ۋكراينا اسكەرى حاركوۆ وبلىسىندا قارسى شابۋىلعا شىعىپ، قارسىلاسىن ىعىستىرىپ بارادى. شابۋىل اسا مۇقيات دايىندالعان جانە ءساتتى ىسكە اسۋدا دەيدى ماماندار. 

ۋكراينا باسقىنشىدان جەرىن ازات ەتۋ وپەراتسيالارىن بىرنەشە اي بويى دايىنداۋدا. قازىرگى ارەكەتىن تولىققاندى قارسى شابۋىل دەۋگە كەلمەيدى دەيدى ماماندار. بۇل قاندى سوعىس الدىنداعى جاۋ شەبىنىڭ وسال تۇسىن انىقتاۋ ارەكەتتەرى دەگەندى ايتۋدا. الايدا قازىردىڭ وزىندە ۋكراينا اسكەرى بىرنەشە ماڭىزدى ەلدى-مەكەندى ازات ەتىپ، اسا ماڭىزدى جول توراپتارىن ءوز باقىلاۋىنا الۋدا.

ۋكراينا اسكەرى وڭتۇستىك ايماعىن تولىق ازات ەتەمىز دەگەن اقپاراتتى تاراتقانىنا بىرنەگە اي بولدى. جۇيەلى، جويقىن شابۋىل حەرسون ماڭىندا ىسكە اسادى دەپ بولجام جاسالدى. حەرسون ماڭىنداعى اسكەري نىساندار، ءۇش ماڭىزدى كوپىر مەن شتابتارعا زىمىرانمەن كۇنى-ءتۇنى سوققى جاسالدى. تامىز ايىنىڭ سوڭىندا ۋكراينا حەرسون ايماعىندا بىرنەشە باعىتتا شابۋىلعا شىعىپ، رەسەي اسكەرى ابدىراپ قالدى. ماسكەۋ دەرەۋ ارادا حەرسونعا ەكى باعىتتا كومەك جىبەرۋ شەشىمىن قابىلدادى. اسكەري تەحنيكانى وككۋپاتسياداعى قىرىمنان اكەلسە، جاياۋ اسكەردى حاركوۆ پەن دونباسس ماڭىنان تاپتى. وسىلايشا حاركوۆ پەن دونباسستاعى اسكەردىڭ ءبىر بولىگى حەرسون ماڭىنا جىبەرىلدى. بۇل حاركوۆ ماڭىنداعى رەسەي قورعانىسىنا كەرى اسەرىن تيگىزگەنى انىق.

ۋكراينا اسكەرى رەسەيدىڭ بارلىق نازارى حەرسونعا اۋعان ساتتە، حاركوۆ باعىتىندا شابۋىلعا شىعىپ، ماڭىزدى بالاكلەيا قالاسىن قورشاۋعا الدى. وسى ارقىلى رەسەيدىڭ بىرنەشە مىڭ اسكەرى تولىق قورشاۋدا قالۋ قاۋپى تۇر. بۇل ماقساتتى ىسكە اسىرۋ ءۇشىن ۋكراينا اسكەرى يزيۋم باعىتىندا دا شابۋىلدى كۇشەيتىپ، ەكى جاقتان قىسىمدى ارتتىرۋدا. بالاكلەيا باعىتىندا بىرنەشە اۋىلدى قايتارىپ، قالانىڭ ىشىنە ۋكراين جاساقتارى كىرگەنى جايلى اقپارات بار. الايدا اقپاراتتى قورعانىس مينيسترلىگى نە راستامادى، نە جوققا شىعارمادى.

ۋكراينا شابۋىل پوتەنتسيالىن ارتتىرۋ ماقساتىندا باتىستىق سەرىكتەستەرىنەن قارۋ مەن زىمىرانداردى ۇزبەي جەتكىزۋدى سۇراپ وتىر. بۇگىن اقش ۋكرايناعا كەزەكتى اسەري كومەك پاكەتىن جاريالايدى. ونىڭ قۇنى 675 ملن دوللار. كومەك رەتىندە زىمىراندار مەن سناريادتار بەرىلمەك.

بۇگىن گەرمانيانىڭ "رامشتاين" بازاسىندا ۋكرايناعا كومەك بەرۋ ماقساتىنداعى كەزەكتى كەزدەسۋ وتەدى. وعان اقش قورعانىس ءمينيسترى دە قاتىسپاق. تاراپتار قانداي قارۋ بەرەتىنىن، ۋكراينانى قالاي قولدايتىنىن تاعى دا كەڭەسىپ، تالقىلايدى.

اسكەري وپەراتسيالار جۇرگىزۋ بويىنشا ۇلكەن تاجىريبەگە يە فرانتسيا گەنەرالى دومينيك ترينكۆان بىلاي دەيدى: "رەسەيلىكتەر ۋكراين ساربازدارى قولدانىپ جۇرگەن تاكتيكاعا تاڭدانىسپەن قاراعانى انىق. ۋكراينا رەسەيلىك بازالاردى، قويمالاردى، اسكەري شتابتار مەن جەتكىزۋ جولدارىن جويۋ ارقىلى رەسەيدىڭ وسى ماڭداعى اسكەرىن ەسەنگىرەتىپ تاستاعانى  بەلگىلى.  ەندى دنەپردىڭ باتىسىنداعى رەسەي اسكەرى جەتكىلىكتى وق-ءدارى الماسا، وندا قورعانۋ پوتەنتسيالى تومەندەيدى. بۇل ءبىراز اسكەري بولىمشەنىڭ جاعدايىن ناشارلاتىپ، تالقاندالۋىنا اكەلەدى. ۋكراينا وسىلايشا حەرسوندى قسىقا دەيىن قايتارۋى مۇمكىن".

حەرسونداعى باسقىنشى اكىمشىلىگى دە بقل قاۋىپتى سەزەتىندەي. ءبىر اپتا بقرىن حەرسون بويىنشا پسەۆدورەفەرەندۋم وتكىزۋ بويىنشا جاسالعان ءىس-شارالاردى ۋاقىتشا توقتاتتى.

Abai.kz