The New York Times (NYT) باسىلىمى اقش بارلاۋ قىزمەتىنىڭ ەسەبىنە سۇيەنە وتىرىپ، رەسەي كحدر-دان «ميلليونداعان ارتيللەريالىق سناريادتار مەن زىمىرانداردى» ساتىپ الماق دەپ جازدى. اقش ۇكىمەتىنىڭ ايتۋىنشا، بۇل سانكتسيالار رەسەي ارمياسى ءۇشىن وق-ءدارى جەتكىزۋ تىزبەگىن «قاتاڭ شەكتەگەنىن» كورسەتىپ وتىر. 

امەريكا قۇراما شتاتتارى بارلاۋ قىزمەتتەرى سولتۇستىك كورەيادان رەسەيگە قانداي قارۋ ءتۇرى كەلەتىنىن ناقتىلاماعان  جانە جەتكىزۋ مەرزىمىن دە ايتپاعان. اتى-ءجونىن اتاماعان امەريكالىق شەنەۋنىك رەسەيدىڭ قىسقا قاشىقتىقتاعى زىمىراندار مەن ارتيللەريالىق سناريادتار ساتىپ الىپ جاتقانىن، سونىمەن قاتار سولتۇستىك كورەيادان «قوسىمشا قارۋ تۇرلەرىن» ساتىپ الۋى كۇتىلىپ وتىرعانىن ايتقان. الايدا ناقتى قانداي قارۋ ەكەنىن ايتپاعان.

سولتۇستىك كورەيا 152 مم ارتيللەريالىق سناريادتار مەن كاتيۋشا زىمىراندارىن شىعارادى. بۇل تۋرالى American Enterprise Institute بىرنەشە ماقالا جازعان بولاتىن. NYT باسىلىمىنىڭ اقپاراتىنا سەنسەك رەسەيدىڭ بۇل قادامى امالسىزدان بولىپ جاتقان ارەكەت ەكەنىن كورسەتەدى. ماسكەۋ سانكتسيا قۇشاعىندا جاتقان سولتۇستىك كورەيا مەن يراننان قارۋ الۋعا ءمجابۇر، ەسەسىنە تەگەران مەن پحەنيان وزىنە ءتيىمدى شارتتاردى ماسكەۋگە تالاپ رەتىندە قويا الادى. مىسالى ەكونوميكالىق قولداۋ نەمەسە رەسەيدىڭ ۇشاقتارىن الۋ ماسەلەسى قاراستىرىلۋى مۇمكىن. سولتۇستىك كورەيادان كەز كەلگەن قارۋدى ساتىپ الۋ بۇۇ قارارىنا قارسى ارەكەت بولسا دا، ماسكەۋ امالسىزدان بۇل قادامعا بارىپ وتىر دەيدى باسىلىم.

بۇعان دەيىن Washington Post (WP) گازەتى تامىز ايىندا رەسەي يراندىق درونداردىڭ ءبىرىنشى پارتياسىن العانىن حابارلادى. باسىلىمنىڭ حابارلاۋىنشا، كەم دەگەندە ەكى ءتۇرلى درون رەسەيگە جەتكىزىلگەن. ولار سوققى جاساۋ جانە بارلاۋ سالاسىنداعى موحادجەر-6 جانە شاحەد دروندارى. باسىلىم رەسەيلىك اسكەريلەر درونداردى سىناقتان وتكىزۋ كەزىندە كوپتەگەن تەحنيكالىق اقاۋلارعا تاپ بولعانىن دا جازدى. اقش يراننان درون الۋ مەن ونى سوعىسقا قولدانۋعا بايلانىستى ماسكەۋ مەن تەگەرانعا بىردەي قاتاڭ سانكتسيا سالاتىنىن جەتكىزگەن بولاتىن.

باتىس ەلدەرى سالعان سانكتسيالار رەسەيدىڭ اسكەري پوتەنتسيالىن ەداۋىر ازايتتى. رەسەي ۋكراينا مايدانىندا مىڭداعان تەحنيكاسى مەن ون مىڭداعان اسكەرىنەن ايىرىلىپ، ونىڭ ورنىن تولتىرۋ مۇمكىندىكتەرىن ىزدەستىرۋدە. الەم ەلدەرى باتىس سانكتسياسىنا ۇشىراماۋ ءۇشىن، رەسەيگە قارۋ ساتۋعا نيەتتى ەمەس. رەسەي قارۋدى ونسىز دا سانكتسيادا جاتقان ەلدەردەن قۇپيا تۇردە الۋعا ءماجبۇر.

Abai.kz