سەنبى, 28 قاڭتار 2023
بيلىك 881 7 پىكىر 10 قاراشا, 2022 ساعات 14:47

قازاقستان ازاماتتىعىن الاتىندار مەملەكەتتىك تىلدەن ەمتيحان تاپسىرادى

قازاقستان ازاماتتىعىن الاتىندار مەملەكەتتىك ءتىل بىلۋدەن ەمتيحان تاپسىرادى. بۇل تۋرالى قر پرەمەر-ءمينيسترى ءاليحان سمايىلوۆ مالىمدەدى.

Inform.kz حابارلاۋىنشا، بۇگىن سەناتتىڭ جالپى وتىرىسىنان كەيىن وتكەن ءباسپاسوز ءماسليحاتىندا تىلشىلەر ۇكىمەت باسشىسىنان مەملەكەتتىك ءتىلدى بىلمەيتىندەرگە قازاقستان ازاماتتىعىن بەرمەيتىن زاڭ قابىلداۋ مۇمكىندىگىنە قاتىستى سۇراق قويدى. وسى ورايدا بۇل باعىتتاعى جۇمىستار قالاي جۇرگىزىلەتىنىن سۇرالدى.

«ءتيىستى زاڭناماعا وزگەرىستەر قارالىپ جاتىر. وسى نورمالار ۇكىمەتتە كەلىسۋ ساتىسىنان وتۋدە. جالپى، بۇل نورمالاردى قولدايمىز. سوندىقتان وسىنداي وزگەرىستەردى زاڭناماعا ەنگىزۋ كەرەك دەپ سانايمىز»، - دەدى ءا. سمايىلوۆ.

بۇل تۇرعىدا ول اتالعان وزگەرىستەر حالىقارالىق تاجىريبەگە سۇيەنىپ دايىندالعانىن اتاپ ءوتتى.

«كوپتەگەن ەلدە ازاماتتىق الۋ ءۇشىن مەملەكەتتىك ءتىلدى جانە سول ەلدىڭ تاريحىن ءبىلۋ كەرەك، سونداي-اق ءتيىستى ەمتيحان تاپسىرۋ مىندەتتەلەدى. گەرمانيادا، تۇركيادا، كانادادا، رەسەيدە جانە باسقا دا مەملەكەتتەردە وسىنداي تالاپتار بار. ول تالاپتار اياسىندا ازاماتتىق الاتىن ادامدار سول قوعامعا تەز بەيىمدەلىپ كەتۋىنە ىقپال ەتەدى. سوندىقتان ءتيىستى ەمتيحان تاپسىرۋ كەرەك دەپ ويلايمىز، ياعني ازاماتتىق الاتىندار بۇل تالاپتارعا ساي بولۋى قاجەت»، - دەدى پرەمەر-مينيستر.

سونىمەن قاتار ۇكىمەت باسشىسى كەيبىر ساناتتارعا بۇل تالاپتار قولدانىلماۋى مۇمكىن ەكەنىن جەتكىزدى.

«ەتنيكالىق قازاقتارعا جانە كامەلەتكە تولماعاندارعا، سونداي-اق حالىقارالىق شارتتارعا سايكەس جەڭىلدەتىلگەن تارتىپپەن ازاماتتىق الاتىن ادامدارعا اتالعان تالاپتار قولدانىلمايدى. وسى ورايدا قازاقستاندا جاقىن تۋىستارى تۇرسا نەمەسە جۇبايى قازاقستان ازاماتى بولسا، سونداي-اق ەلىمىزگە ەڭبەگى سىڭگەن ادام بولسا، وندا ءتيىستى شەشىممەن جەڭىلدەتىلگەن تۇردە وسى ادامدار ازاماتتىق الا الادى»، - دەدى ءاليحان سمايىلوۆ.

ونىڭ سوزىنە قاراعاندا، ۇكىمەتتەگى كەلىسۋ ساتىسىنان وتكەننەن كەيىن، بۇل قۇجات جاقىن ارادا پارلامەنتتىڭ قاراۋىنا تۇسەدى. بۇدان بۇرىن حابارلانعانداي، مەملەكەتتىك ءتىلدى بىلمەيتىندەرگە قازاقستان ازاماتتىعىن بەرمەيتىن زاڭ قابىلدانادى.

Abai.kz

7 پىكىر

ۇزدىك ماتەريالدار

انىق-قانىعى

جاقيانوۆ: ماعان اشىق جالا جابۋعا كىرىستى...

عالىمجان جاقيانوۆ 3122
ايقاي

ەلدە ۇلتتىق يدەولوگيا وتە ءالسىز...

بەيسەنعازى ۇلىقبەك 1907