پرەزيدەنت توقاەۆ حالىققا كەزەكتى جولداۋىندا كەزەكتەن تىس پرەزيدەنتتىك سايلاۋدى جاريالادى. ول 2022 جىلدىڭ كۇزىندە وتەتىن بولدى. 

"مەن بيىلعى كۇزدە كەزەكتەن تىس پرەزيدەنت سايلاۋىن وتكىزۋدى ۇسىنامىن. ادىلەتتى قازاقستاندى قۇرۋ جولىندا تۇبەگەيلى جانە جان-جاقتى رەفورمالاردى تابىستى جۇزەگە اسىرۋ ءۇشىن حالىقتىڭ جاڭا سەنىم مانداتى قاجەت.

مەن ءۇشىن مەملەكەت مۇددەسى بارىنەن بيىك. سوندىقتان مەن وكىلەتتىك مەرزىمىمدى قىسقارتۋعا جانە كەزەكتەن تىس پرەزيدەنت سايلاۋىنا بارۋعا دايىنمىن.

سونداي-اق، مەن كوپ ويلانىپ، پرەزيدەنت وكىلەتتىگى مەرزىمدەرىنىڭ سانىن جانە ۇزاقتىعىن قايتا قاراۋ قاجەت دەگەن بايلامعا كەلدىم. پرەزيدەنت مانداتىن ۇزاقتىعى 7 جىلدىق ءبىر مەرزىممەن شەكتەۋدى ۇسىنامىن. بىراق قايتا سايلانۋعا تىيىم سالىنادى", - دەدى پرەزيدەنت.

ساراپشىلاردىڭ ايتۋىنشا، پرەزيدەنت سايلاۋى قاراشا ايىندا ءوتۋى ىقتيمال. سوندىقتان دا قازىردىڭ وزىندە كانديداتتاردىڭ كىم بولۋى مۇمكىن دەگەن تاقىرىپ قىزىقتى. حالىق بۇل سۇراقتى قىزۋ تالقىلاپ جاتىر.

مۇحتار تايجان سايلاۋعا ءتۇسۋى ىقتيمال دەيتىندەر سانى جەتەرلىك. مۇحتار تايجان جەر ماسەلەسىن كوتەرىپ، "جەر قورعانى" اتتى پارتيا قۇرۋعا ۇمتىلۋدا. پارتيانى تىركەۋ ءالى ىسكە اسپادى، الايدا ونىڭ قوعامدىق قوزعالىس اتىنان ءتۇسۋ مۇمكىندىگى بار.

تاعى ءبىر كانديدات رەتىندە ءوزىن ۇسىنۋى مۇمكىن دەگەندەردىڭ ىشىندە مارعۇلان سەيسەمباي بار. سوڭعى جىلدارى ساياسي ماسەلەلەردى كوتەرىپ، كاسىپكەرلىك سالادا ءدارىس بەرىپ جۇرگەن مارعۇلان سەيسەمباي، بيلىكتەگى ولقىلىقتار جايلى ويىن وتكىر ايتىپ جۇرگەندەردىڭ ءبىرى.

تاعى ءبىر كانديدات رەتىندە يمانعالي تاسماعامبەتوۆ ءتۇسۋى مۇمكىن دەيدى جۇرت. ەل ىشىندە ايتارلىقتاي قولداۋعا يە، سالماقتى ساياساتكەر سانالاتىن تاسماعامبەتوۆ سوڭعى جىلدارى ساياسي ساحنادا كوپ كورىنبەيدى. الايدا بۇل سايلاۋدا ءوز باعىن سىناپ كورۋى عاجاپ ەمەس.

كاسىپكەر ءارى "قازاتومپروم" باسشىسى بولعان، كەيىن ءىستى بولىپ، ون جىلىن اباقتىدا وتكىزگەن مۇحتار جاكىشەۆتى دە كانديداتتار قاتارىنان كورگىسى كەلەتىندەر بار. الايدا جاكىشەۆ ۇلكەن ساياساتتان كەتكەنىن ايتقان ەدى.

وزگە دە كانديداتتاردىڭ بولارى انىق. سانجار بوقاەۆ، بەيبىت الىبەكوۆ، توعجان قوجاليەۆا جانە تاعى باسقا جاندار ءوز باعىن سىناپ كورەتىنى ايقىن. كانديدات رەتىندە وزدەرى تۇسپەسە دە، قانداي دا ءبىر قوزعالىس اتىنان جاقتاستارىن ءتۇسىرىپ، ساياسي باسەكەدە بوي كورسەتۋى ىقتيمال.

ال پرەزيدەنت توقاەۆ قانداي پارتيا نەمەسە قوزعالىس اتىنان تۇسپەك؟ ءساۋىر ايىندا "امانات" پارتياسىنىڭ توراعالىعىنان كەتىپ، پارتيادان شىققانىن توقاەۆ مالىمدەگەن بولاتىن. ءبىر سوزبەن ايتقاندا كۇز "ىستىق" بولادى.

Abai.kz