اقش پرەزيدەنتى دجو بايدەن ارنايى وپەراتسيا بارىسىندا اۋعانستاندا «ءال-كايدا» باسشىسى ايمان ءزاۆاحيريدىڭ كوزىن جويعاندارىن مالىمدەدى.

«ادىلدىك ورنادى، تەرروريستەردىڭ كوشباسىشىسى ەندى جوق. ءبىز ەشقاشان العان بەتىمىزدەن قايتپايمىز»،-دەدى بايدەن تەلەۇندەۋىندە.

ونىڭ ايتۋىنشا، امەريكالىق ارنايى جاساق بيىل ءزاۆاحيريدىڭ قايدا تۇرىپ جاتقانىن انىقتاعان.

اق ءۇي وكىلدەرىنىڭ مالىمەتىنشە، وتكەن جەكسەنبىدە اۋعانستان استاناسىندا زاۆاحيري تۇرىپ جاتقان ۇيگە سوققى جاسالعان.

سوڭعى بىرنەشە ايدا زاۆاحيري كابۋلداعى وسى ۇيدە تۇرىپ جاتقان. ارنايى جاساق ونىڭ بالكونعا شىققان ءساتىن اڭدىپ، سوققى جاساعان.

«ءال-كايدا» باسشىسىنىڭ كوزىن جويۋ ءۇشىن دروننان ەكى Hellfire زىمىرانى اتىلعان. سوققى جاساۋ كەزىندە ءزاۆاحيريدىڭ تۋىستارى دا، ۇيدە بولعان ادامدار مەن اينالاداعى بەيبىت جانداردىڭ ەش قايسىسى زارداپ شەكپەگەن.

Abai.kz