىم-قاتىناسىنىڭ ماڭىزدىلىعى اتاپ ءوتىلدى. كەزدەسۋ بارىسىندا كونسترۋكتيۆتى ديالوگتى ودان ءارى جالعاستىرۋعا نيەتتى ەكەنى ايتىلدى",- دەلىنگەن سىم تاراتقان مالىمەتتە.

دەلەگاتسيا وزبەكستاندا وزبەك ۇكىمەتى وكىلدەرىمەن، بيزنەس جانە ازاماتتىق قوعام بەلسەندىلەرىمەن كەزدەسەدى دەپ كۇتىلەدى.

تاجىكستاندا دەلەگاتسيا رەسمي وكىلدەرمەن كەزدەسىپ، اقش پەن تاجىكستاننىڭ جىل سايىن وتەتىن ەكى تاراپتى كەڭەسىنە قاتىسادى. دونالد لۋ اۋعان بوسقىندارىنا گۋمانيتارلىق كومەك كورسەتۋ ماسەلەسىن تالقىلاۋ ءۇشىن ازاماتتىق قوعام وكىلدەرىمەن كەزدەسپەك.

قازاقستاندا دەلەگاتسيا بيلىك وكىلدەرىمەن، ازاماتتىق قوعام ليدەرلەرىمەن كەزدەسىپ، ەلدەگى رەفورمالاردى، ادام قۇقىقتارىن قورعاۋ بويىنشا شارالاردى كۇشەيتۋدى جانە ايەل قۇقىقتارىمەن مۇمكىندىكتەرىن كەڭەيتۋدى تالقىلايدى.

Abai.kz