وسكەمەن قالاسىنداعى جىلۋ ەلەكتر ورتالىعىنان اقاۋ شىقتى. جىلۋ ەلەكتر ورتالىعىنىڭ حابارلاۋىنشا،  27 قاراشادا ساعات 08:27-دە داتچيكتەردىڭ دۇرىس جۇمىس ىستەمەۋىنە بايلانىستى №15 قازاندىق ءوشىپ قالعان.

ساعات 10:05-تە اتالعان قازاندىق قايتا ىسكە قوسىلدى. بارلىق جابدىقتاردىڭ جۇمىسىن قاداعالاۋ كۇشەيتىلدى.

بۇدان بولەك، جەلىلىك سۋدىڭ اينالۋىنا قاتىستى ماسەلە تۋىنداعان. سونىڭ سالدارىنان قالا تۇرعىندارى ۇيلەرىندە جىلۋدىڭ ازايعانىنا شاعىمدانىپ جاتىر.

«قازىرگى ۋاقىتتا جەو شتاتتى رەجيمدە جۇمىس ىستەپ تۇر. وندا 7 قازاندىق پەن 6 تۋربواگرەگات بار. 2 قازاندىق اگرەگاتى كەستەگە سايكەس جوندەۋدەن وتۋدە. جوندەۋ جۇمىستارىن جۇرگىزەتىن ماماندار سانى ارتتىرىلدى. جوندەۋ جۇمىستارى اياقتالعاننان كەيىن جەلىلىك سۋدىڭ تەمپەراتۋراسى قالىپقا كەلەدى»، - دەلىنگەن اقپاراتتا.

ايتا كەتەيىك، وسكەمەن جەو 2017 جىلدىڭ ءساۋىر ايىندا "قازاقستاندىق كوممۋنالدىق جۇيەلەر" جشس-نە ءوتتى. ونىڭ يەسى –  ماجىلىستىڭ بۇرىنعى سپيكەرى نۇرلان نىعماتۋلينگە قۇدا بولىپ كەلەتىن وليگارح دىنمۇحامەت ىدىرىسوۆ.

Abai.kz