الدىڭعى جولى جازعانىمداي، شامالاۋىمشا 2019-دىڭ باسىنان باستاپ بولۋ كەرەك، كاسىبي جالاقورلاردىڭ نىساناسىنا اينالا باستادىم. باستاپقىدا، جازبالارى قاتەدەن كوز تۇناتىن، وڭشەڭ ساۋاتسىز ءارى اۋزىنا نە كەلسە سونى ايتاتىن ادامدار تاسادان تۇرىپ تاس اتا باستاعاندا “ە سولاردى قويشى، ەسى دۇرىس ادام وسىندايعا سەنە مە”، دەپ كوڭىل بولمەگەم.

كەيىننەن بۇلار توپتاسىپ، كادىمگىدەي قارا كۇشكە اينالا باستادى. ارتىنان ءبىرىنىڭ تىرسەگىن ءبىرى شايناپ، ءوزارا قىرقىسىپ بارىپ جويىلدى، بىلەم، قازىر قاراسى كورىنبەيدى. بىراق، الەۋمەتتىك جەلى، سونىڭ ىشىندە يۋتۋبتا قۇسىپ تاستاعان ۆيدەولارى كۇنى بۇگىنگە دەيىن بار. اندا-ساندا اۋىلدىق جەرلەرگە بارا قالعاندا، ەل-جۇرت “سول ۆيدەودا ءسىز تۋرالى ءبۇي دەدى، نە ايتاسىز”، دەپ سۇرايتىن كەزدەرى دە بولادى.

ياعني، بۇلاردى ءبىز ەلەپ-ەسكەرمەگەنىمىزبەن، قاراپايىم اۋىل تۇرعىندارى تاراپىنان مۇنداي ساپاسىز دۇنيەلەرگە دە سۇرانىس بار دەگەن ءسوز!

ونىڭ ۇستىنە قازىر ەلگە تانىمال تۇلعالار، كەيبىر ساياساتكەر دەپ جۇرگەن اعالارىمىز دا قازاقتىلدى ورتادا وسى ءتاسىلدى قولداناتىن بولدى. “اناۋ ساتقىن، اناۋ دا ساتقىن، جالعىز مەن عانا كۇرەسكەر”، دەگەن قىپ-قىزىل پوپۋليزم، ولاردىڭ كۇندەلىكتى ريتوريكاسىنا اينالدى.

سەبەپ نە؟ سەبەپ بىرەۋ! قازاقتىلدى ورتا كۇشكە، كۇش بولعاندا دا وتە ۇلكەن كۇشكە اينالدى! ال ول ورتاعا وتەتىن اڭگىمە جوعارىدا ايتىلعانداي “جاپتىم جالا، جاقتىم كۇيە”، دەپ ويلايدى ولار.

بۇدان شىعاتىن قورىتىندى : جالاقورلار مەن بالەقورلارعا زاڭ جۇزىندە توسقاۋىل قويىپ ۇيرەنۋىمىز كەرەك. قالاي، قايتىپ؟ ونى كۇنى ەرتەڭ باستالاتىن مەنىڭ سوت پروتسەسىمنەن كورە الاسىزدار.

«نەگە ءبىز ءوزىمىز كۇرەسۋىمىز كەرەك؟ مەملەكەت نەگە شارا قولدانبايدى؟» دەرسىز. سەبەبى جالا جابۋ مەن قورلاۋ، ول تەك جەكە ادامعا باعىتتالادى. ەگەر سول ادام «مەنىڭ ار-نامىسىما ءتيدى»، دەپ ءوزى قۇقىق قورعاۋ ورگاندارى مەن سوتقا ارىزدانباسا، وندا مەملەكەت ءوز باستاماسىمەن بۇل پروتسەسكە ارالاسا المايدى.

ال ەندى ءجاي قىزىق ءۇشىن كورەم دەۋشىلەر پوپكورندارىڭدى دايىنداپ قويىڭدار، بۇل ءبىر ەمەس، بىرنەشە سەرياعا سوزىلادى دەپ ويلايمىن.

ابزال قۇسپان

Abai.kz