زەينەتاقى جيناعىن پايدالانۋ ءۇشىن ەڭ تومەنگى جەتكىلىكتى شەگىن تومەندەتۋ ماسەلەسى قاراستىرىلىپ جاتقان جوق. بۇل تۋرالى قر ۇلتتىق ەكونوميكا ءمينيسترى الىبەك قۋانتىروۆ ايتتى.

ايتا كەتەيىك، جاقىندا ءماجىلىس دەپۋتاتى امانجان جامالوۆ زەينەتاقى جيناعىن پايدالانۋ شەگىن تومەندەتۋدى ۇسىنىپ، ۇكىمەت باسشىسىنا ساۋال جولداعان بولاتىن.

«بۇل ماسەلە كۇن تارتىبىندە تۇرعان جوق. ال جەكە ءوزىمنىڭ كوزقاراسىما توقتالسام، مۇنداي قادامعا قارسىمىن. ويتكەنى زەينەتاقى اۋدارىمدارىن الۋدىڭ ءبىرىنشى تولقىنى بويىنشا ەسەپتەۋلەر جۇرگىزىلگەن كەزدە، ادامداردىڭ ءتيىستى جاس ساناتىن قامتاماسىز ەتۋ ءۇشىن بەلگىلى ءبىر ەسەپتەۋلەر جۇرگىزىلدى. سوندىقتان زەينەتاقىعا قاتىستى ەڭ تومەنگى جەتكىلىكتى شەكتى تومەندەتۋ زەينەتاقى جيناعىن شەشىپ الۋدى ىنتالاندىراتىنى تۇسىنىكتى. وسىنىڭ سالدارىنان بولاشاقتا زەينەتكەرلەر ءۇشىن زەينەتاقى تولەمدەرىنىڭ جەتكىلىكسىز بولۋ بولجامىن ايتارلىقتاي ارتتىرادى»، - دەدى ءا. قۋانتىروۆ.

ونىڭ ايتۋىنشا، زەينەتاقى جيناعىن پايدالانۋ شەگىن تومەندەتۋ سالدارىنان بيۋدجەتكە قوسىمشا جۇك تە بولادى. بۇل تۇرعىدا زەينەتكەرلەردىڭ الەۋمەتتىك جاعدايىنا كەرى اسەر ەتەتىن ءتۇرلى فاكتورلار باستالادى.

Abai.kz