"7-20-25" تۇرعىن ءۇي باعدارلاماسى جاڭا جىلدان كەيىن جالعاسىن تابۋى مۇمكىن. "باعدارلامانى ىسكە اسىرۋعا بولىنگەن قاراجات وسى جىلدىڭ سوڭىندا ەمەس، 2023 جىلى تولىعىمەن يگەرىلەدى" دەگەن بولجام جاسادى ۇلتتىق بانك.  

"قاراجاتتى يگەرۋ قارقىنى حالىقتىڭ باسپاناعا سۇرانىسى مەن باعدارلاما اياسىندا ساتىلاتىن جاڭا تۇرعىن ۇيلەردى پايدالانۋعا بەرۋ كولەمىنە بايلانىستى. قازىرگى قارقىندى ەسكەرە وتىرىپ، ماقساتتى قاراجات 2023 جىلدىڭ ىشىندە يگەرىلۋى مۇمكىن دەپ بولجاۋعا بولادى", - دەدى ۇلتتىق بانك.

ەكىنشى دەڭگەيلى بانكتەرگە "7-20-25" باعدارلاماسى ىسكە قوسىلعالى بەرى 300 مىڭنان استام ءوتىنىم تۇسكەن.

27 قازانداعى جاعداي بويىنشا قازاقستاندىقتارعا 745,5 ملرد تەڭگەگە 56 996 قارىز بەرىلدى. ءالى يگەرىلمەگەن 250 ملرد تەڭگەدەن استام اقشا بار.

بۇعان دەيىن ۇكىمەت "7-20-25" باعدارلاماسى وسى جىلدىڭ سوڭىندا جابىلۋى مۇمكىن ەكەنىن ەسكەرتكەن ەدى. سەبەبى ليميت تاۋسىلۋعا جاقىن. وسىعان بايلانىستى ۋاكىلەتتى ورگاندار قازاقستاندىقتاردى قولجەتىمدى باسپانامەن قامتاماسىز ەتۋ ءۇشىن "7-20-25" باعدارلاماسىنا بالاما يپوتەكا ويلاپ تاپتى. ول جاڭا ۇيلەرگە بەرىلەتىن يپوتەكا بويىنشا سىياقى مولشەرلەمەسىنىڭ ءبىر بولىگىن سۋبسيديالاۋ دەپ اتالادى.

Abai.kz