رەسەي اسكەرى اقىرى حەرسوننان شەگىنەتىن بولدى. بۇل تۋرالى رەسەي اسكەرىنىڭ ۋكراينا بويىنشا قولباسشىسى سۋروۆيكين شويگۋعا بەرگەن بايانداماسىندا مالىمدەدى. سۋروۆيكين دنەپر وزەنىنىڭ ارعى بەتىندەگى اسكەري بولىمشەلەردى قامتاماسىز ەتۋدىڭ قيىندىعىنا بايلانىستى اسكەردى حەرسون قالاسى مەن سول ماڭداعى ەلدى-مەكەننەن اكەتىپ، قورعانىستى دنەپردىڭ بەرگى بەتىنە قويۋدى ۇسىندى. شويگۋ باس يزەپ، كەلىستى. 

9 قاراشا كۇنى سۋروۆيكين قورعانىس مينيسترىنە بەرگەن بايانداماسىندا، رەسەي اسكەرىنىڭ قورعانىسى مىعىم ەكەنىن، الايدا كەي ايماقتا تاكتيكالىق شەگىنىس جاساۋ قاجەتتىگىن ايتتى. ول بۇل شارانى كەرەكسىز شىعىننىڭ الدىن الۋ ءۇشىن قاجەت دەپ كورسەتتى. بايانداماعا قاراپ، رەسەي اسكەرى جاقىن كۇندەرى حەرسون قالاسىن تاستاپ كەتەتىنى انىقتالدى. ءبىر جارىم اي بۇرىن ماسكەۋدىڭ قاق ورتاسىندا حەرسون، زاپوروجە، لۋگانسك جانە دونەتسك وبلىستارىن رەسەيگە قوسۋ بويىنشا سالتاناتتى جيىن وتكەن بولاتىن. جيىن بارىسىندا پۋتين "بۇل ايماقتار رەسەيگە ماڭگىگە قوسىلعانىن" ايتتى. ايماق حالقىن ء"وز ازاماتتارىمىز، ولاردى ءبىز بارىنشا قورعايمىز" دەدى.

ۋكراينا اسكەرى حەرسوندى قايتارۋ وپەراتسياسىن بىرنەشە اي بۇرىن باستادى. ول جاۋ اسكەرىنىڭ قورعانىس شەبىنە ۇزدىكسىز سوققى بەرۋ مەن جابدىقتاۋ جولدارىن تالقانداۋ ارقىلى ىسكە استى. حەرسون قالاسىن دنەپردىڭ ارعى بەتىمەن جالعاپ تۇرعان كوپىرلەرگە HIMARS زىمىران كەشەندەرى تولاسسىز سوققى جاساۋمەن بولدى. انتونوۆ كوپىرى كولىك جۇرمەستەي قيرادى، ال انتونوۆ تەمىرجول كوپىرى ىستەن شىقتى. كاحوۆكا بويىنداعى وتكەلگە دە سوققى جاسالىپ، اسكەري تەحنيكا وتە الماستاي كۇيگە ءتۇستى.

ۋكراينا اسكەرى حەرسونداعى اسكەري قويمالارعا سوققى جاساۋدى ارتتىرىپ، قالادا پارتيزاندار بىرنەشە مارتە ديۆەرسيالىق شابۋىلداردى ۇيىمداستىردى. 9 قاراشا كۇنى وككۋپاتسياداعى حەرسوننىڭ زاڭسىز بيلىگىنىڭ وكىلى سترەموۋسوۆ قازا تاپتى. رەسمي اقپارات بويىنشا ول جول كولىك وقيعاسىنا ۇشىراعان، ال بەيرەسمي اقپارات بويىنشا ول زىمىران سوققىسىنان قازا تاپقان. ريا نوۆوستي تىلشىلەرى ول قازا تاپقان جەردى جانە سترەموۋسوۆ وتىرعان كولىكتى كورسەتتى، الايدا ونىڭ جەڭىل كولىگى سوعىلعان جۇك كولىگىن كورسەتپەدى. پۋتين سترەموۋسوۆتىڭ قازاسىنا بايلانىستى ونى "ەرلىگى ءۇشىن" مەدالىمەن ماراپاتتادى.

رەسەي اسكەرىنىڭ حەرسوننان كەتۋىن رەسەيلىك پروپاگاندا وكىلدەرى بارىنشا اقتاپ، ويلاستىرىلعان ارەكەت دەۋدە. ولار "وسى جولى باسشىلىق وزىنە سەنىمدى ءارى اۋىر بولسا دا ناقتى شەشىم قابىلداپ، ادام شىعىندارىنىڭ الدىن الدى" دەپ جارىسا جازۋدا. ال رەسەيلىكتەر بۇل شەشىمدى "ساتقىندىق", "بىزگە سەنگەن حالىقتىڭ سەنىمىن اياققا تاپتاۋ", "قاجەتسىز سوعىس" دەپ جازۋدا.

ۋكراينا بيلىگى دە رەسەي قورعانىس مينيسترلىگىنىڭ شەشىمىنە بايلانىستى پىكىر ءبىلدىردى. ۋكراينا پرەزيدەنتىنىڭ كەڭەسشىسى پودولياك: "شويگۋدىڭ مالىمدەمەسىنە ءمان بەرمەيمىز. ويتكەنى، ولاردىڭ ءسوزى مەن ءىسى بولەك. ءبىز ساقتىقتى جوعالتپاۋىمىز كەرەك. ابايلاپ قيمىلدايمىز. حەرسونعا ۋكراينا تۋى تىگىلمەيىنشە، رەسەيدىڭ شەگىنگەنىنە قۋانبايمىز", - دەدى.

رەسەي حەرسوننان اسكەرىن اكەتىپ جاتقان ۆيدەولاردى تەلەگرام ارنالاردا جاريالادى. ۋكراينا بارلاۋ قىزمەتى بۇل قاقپان بولۋى ىقتيمال دەيدى، سوندىقتان قالاعا اسىقپاي، بارىنشا ساقتىقتى ساقتاي وتىرىپ كىرەتىنىن مالىمدەدى.

رەسەيدىڭ حەرسوننان ايىرىلۋى ساياسي، ەكونوميكالىق جانە يدەولوگيالىق سيپاتتا سالدارى بولماق. رەسەيلىكتەردىڭ پۋتين بيلىگىنە جانە رەسەي اسكەرىنە دەگەن سەنىم كاپيتالى سارقىلۋ ۇستىندە، ال ۇرىس دالاسىنداعى ساربازداردىڭ رۋحى ءتۇسىپ بارادى. موتيۆاتسياسى تومەن اسكەردىڭ ۇرىستا ءتيىستى ناتيجە كورسەتۋى قيىن. حەرسوننان رەسەي تولىق ايىرىلسا، ۋكراينا اسكەرى قىرىمعا سوققى جاساۋ مۇمكىندىگىنە يە بولىپ، اسكەري مانەۆر كولەمىن ارتتىرا الادى.

اسحات قاسەنعالي

Abai.kz