"باستان باعىڭ تايماسىن" دەيدى قازاق. ماسەلە قانداي باقتا؟ بىرەۋدىڭ باعىن تارتىپ الىپ، باقىتتى بولۋعا بولا ما؟ بولمايدى. 

ءماجىلىستىڭ بۇرىنعى سپيكەرى نۇرلان نىعماتۋلين مەن ونىڭ ءسىڭارىى ەرلان نىعماتۋلليندەر تالاي جاندى زارلاتىپ، تالاي ادامنىڭ باعىن باسىنان تايدىرىپ، رەيدەرلىك ارەكەتكە قاتىسى بولعان دەيدى كەي اقپارات كوزدەرى. ال قازتاگتىڭ جازۋى بويىنشا، ولار وسى ايىپ نەگىزىندە قىلمىستىق ءىس فيگۋرانتتارى اتانعان.

«بالقاش وقيعاسىنا كەلسەك، ەكى ءىرى كاسىپكەردىڭ قارىم-قاتىناسى جەمقورلىققا قارسى قىزمەتتىڭ ورتالىق اپپاراتى تەرگەپ جاتقان قىلمىستىق ءىس اياسىندا قارالۋدا. ول 2022 جىلدىڭ ساۋىرىندە قوزعالدى. وسى ءىس اياسىندا سۇلتانبەكوۆ جابىرلەنۋشى دەپ تانىلدى. تەرگەۋ توبى قۇرىلدى. بۇل ءىستىڭ ءبىر بولىگى رەتىندە نىعماتۋليندەردىڭ قاتىسى، ولاردىڭ ىقپالى، پاتروناتتىعى ءدال سولاي باعالانىپ، تەرگەلۋدە», - دەدى استانالىق ادۆوكاتتار القاسىنىڭ ادۆوكاتى ماۋلەن الىمباەۆ.

2012 جىلى ەل ىشىندە ەرلان نىعماتۋلين مەن كاسىپكەر قۋات سۇلتانبەكوۆ اراسىندا جانجال بولعانى جايلى اقپاراتتار شىققان بولاتىن. جانجالدان كەيىن بالقاشتىق كاسىپكەر قۋات سۇلتانبەكوۆ سوتتالىپ، 21 جىلعا باس بوستاندىعىنان ايىرىلدى. ول 10 جىلىن تۇرمەدە وتكىزىپ شىقتى.

قاراعاندى ​​وبلىسى كاسىپكەرلەر پالاتاسىنىڭ وڭىرلىك كەڭەسىنىڭ مۇشەسى نيكولاي ابتتىڭ ايتۋىنشا قۋات سۇلتانبەكوۆتىڭ تەمىر تورعا تۇسۋىنە ونىڭ جەمقورلىقپەن بەلسەندى تۇردە كۇرەسۋى سەبەپكەر بولۋى ىقتيمال. ال كەيىن پروكۋراتۋرا قالانى اباتتاندىرۋ، كوشەت ەگۋ مەن گۇلدەندىرۋ جۇمىستارىنا قاتىستى ورەسكەل زاڭ بۇزۋشىلىقتى انىقتاعان.

ارتىنشا 2012 جىلدىڭ 27 قاڭتارىندا بالقاشتان استاناعا كەلە جاتقان جولدا سۇلتانبەكوۆ زاڭسىز قارۋ ساقتادى جانە الىپ ءجۇردى دەگەن كۇدىكپەن ۇستالدى. بۇل سايكەستىك پە؟ تەرگەۋ بار بولعانى التى كۇنگە سوزىلىپ، كاسىپكەر 3,5 جىلعا باس بوستاندىعىنان ايىرىلدى. كەيىن ول ءىس بىرنەشە مارتە قارالىپ، 21 جىلعا سوتتاۋ مەرزىمىنە وزگەرتىلدى. سۇلتانبەكوۆتى ۇزاق جىلعا وتىرعىزۋ ءۇشىن تاعى بەس قىلمىستىق ءىس قوزعالعان دەيدى اقپارات كوزدەرى. 2022 جىلى 10 جىل تۇرمەدە وتىرعاننان كەيىن كاسىپكەرگە قاتىستى ءۇش قىلمىستىق ءىس قارالىپ، ول اقتالىپ، بوساتىلدى. جابىرلەنۋشىنىڭ ادۆوكاتى يۋليا دجافاروۆانىڭ ايتۋىنشا، سۇلتانبەكوۆكە قاتىستى بارلىق ايىپتار ويدان شىعارىلعان ەكەن.

مىنە، ەندى وسى ءىس قايتا اقپارات كوزدەرىنە شىعىپ، نىعماتۋليندەرگە قاتىستى تىڭ دەرەكتەر جارىق كورۋدە.

Abai.kz