فورۋمعا بارىپ، «قا-زاق-ستان! قا-زاق-ستان!» دەپ داۋسى قارلىققانشا ايقايلاعاننىڭ ءبارى پاتريوت پا؟

مەنىڭ ويىمشا، جوق.

پاتريوت بولۋ ءۇشىن كەۋدەڭدى توقپاقتاپ، «مەن ءوز ەلىمنىڭ پاتريوتىمىن!» دەپ ايقايلاۋدىڭ قاجەتى جوق. ۇندەمەي-اق، داۋىس شىعارماي-اق پاتريوت بولۋعا بولادى. ول ءۇشىن ءسوزىڭ مەن ءىسىڭ سايكەس كەلۋ كەرەك. ىسىڭمەن دالەلدەۋىڭ كەرەك.
مەيلى، ول تاۋ قوپارىپ تاستاماسا دا، كىشكەنتاي عانا ىسپەن پاتريوت بولا الادى.

مەنىڭ تۇسىنىگىمدە، پاتريوت دەگەنىمىز:
1. قوقىستى ەسىكتىڭ الدىنا تاستاپ كەتپەي، ەرىنبەي بارىپ قوقىس جاشىگىنە تاستايتىن ادام – ناعىز پاتريوت!
2. كوشەدە كەتىپ بارا جاتىپ، نەمەسە ماشينانىڭ ەسىگىن اشىپ، بىلش ەتكىزىپ تۇكىرمەيتىن ادام - ناعىز پاتريوت!
3. اۋلالارعا، پاركتەرگە قويىلعان ورىندىقتاردى سىندىرماي، ءوزىنىڭ جەكە مۇلكى سياقتى قارايتىن ادام - ناعىز پاتريوت!
4. بيۋدجەتتەن اقشا جىمقىرماي، ۇرلاماي، حالىقتىڭ يگىلىگىنە جۇمسايتىن ادام - ناعىز پاتريوت!
5. اۋرۋ بالالاردىڭ ەمىنە بولىنگەن اقشانى جەمەي، كەرىسىنشە شىرىلداپ سولاردىڭ جاعدايىن ويلايتىن ادام - ناعىز پاتريوت!
6. جولعا دەپ بولىنگەن اقشانى جىمقىرماي، «حالقىم ءتۇزۋ، ادەمى جولمەن ءجۇرسىنشى. جولدا اپات بولماسىنشى. ادام قايتىس بولماسىنشى» دەپ ويلاي الاتىن ادام - ناعىز پاتريوت!
7. الدىنا جانى شىرقىراپ ناۋقاس كەلگەندە، اقشانى ويلاماي، «وسى ادام جاقسى بولىپ كەتسىنشى، كومەكتەسەيىنشى» دەپ قولىنان كەلگەن كومەگىن ايامايتىن دارىگەر - ناعىز پاتريوت!
8. ءوزىنىڭ انا ءتىلى بولا تۇرا، قوجايىنىنىڭ تىلىندە شۇلدىرلەمەي، ءوز انا ءتىلىنىڭ بولاشاعىن ويلايتىن ادام - ناعىز پاتريوت!

سوندا بىزدە ەلىن، جەرىن، حالقىن ەرەكشە سۇيەتىن ناعىز پاتريوتتار از با، كوپ پە، بىلمەيمىن.

دانيار ەسەن

Abai.kz