رەسەي ۋكرايناعا سوعىس اشقاننان كەيىن، رەسەيدىڭ اگرەسسياسىن قولداعاندار «Z» پەن «V» بەلگىسىن كورنەكى جەرلەرگە سالىپ، سوعىس ناسيحاتىن جۇرگىزە باستادى. اۋەلگى كەزدە سوعىستى قولداعان تەك رەسەيلىكتەر بولسا، قازىرگى كۇنى ەلىمىزدە دە ءپۋتيننىڭ ساياساتىنا باس ۇرعاندار ءوز كوزقاراستارىن اشىقتان-اشىق كورسەتىپ ءجۇر. ال، ەۋروپانىڭ كەيبىر ەلدەرى بۇل بەلگىلەرگە الدەقاشان تىيىم سالدى.

جاقىندا وسكەمەن قالاسىنداعى دۇكەندەردىڭ بىرىندە «Z» پەن «V» بەلگىسى سالىنعان فۋتبولكالاردىڭ ساتىلىپ جاتقانى تۋرالى الەۋمەتتىك جەلىدە جاڭالىق تارادى. بۇل تۋرالى جۋرناليست سىرىم يتقۇلوۆ جازعان بولاتىن.

«الماتىدا كولىك تەرەزەسىنە وسىنداي بەلگى جابىستىرعان جۇرگىزۋشىلەردى ۇستاپ جاتسا، وسكەمەندەگى دۇكەندەردىڭ بىرىندە مىناداي كيىمدەر ساتىلىپ جاتقانى تۋرالى فوتولار كەلدى. ايتارعا ءسوزىم جوق.

بۇل بىرەۋدىڭ ساياسي كوزقاراسىن بىلدىرەتىن جاي عانا ارىپتەر ەمەس، بۇل – سوعىستىڭ جانە وزگە ءبىر ەلگە باسىپ كىرۋدىڭ بەلگىسى. بۇل ءۇشىن جاۋاپكەرشىلىك قاراستىرىلۋى كەرەك.

رەسەيدە بۇل بەلگىدەن باس تارسا قاماۋعا الادى. ال دەپۋتاتتارى بولسا بالالارى VPN قولدانعان اتا-انالاردى تۇرمەگە قامايتىنىن ايتىپ قورقىتىپ جاتىر»، - دەپ جازدى ول.

وسىدان كەيىن ءتيىستى ورگان قىزمەتكەرلەرى دۇكەندەگى «Z» پەن «V» بەلگىسى سالىنعان تاۋاردى ساتىلىمنان الدىرىپ تاستادى.

بۇعان دەيىن كولىكتەرىنە «Z» بەلگىسىن سالىپ العان رەسەيلىكتەردىڭ پاۆلودار وبلىسىنداعى جاسىباي دەمالىس ورنىنا كەلگەنى تۋرالى بەينەجازبا «تيپيچنىي پاۆلودار» تەلەگرام ارناسىندا جاريالاندى. رەسەيلىك تۋريستەردىڭ بۇل قىلىعى جەرگىلىكتى تۇرعىنداردىڭ شامىنا ءتيدى. ال، وزدەرىنىڭ ارەكەتىنەن «ەش وعاشتىق كورمەگەن» رەسەي تۋريستەرى بولسا، قازاقستاندىقتاردىڭ نارازىلىعىنا قارسى داۋ ايتتى.

«ءبىز پاۆلودار وبلىسىنىڭ اۋماعىندامىز. جاسىباي كۋرورتتىق ايماعىنا كەلگەن رەسەيلىكتەرمىز. ءبىزدى مۇندا تىم ناشار قارسى الدى. كولىگىمىزدىڭ تەرەزەسىندەگى «Z» بەلگىسىن كورگەن جەرگىلىكتى ازاماتتار بىزگە تارپا باس سالدى. ولار ءبىزدى «ۋكرايناعا شابۋىلدادىڭدار» دەپ ايىپتادى، مىنا تۇرعان اۆتوبۋستىڭ جۇرگىزۋشىسى «بۇل جەردە سەندەردى ەشكىم قۋانا قارسى المايدى، بۇل جەردەن كەتىڭدەر!» دەدى. مەن بۇل ۆيدەونى بۇكىل قازاقستاندىقتاردىڭ كورگەنىن قالايمىن. پاۆلودار وبلىسىندا وسىنداي اگرەسسيۆتى ادامداردىڭ بارىن ءبىلىپ جۇرىڭىزدەر»، - دەپ شاعىمداندى رەسەيلىك تۋريست.

قازاقستاندا «Z» پەن «V» بەلگىسىنە رەسمي تىيىم سالىنعان جوق. دەگەنمەن وسى كۇنگە دەيىن اتالعان بەلگىلەردى كولىكتەرىنە جابىستىرىپ العان ازاماتتارعا اكىمشىلىك قۇقىق بۇزۋ بابى بويىنشا ايىپپۇلدار سالىندى.

ايجان تەمىرحان 

Abai.kz