بەيسەنبى, 28 ناۋرىز 2024
46 - ءسوز 2105 26 پىكىر 22 قاراشا, 2022 ساعات 15:26

مەن جاڭا قازاقستاندى كورۋدى ارماندايمىن

ساناعا سالماق سالماعان سايلاۋ ءوتتى. جەڭىمپاز انىق. ءارى قاراي نە بولماق؟!

مەن جاڭا قازاقستاندى كورۋدى ارماندايمىن. بارلىق ادام زاڭ الدىندا بىردەي بولاتىن ادىلەتتى، جاڭا قازاقستان. وندا سۋديا بولۋ – بارىنشا قۇرمەتتى ءارى جاۋاپتى ءىس. سەبەبى، سۋديا ەشكىمگە تاۋەلدى ەمەس. پرەزيدەنتكە دە، سوت توراعاسىنا دا تاۋەلسىز. ءوزىنىڭ ار-وجدانى، حالىققا بەرگەن انتىنان باسقاعا الاڭدارى جوق.

جاقسىلىعى مول جاڭا قازاقستاندا  كەنتتىك جانە وبلىستىق اكىمدەردەن باستاپ بارلىعىن حالىق سايلايدى. دەمەك، ولار قاراپايىم حالىقتىڭ يگىلىگى ءۇشىن جۇمىس ىستەيدى، بيۋدجەت اقشاسىن ۇرلامايدى.

ەشكىمگە قاجەتى جوق مەگا جوبالاردىڭ ورنىنا بارىنشا ساپالى ءارى ارزان ءبىلىم وشاقتارى مەن تامىلجىعان ساياباقتار، ساياسى مول سكۆەرلەر، تەپ-تەگىس، ايناداي جالتىراپ جاتقان جول سالادى. بال كۇلكىلى بالالار بالاباقشاعا، مەكتەپكە تەگىن بارادى. زامان تالابىنا ساي ساپالى جانە لايىقتى ءبىلىم الادى. ءبىلىم وشاقتارىندا تەگىن ءارى ءدامدى تاعامنان تاتادى. بارلىق جەردە دە. ءتىپتى، شالعايداعى شاعىن اۋىلداردا دا.

جاڭا الەمدە انا بولۋ وتە قۇرمەتتى ءارى پايدالى. ويتكەنى، ءبىرىنشى بالادان كەيىن وتباسى جەڭىلدەتىلگەن پايىزبەن يپوتەكا الۋعا قۇقىلى، ءارى يپوتەكا 30 پايىزعا ازايادى. ءتورتىنشى سابيدەن كەيىن يپوتەكالىق قارىزدان ءبىرجولا بوساتىلادى.

جاڭا قازاقستاندا بيۋدجەتتەن اقشا ۇرلاۋ – وتانعا وپاسىزدىق جاساۋمەن تەڭ. سول سەبەپتى قاتاڭ جازالانادى. مەملەكەتتىك قىزمەتكەر بولۋ قۇرمەتتى لاۋازىم، بىراق، ولار باي ەمەس. مەملەكەتتىك قىزمەتكەر بارلىق جاعدايمەن قامتاماسىز ەتىلگەن، سويتە تۇرا وزىنە ەشقاشان «بەنتلي» ساتىپ الىپ، اۋماعى ءۇش گەكتار جەرگە ساۋلەتتى ۆيللا سالا المايدى.

وندا ستۋدەنتتەر جوعارى وقۋ ورىندار تەگىن وقيدى ءارى ناقتى ءبىلىم الادى. جەكە ۋنيۆەرسيتەتتەر دەپ اتالاتىنداردىڭ كوپشىلىگى جابىلادى. ىلە ۇمىتىلادى.

جاڭا قازاقستاندا بالالار ءۇيى مەن قارتتار ءۇيى بولمايدى. ويتكەنى، قاريالار مەن بالالاردى تاستاپ كەتۋ قولايسىز ءارى ءتيىمسىز.

بارشا ازاماتتار مەملەكەتتىك ءتىلدى مەيلىنشە جاقسى بىلەدى ءارى قۇرمەتتەيدى. قازاق ءتىلىن جەتىك مەڭگەرۋ ءۇشىن بارلىق ەسىك اشىق، ءتىل بىلگەندەر ارتىقشىلىققا يە.

كولىكتى تۇندە اشىق قالدىرا الاسىز جانە وعان الاڭدامايسىز. ءومىر ءسۇرۋ دەڭگەيى وتە جوعارى بولعاندىقتان، بىرەۋدىڭ مۇلكىن ۇرلاۋ ارقىلى ءومىر ءسۇرۋدىڭ ەش قاجەتى جوق.

كەز-كەلگەن جۇمىسشى، كۇزەتشى، قۇرىلىسشى، جۇرگىزۋشى جانە باسقا ماماندىق يەلەرى جاقسى جالاقى الماق.

جاڭا قازاقستاندا كاسىپكەرلەر ءوز ەسەپشوتتارىنداعى مىڭعىرعان ميلليونداردىڭ سانى ەمەس، جۇمىس ورىندارىنىڭ سانىن ماقتانىش كورەدى.

الەمنىڭ تۇكپىر-تۇكپىرىنەن ميلليونداعان تۋريستەر ءبىزدىڭ ەلدىڭ ديدارىن كورسەك دەپ دامەتەدى. ولاي بولاتىن سەبەبى، ەجەلگى ەرتەگىلەردەگىدەي جاقسى دا، جايلى قوناق ۇيلەر سالىنعان. كەرەمەت تابيعات، شاعىن اۆياتسيالىق ۇشاقتار، تەگىس جولدار، قاۋىپسىز ورتا كىمدى بولسىن قىزىقتىرماي قويمايدى.

وندا بارلىق دامىعان ەلدەردىڭ ينۆەستورلارى ءبىزدىڭ ەلىمىزگە ينۆەستيتسيا سالۋ ءۇشىن  كەزەككە تۇرادى. سەبەبى، جەمقورلىق تا، ۇرى شەنەۋنىك تە جوق. ال، ءادىل زاڭ جەكەمەنشىك قۇقىعىن جانە ونىڭ مىزعىماس بەرىكتىگىن قورعايدى.

وندا كولىك كەپتەلىسى بولمايدى، قالالاردىڭ ۇستىندەگى قارا ءتۇتىن جوق. زاڭسىز قۇرىلىستار بۇزىلعان، ونىڭ ورنىن گۇل كومكەرگەن ساياباقتار مەن اجارلى الاڭدار باسقان.

جاڭا قازاقستاندا تۇرۋ پايدالى ءارى ءتيىمدى. اۋىل تۇرعىندارى ءوز ەلىن عانا ەمەس، جەر شارىنىڭ جارتىسىن قاجەتتى ونىمدەرمەن قامتاماسىز ەتەدى.

جاستار ءبىر-ءبىرىن ءسۇيىپ قوسىلادى. ولار تۇراقتى تابىسقا كەنەلگەن ءارى قاناعاتتى بىلەدى.

جاڭا قازاقستاندا وتە كاسىبي اسكەر بار. سوندىقتان، كورشىلەر كوزىن الارتادى دەگەن قورقىنىش جوق. وندا ازاماتتار شەت ەلدەردەگى ەڭ جاقسى سىباعانى ىزدەمەيدى.

وزدەرىنىڭ كوك ءتۇستى تولقۇجاتتارىمەن ماقتانادى. وسىنداي تولقۇجاتى بار ادام الەمنىڭ كەز-كەلگەن ەلىندە قالاۋلى جانە ۆيزاسىز قوناق ەسەبىندە جۇرە الادى.

 

ارمان شوراەۆ

Abai.kz

26 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1559
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2250
عيبىرات

قايسار رۋحتى عازيز جان

مۇحتار قۇل-مۇحاممەد 3502