بەيسەنبى, 28 ناۋرىز 2024
اقمىلتىق 3657 7 پىكىر 6 قىركۇيەك, 2022 ساعات 13:10

قىتاي توراعاسى قازاقستانعا نە ءۇشىن كەلە جاتىر؟

14 قىركۇيەكتە قىتاي توراعاسى شي جيپيڭ پرەزيدەنت قاسىم-جومارت توقاەۆتىڭ شاقىرتۋىمەن قازاقستانعا رەسمي ساپارمەن كەلەدى. بۇل تۋرالى ءسىم رەسمي وكىلى ايبەك سمادياروۆ مالىمدەدى.

ساپار اياسىندا مەملەكەت باسشىلارى كەلىسسوز جۇرگىزىپ، ەكىجاقتى بىرقاتار قۇجاتقا قول قويىلادى دەپ جوسپارلانىپ وتىر.

ءسىم وكىلىنىڭ ايتۋىنشا، ساپار قازاقستان مەن قىتاي اراسىنداعى جان-جاقتى ستراتەگيالىق ارىپتەستىكتى ودان ءارى تەرەڭدەتۋ، ساياسي، ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى دامىتۋعا باعىتتالعان.

بۇعان دەيىن سوڭعى ءبىر جىل ىشىندە قازاقستانعا قىتاي حالىق رەسپۋبليكاسى مەملەكەتتىك كەڭەسىنىڭ مۇشەسى، سىرتقى ىستەر ءمينيسترى ۆان ي, قورعانىس ءمينيسترى ۆەي فەنحەن كەلىپ كەتكەن.

قىتاي سىرتقى ىستەر مينيسترىمەن كەزدەسۋ بارىسىندا مەملەكەت باسشىسى قحر توراعاسى سي ءتسزينپيننىڭ الداعى كۇزدە ەلىمىزگە جوسپارلانعان مەملەكەتتىك ساپارى بارىن ايتقان بولاتىن. پرەزيدەنت ساپاردىڭ ەكىجاقتى قاتىناستاردى دامىتۋعا تىڭ سەرپىن بەرەدى دەپ ۇمىتتەنەتىنىن جەتكىزدى.

«بيىل – وتە ماڭىزدى جىل. قازاقستان مەن قىتاي اراسىنداعى ديپلوماتيالىق قاتىناستاردىڭ ورناعانىنا 30 جىل تولدى. قىتايدا كوممۋنيستىك پارتيانىڭ حح سەزىن وتكىزۋ جوسپارلانعان. الداعى جوعارى دەڭگەيدەگى كەلىسسوزدەر ءبىزدىڭ ستراتەگيالىق سەرىكتەستىگىمىزدىڭ جىلناماسىنا ەرەكشە وقيعا رەتىندە جازىلادى»، – دەگەن ەدى پرەزيدەنت.

اراعا ءبىراز جىل سالىپ قازاقستانعا ساپارلاتقالى وتىرعان قىتاي توراعاسىنىڭ بۇل جولعى كەلىسى نەنى بىلدىرەدى؟

ءومارالى ادىلبەكۇلى:

- قىتاي توراعاسى شي جيپيڭ پاندەميا باستالعالى ورتا ازياعا ءبىرىنشى رەت كەلە جاتىر. ول 14 قىركۇيەك كۇنى ەلورداعا كەلەدى، ودان كەيىن 15-16 قىركۇيەكتە سامارقاندا وتەتىن «شانحاي» ىنتىماقتاستىق ۇيىمىنىڭ سامميتىنە قاتىسادى. سامميتكە رەسەي پرەزيدەنتى كەلەدى دەپ كۇتىلىپ وتىر. شي ءجيپيڭنىڭ الدىمەن ءبىزدىڭ ەلىمىزگە كەلۋى قىتاي مەن قازاقستاننىڭ اراسىنداعى ىنتىماقتاستىقتىڭ ءبىرشاما جاقسى ەكەنىن بىلدىرەدى.

وزدەرىڭىز بىلەسىزدەر، پاندەميا باستالعالى قىتاي مەن قازاقستاننىڭ شەكاراسى جابىلىپ قالدى. دەگەنمەن قازاقستان تمد ەلدەرى، ەۋرووداق ەلدەرىمەن، تۇرىك ەلىمەن، يسلام ەلدەرىمەن شەكاراسىن جاپقان جوق. قىتايمەن شەكارانىڭ جابىلۋى قازاقستان تاراپىنان جاسالعان ءوتىنىش دەپ ايتىلىپ ءجۇر. سول ۋاقىتتا قىتايمەن اراداعى تەمىر جول جابىلىپ، كوپتەگەن تاۋار تاسيتىن ۆاگوندار جول ورتاسىندا تۇرىپ قالدى. تاۋار دىتتەگەن جەرىنە جەتپەدى. كەيىن قىتاي پرەمەر-ءمينيسترىنىڭ ورىنباسارى قازاقستانعا كەلىپ، ماسەلە شەشىلگەن. قازىر ەكى ەلدىڭ تاۋار اينالىمىندا قيىندىق جوق.

شىلدەنىڭ بىرىنەن باستاپ ەكى ەل اراسىنداعى اۋە قاتىناسى رەتتەلدى. اپتاسىنا ەكى رەت رەيس بار. بىراق، بيلەت قۇنى وتە قىمبات. قازىر قازاقستاندا قىتايدان كەلگەن 20 مىڭداي ادام قايتا الماي وتىر. ونىڭ 90 پايىزى ءوزىمىزدىڭ قانداستار.

ودان كەيىن، قىتايمەن شەكارادا ەرتىس، ىلە وزەندەرى اعادى. وسى توڭىرەكتەگى جىلدار بويى قوردالانعان ماسەلەلەر بار. مىنەكەي، وسى ايتىلعان ماسەلەلەر قىتاي توراعاسىمەن كەزدەسۋدەن كەيىن بىرجاقتى بولاتىن شىعار دەپ ويلايمىن.

ايجان تەمىرحان

Abai.kz

7 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2253
عيبىرات

قايسار رۋحتى عازيز جان

مۇحتار قۇل-مۇحاممەد 3511