كەزەكتەن تىس پرەزيدەنت سايلاۋى اياقتالىپ، الدىن-الا قورىتىندى بويىنشا باسىم داۋىسپەن قاسىم-جومارت توقاەۆ جەڭىپ شىقتى.

ونى ەڭ العاشقى بولىپ جيگۋلي دايراباەۆ قۇتتىقتادى. «سايلاۋ ناۋقانى ءوز مارەسىنە جەتتى، الدىن الا قورىتىندىسى شىقتى، حالىق ءوز تاڭداۋىن جاسادى. قاسىم-جومارت توقاەۆتى سايلاۋداعى جەڭىسىمەن قۇتتىقتايمىن. ەل مۇددەسى ءۇشىن ەڭبەك ەتەدى دەپ سەنەمىن. جاڭادان سايلانعان مەملەكەت باسشىسىنا تابىستار تىلەيمىن»، - دەدى دايراباەۆ.

قازاقستاننىڭ بۇرىنعى پرەزيدەنتى نۇرسۇلتان نازارباەۆ تا قاسىم-جومارت توقاەۆتى جەڭىسىمەن قۇتتىقتادى.

«ءسىزدى قازاقستان رەسپۋبليكاسىنىڭ پرەزيدەنتى سايلاۋىنداعى ايقىن جەڭىسىڭىزبەن رياسىز كوڭىلمەن قۇتتىقتايمىن! بۇل – مەملەكەت باسشىسى رەتىندەگى بەدەلىڭىزدىڭ ايشىقتى ايعاعى، سونداي-اق اۋقىمدى رەفورمالارىڭىز بەن تىڭ باستامالارىڭىزعا جانە تاۋەلسىزدىك تاعدىرى تارازىعا تارتىلعان سىن ساعاتتا كورسەتە بىلگەن تاباندى دا شەشىمتال مىنەزىڭىزگە، اقىل-پاراساتىڭىزعا دەگەن حالىقتىڭ قالتقىسىز سەنىمىنىڭ داۋسىز دالەلى. الداعى ۋاقىتتا دا بارشانىڭ العىس-ريزاشىلىعى مەن قۇرمەتىنە بولەنە بەرۋىڭىزگە تىلەكتەسپىن»، - دەلىنگەن تۇڭعىش پرەزيدەنتتىڭ قۇتتىقتاۋىندا.

قاسىم-جومارت توقاەۆتىڭ سايلاۋداعى قارسىلاسى سالتانات تۇرسىنبەكوۆا: «مەنىڭ سايلاۋالدى باعدارلامامنىڭ ارقاسىندا زورلىق-زومبىلىق تاقىرىبى كۇن تارتىبىنەن تۇسكەن جوق. ەلەكتورالدى ناۋقانعا قاتىسۋشىلاردىڭ ءاربىرىنىڭ جۇرەگىنە ءسوزىم جەتتى دەگەن ويدامىن»، - دەگەن ول دا شىن جۇرەكتەن توقاەۆتى سەنىمدى جەڭىسىمەن قۇتتىقتادى.

پرەزيدەنتتىككە ۇمىتكەر قاراقات ابدەن سايلاۋدىڭ ءادىل وتكەنىن اتادى.

«قۇرمەتتى قازاقستاندىقتار! كەزەكتەن تىس وتكەن پرەزيدەنتتىك سايلاۋدىڭ Exit poll ناتيجەسى شىقتى. بۇل ساياسي دودادا جەڭىسكە جەتكەن مەملەكەت باسشىسى قاسىم-جومارت كەمەلۇلىن شىن جۇرەكتەن قۇتتىقتايمىن. اشىق تا ءادىل وتكەن بۇل سايلاۋ ەلىمىزدەگى دەموكراتيانىڭ ايقىن كورىنىسى بولدى. ەل جۇگىن ارقالاۋ – وتە ۇلكەن جاۋاپكەرشىلىك»، - دەدى قاراقات ابدەن.

قاسىم-جومارت توقاەۆتى كورشى ەلدەردەگى ارىپتەستەرى قۇتتىقتاپ جاتىر.

ولارىڭ ىشىندە، تاجىكستان پرەزيدەنتى ەمومالي راحمون، وزبەكستان پرەزيدەنتى شاۆكات ميرزيوەۆ، قىرعىزستان پرەزيدەنتى سادىر جاپاروۆ بار.

Abai.kz