اقش پرەزيدەنتى دجو بايدەن رەسەي باسشىسى ۆلاديمير پۋتين ۋكرايناداعى سوعىستى اياقتاۋعا ىنتا بىلدىرسە، ونىمەن كەلىسسوز جۇرگىزۋگە دايىن ەكەنىن مالىمدەدى. ول ناتو-داعى وداقتارىمەن كەڭەسە وتىرىپ، كەلىسسوز جۇرگىزۋگە بولاتىنىن ايتتى. الايدا پۋتينمەن اڭگىمە ازىرگە كۇن تارتىبىندە تۇرعان جوق. بايدەننىڭ فرانتسيا باسشىسى ەممانۋەل ماكرونمەن كەزدەسۋىنەن كەيىن وتكەن ءباسپاسوز جيىنىندا ايتقان سوزىنەن Reuters اگەنتتىگى ءۇزىندى كەلتىرەدى.

كەزدەسۋ اياقتالعاننان كەيىن بايدەن مەن ماكرون ورتاق مالىمدەمە تاراتتى. وندا ەكى ەل باسشىسى "رەسەيدىڭ ۋكرايناعا قارسى زاڭسىز باسقىنشىلىق سوعىسىن تۇبەگەيلى تۇردە ايىپتايتىنىن" اتاپ كورسەتكەن. "ازاماتتار مەن ازاماتتىق ينفراقۇرىلىمعا قاساقانا سوققى جاساۋ – اسكەري قىلمىس، وعان كىنالىلەر جاۋاپقا تارتىلۋى ءتيىس" دەپ جازىلعان مالىمدەمەدە. ءباسپاسوز جيىنىندا ماكرون ۋكراينادان ءوزى دايىن ەمەس شارتتاردى قابىلداۋدى تالاپ ەتپەۋگە ۋادە ەتتى.

"فرانتسيا مەن اقش ۆلاديمير ءپۋتيننىڭ باسقىنشىلىق ۇمتىلىسى مەن رەسەيدىڭ ۋكرايناداعى سوعىسىنا قارسى، سوعىس كەزەكتى رەت ەۋروپا قۇرلىعىنداعى بەيبىتشىلىكتى بۇزدى" دەدى بايدەن. فرانتسيا مەن اقش سونىمەن بىرگە ماسكەۋدىڭ ۋكراينا ايماقتارىن اننەكسيالاۋ تالپىنىسىن دا ايىپتادى. بايدەن مەن ماكرون رەسەيدىڭ يادرولىق ريتوريكاسىنا دا قارسى شىقتى.

بايدەن مەن ماكرون ۋكرايناعا اۋە شابۋىلىنان قورعاناتىن جۇيە، ۋكراينانىڭ ەنەرگيا جۇيەسىن قالپىنا كەلتىرۋگە كومەكتەسەتىن جابدىقتار مەن حالىققى قىستان شىعۋعا كومەكتەسەتىن رەسۋرس جىبەرۋگە ۋادە ەتتى.

سونىمەن بىرگە حالىقارالىق ينستيتۋتتاردىڭ كومەگىمەن رەسەيدى "اسكەري قىلمىسى ءۇشىن" جاۋاپقا تارتۋدى جوسپارلاپ وتىرعاندارىن جەتكىزدى.

Abai.kz