قازاقستاننىڭ ەكس-پرەزيدەنتى نۇرسۇلتان نازارباەۆ استانادا پرەزيدەنت سايلاۋىنا داۋىس بەردى.

ول قاۋىپسىزدىك كوميتەتىنىڭ بۇرىنعى باسشىسى، قازىر «مەملەكەتكە وپاسىزدىق جاسادى» دەگەن ايىپپەن جانە باسقا دا اۋىر باپتارمەن ءىستى بولعان كارىم ءماسىموۆ تۋرالى «ەگەر ول شىنىمەن كىنالى بولسا، ونىڭ ارتىندا كىم تۇر؟» دەگەن سۇراققا جاۋاپ بەردى.

«بۇل سۇراق مەنى دە قىزىقتىرادى. بۇل ارەكەتكە نە ءۇشىن بارعانىن، ونىڭ ارتىندا كىم تۇرعانىن ءبىلۋ ءۇشىن مەن دە تەرگەۋ مەن سوتتىڭ اياقتالعانىن كۇتىپ ءجۇرمىن. ءماسىموۆ مەنىمەن بىرگە كوپتەگەن جىلدار بويى جۇمىس ىستەدى. بىراق كىم بىلگەن... يسا پايعامبار دا قاسىندا وتىرعان يۋدانىڭ ساتقىن ەكەنىن بىلمەگەن»، -دەدى نۇرسۇلتان نازارباەۆ.

ەكس-پرەزيدەنت نەمەرە ءىنىسى قايرات ساتىبالدىنىڭ سوت ۇكىمى تۋرالى سۇراققا دا  پىكىر ءبىلدىردى. 

"سوتتىڭ شەشىمى ءادىل دەپ ويلايمىن. ءادىل بولماسا، وعان سەنبەگەن ادام قارسى بولىپ، ءوزىنىڭ ارىزىن بەرۋ كەرەك. سوندىقتان ءبارىبىر قايدا بارعاندا دا ماسەلەنى سوت جۇيەسى شەشەدى",- دەپ جاۋاپ بەردى ول.

سونداي-اق بۇرىنعى مەملەكەت باسشىسى قازىر حالىققا ەڭ باستىسى بىرلىك كەرەگىن جەتكىزدى.

«مەن كەزىندە تاڭداۋىمدى جاسادىم. ايتايىن دەگەنىم: حالىققا بىرلىك كەرەك. ءبىر پرەزيدەنتتىڭ اينالاسىنا شوعىرلانىپ، ەڭبەك ەتەتىن حالىق بىرلىگى كەرەك. بۇل قازاقستان حالقىنىڭ بولاشاعى ءۇشىن وتە ماڭىزدى. ازاماتتارىمىز وسىنى تۇسىنەدى دەپ ويلايمىن. قازاقستان – تاۋەلسىز، ءوز ۇكىمەتى بار، استاناسى تۇرعىزىلعان مەملەكەت»،-دەدى ول.

ايتا كەتەيىك، بۇگىن ەلىمىزدە كەزەكتەن تىس پرەزيدەنت سايلاۋىنا داۋىس بەرۋ ءوتىپ جاتىر. بۇدان بۇرىن حابارلانعانداي، قر ورتالىق سايلاۋ كوميسسياسىنىڭ مالىمەتىنە قاراعاندا، ساعات 10:00-دەگى جاعداي بويىنشا رەسپۋبليكانىڭ 2 792 962 ازاماتى بيۋللەتەن الدى. ول تىزىمگە ەنگىزىلەن ازاماتتاردىڭ 23,37 پايىزىن قۇرايدى.

سايلاۋعا ءتۇسىپ جاتقان التى كانديدات قاسىم-جومارت توقاەۆ (حالىقتىق كواليتسيا اتىنان); مەيرام قاجىكەن ( "امانات" رەسپۋبليكالىق كاسىپوداقتار بىرلەستىگى); جيگۋلي دايراباەۆ ("اۋىل" پارتياسى); قاراقات ابدەن ("كاسىبي الەۋمەتتىك جۇمىسشىلار ۇلتتىق اليانسى" رەسپۋبليكالىق قوعامدىق بىرلەستىگى); سالتانات تۇرسىنبەكوۆا ("قازاق انالارى – داستۇرگە جول" رەسپۋبليكالىق قوعامدىق بىرلەستىگى); نۇرلان اۋەسباەۆ (جالپىحالىقتىق سوتسيال-دەموكراتيالىق پارتياسى) ۋچاسكەلەرگە كەلىپ، ءوز تاڭداۋلارىن جاسادى.

Abai.kz