بۇحارادا 28 قاراشادا نۇكىستە 1−2 شىلدەدە وتكەن جاپپاي نارازىلىق شاراسىنا بايلانىستى اشىق سوت وتىرىسى وتەدى. بۇل ءىس بويىنشا 22 ادام ايىپتالىپ جاتىر. بۇل جونىندە وزبەكستاننىڭ جوعارعى سوتىنىڭ ءباسپاسوز حاتشىسى ازيز ابيدوۆ حابارلادى.

ايىپتالۋشىلاردىڭ تولىق اتى-ءجونى تومەندەگىدەي: داۋلەتمۇرات ءتاجىمۇراتوۆ، لولاگۇل كاللىحانوۆا، ازامات تۇردانوۆ، ا. سمەتۋللاەۆ، د. جيەمۋراتوۆ، ب. قادىربەرگەنوۆ، ب. سەيتنيازوۆ، ا. توقيمبەتوۆ، ك. سەيتيموۆ، ا. نۋراتدينوۆ، س. مەدەتوۆ، ن. نايىپوۆ، پ. شامشەتوۆ، ر. بەكمۋراتوۆ، س. كايپوۆ، ب. گەنجەباەۆ، س. كاليلاەۆ، پ. نۋرنيازوۆ، س. كاليموۆ، ن. سۋلتامۋراتوۆ، ا. تەميرحانوۆ جانە ا. اديلبەكوۆ.

ولار جالپى قىلمىستىق كودەكستىڭ 11 بابى بويىنشا ايىپتالىپ جاتىر. ولاردىڭ اراسىندا ادەيىلەپ دەنەگە اۋىر جاراقات سالۋ، وزبەكستان كونستيتۋتسياسىنا قاستاندىق جاساۋ، قىلمىستىق جولمەن كەلگەن قاراجاتتى زاڭداستىرۋ، جاپپاي تارتىپسىزدىك جاساۋ، قوعامدىق تارتىپكە قاۋىپ توندىرەتىن زاتتاردى دايىنداۋ، ساقتاۋ جانە تاراتۋ، قارۋ-جاراق ساقتاۋ، بۇزاقىلىق سەكىلدى باپتار بار.

بۇل وقيعانى زەرتتەۋ بويىنشا قۇرىلعان پارلامەنتتىك كوميسسيا ۇستالعان 107 ادامنىڭ بوساتىلعانىن حابارلاعان. كوميسسيا مۇشەلەرى سوتتا باقىلاۋشى رەتىندە قاتىسادى.

Abai.kz