ەسكەرتكىشتەر قويا بەرگەننەن گورى، سپورت جانە مەديتسينا نىساندارىن سالۋعا باسا نازار اۋدارۋ قاجەت ەكەنىن ايتتى قازاقستان پرەزيدەنتى قاسىم-جومارت توقاەۆ اتىراۋ وبلىسى جۇرتشىلىعىمەن كەزدەسۋىندە.

««ەل بولامىن دەسەڭ، بەسىگىڭدى تۇزە» وسكەلەڭ ۇرپاقتىڭ دەنساۋلىعىن ويلاماساق، ەرتەڭ كەش بولىپ قالۋى مۇمكىن. وسى ماقساتتا سپورت ينفراقۇرىلىمىن دامىتىپ، ونى بارىنشا قولجەتىمدى ەتۋ – ماڭىزدى مىندەتتىڭ ءبىرى»، - دەدى توقاەۆ.

ونىڭ ايتۋىنشا، وڭىردەگى كوپتەگەن سپورت نىسانىنا جوندەۋ جۇرگىزۋ قاجەت.
«سونىمەن بىرگە، رەسپۋبليكالىق جانە حالىقارالىق جارىستار وتكىزەتىن جاڭا سپورت كەشەندەرىن سالۋ كەرەك. جالپى، كوپ شىعىندى تالاپ ەتپەيتىن سپورت تۇرلەرىن دامىتقان ءجون. مىسالى، شاحمات، ۇستەل تەننيسى، توعىزقۇمالاق، ساداق اتۋ، قازاقشا كۇرەس، تاعى باسقا. بۇل قادام، ەڭ الدىمەن، بالالارىمىزدى تەرىس ادەتتەن الىستاتادى جانە سپورت زالدارىنىڭ تاپشىلىعىن ازايتۋعا مۇمكىندىك بەرەدى. اكىمدىككە وسى شارۋالاردى پىسىقتاۋدى تاپسىرامىن. تاعى ءبىر ايتايىن دەگەنىم، ەسكەرتكىشتەر قويا بەرگەننەن گورى، سپورت جانە مەديتسينا نىساندارىن سالۋعا باسا نازار اۋدارۋ قاجەت. بۇل اتىراۋ وبلىسىنا عانا ەمەس، بۇكىل ەلىمىزگە قاتىستى ماسەلە»، - دەپ باسا ايتتى توقاەۆ.

Abai.kz