ءبىر وقپەن ەكى قويان اتاتىن باياعىنىڭ شەشەندەرىنىڭ ىزىمەن ءبىر تاقىرىپ اياسىندا ەكى ءجايتتى اڭعارتپاقپىز. العاشقىسى – قاتاردا ءوتىپ جاتقان فۋتبولدان الەم چەمپيوناتى.

سەگىز توپتا جارىستى جالعاستىراتىن سەركەلەردىڭ دەنى انىقتالدى. سپورت ساراپشىلارى توپ  باستايدى دەپ توپشىلاعان گەرمانيا مەن بەلگيا شاڭ قاۋىپ قالدى. ءوز توپتارىندا ءبىرىنشى بولۋ تۇرماق كەلەسى كەزەڭگە ءوتۋى كۇماندى دەلىنەتىن جاپونيا مەن ماروككو كوش باسىندا كەلدى. مەكسيكا مەن دانيانىڭ ارعىماقتارى دالادا قالىپ، پولشا مەن اۆستراليانىڭ اتى كەرمەگە ەكىنشى بولىپ جەتتى. ياعني دودانىڭ كەلەسى كەزەڭىنە وتەدى.

باستاپقى ويىندا قارسىلاستى مەنسىنبەيمىز دەپ وڭباي سۇرىنگەن مەسسيدىڭ كومانداسى ودان كەيىن شيرىعىپ شىعا كەلدى. ەكى تەڭ ويىندى قاناعات تۇتىپ تۇرعان اقش قۇراماسى سوڭعى قارسىلاس يرانمەن تارتىستا ءوز ساياساتكەرلەرىنىڭ قىبىن قاندىرىپ، ازىرگە جەڭىلمەگەن جەتى كوماندانىڭ قاتارىندا.

الەمدىك دوپ دوداسىنداعى جۇيرىكتەرمەن قاتار سول ويىنداردى تىكەلەي ەفيردە كورسەتىپ جاتقان «QAZAQSTAN» تەلەراديو كورپوراتسياسى ىرىكتەپ العان سپورت كوممەنتاتورلارىنىڭ باۋىرى جازىلا ءتۇستى. باستاپقى رەپورتاجدارىندا كوماندالاردى، قاقپاشى، قورعاۋشى، شابۋىلشىلاردى قايدا بولسا سوندا «جايعاساتىرا» بەرگەن ولار بىرتىندەپ كىبىرتىكتەن ارىلىپ، ءوز شەبەرلەرىن ۇشتادى.

«تاۋ جىعارداي ەكپىنمەن شابۋىلداپ كەتتى»، «قاراجاياۋ كوماندا ەمەس»، «دوپ دۋالاپ تاستاعانداي اياعىنا قايتا ورالدى»، «قورعاۋشىلاردىڭ اراسىنان قىلدان ماي سۋىرعانداي وتە شىقتى»، «ءبىر ويىنشىنى جەر سوقتىرىپ كەتتى»، «دوپ كەلە جاتقاندا بۇل قىدىرىپ ءجۇر» دەگەندەي ۇلتتىق ساناعا ءسىڭىمدى تەڭەۋلەردى ءجيى ەستي باستادىق. «ۇپاي سانى وسە مە، كەلەسى ساتىعا كوشە مە» دەپ بايىرعى جىراۋلارشا  قيىستىرعاندا ءتىپتى، ريزا بولدىق.

1-جەلتوقساننان 2-سىنە قاراعان تۇنگى «ە» توبىنداعى ەرەكشە تارتىستى ەكى ويىندى «QAZAQSTAN» تەلەراديو كورپوراتسياسىنىڭ قوس ارناسىن ءجيى اۋىستىرىپ كوردىك. اتكەنشەكتەي تەربەلگەن احۋالدا ءتورت كوماندانىڭ ءۇمىتى ءبىر جانىپ، ءبىر ءوشىپ جاتتى. فۋتبولشىلار نەبىر گولمەن كوز قۋاندىرسا، كوممەنتاتورلار سوعان لايىق تەڭەۋلەر تاۋىپ، كورەرمەننىڭ قۇلاق قۇرىشىن قاندىردى.

اسىرەسە 2:4 ەسەبىمەن اياقتالعان كوستا-ريكا – گەرمانيا كوماندالارى اراسىنداعى سۇراپىلدان تىكەلەي رەپورتاج جۇرگىزگەن ءىنىمىز ءتانتى ەتتى. جامال مۋسيالا گول سوعا الماي قالعاندا «باقىتسىز جامال» دەگەنى بىردەن مىرجاقىپ جارىقتىقتىڭ وسى اتتاس رومانىن ساناعا ساق ەتكىزدى. ونى وقىپ قويماي، وقىعانىن رەتتى تۇستا پايدالانىپ قالعان شەبەرلىگىنە ريزامىز. ءارى قاراي «الپىس مينۋتتا ەكى گول سوعا الماۋ سۇيەگىنە زور تاڭبا» دەگەندە بۇل ءىنىمىزدىڭ مۇحتار شاحانوۆتىڭ باللادالارىن وقىپ، ءارى كوكەيگە ءتۇيىپ جۇرگەنىن بايقادىق. «بۇلارعا سپورتتىڭ شەجىرە، ەسەپ-قيساپ، ەرەجەلەرىنە باسقا ۇلتتىق ادەبيەت جاۋھارلارىن ءبىلۋ قاجەت» دەپ ءجيى ەسكەرتەتەنىبىز. سول ەسكەرتۋ دالادا قالماي، ەلەپ-ەسكەرگەندەرىن بايقادىق.

مارقۇم قىناباي ارالباەۆ پەن امانگەلدى سەيىتحاننان قالعان سپورت ايتاشىسى سوقپاعىنىڭ سورابىن بۇگىندە ءشوپ باسىپ قالماپتى. لايىقتى جالعاستىرۋشىلارى بار ەكەن. جاپونيانىڭ جەڭىسىمەن قاتار بۇعان دا ريزا بولىپ قالدىق.

ءارى قاراي باۋىرلاردىڭ ىزدەنىسى جالعاسا بەرسە ەكەن. ۇلگى كوپ. تەك سونى تاۋىپ جانە جاڭعىرتىپ وتىرۋ كەرەك.

بىردە ساڭلاق رەداكتور سەيداحمەت بەردىقۇلوۆ اقىن تۇمانباي مولداعاليەۆكە «قايراتتىڭ» ويىنىنان رەپورتاج جازۋدى تاپسىرادى. «اقىن سپورتتان نە بىلەدى دەيسىڭ» دەپ بۇل تاپسىرماعا كۇلە قاراعاندار بولعان. ەرتەسىندە تۇمانبايداعى «قايرات» گول سالعاندا ستاديون موڭكىپ كەتتى» ءبىر سويلەمنىڭ ءوزى اقىن رەپورتاجى  سپورت جۋرناليستەرىنىڭ جازعانىنىڭ اۋزىن ۇرىپ جىبەرەرىن اڭعارتقان.

مىسال كوپ. كەزىندە حوككەيدەن ازۋىن ايعا بىلەگەن كانادانىڭ كومانداسى ناشار دەيتىن قارسىلاستان ۇتىلىپ قالعاندا نەسىپ جۇنىسباەۆ «ۇيەڭكى جاپىراقتارى شاشىلىپ قالدى» دەپ جازعان. ارگەنتينانىڭ العاشقى ويىنىنان بىزگە رەپورتاج جازعىزسا، ءسوز جوق «لاتىن امەريكاسىنىڭ جۇلدىزدارى اراب قۇمىنا كومىلىپ قالدى» دەر ەدىك نەسىپ اعامىزدىڭ ىزىمەن.

مىنە، وسىنداي ۇتقىر تەڭەۋلەر مەن بەينەلى سوزدەردى ەندى ەسەي جەڭىسۇلى، ءالىمجان اسقار، ەرمۇحامەد ماۋلەن جانە باسقالاردان، دەمەك «QAZAQSTAN-نىڭ» ەكى تەلەارناسىنان كۇتەمىز. ءساتتى ىزدەنىس بار، تەك سونى تەرەڭدەتە تۇسكەن ءلازىم.

نە كەرەك، اندا دا، مۇندا دا جۇيرىكتەردىڭ باۋىرى جازىلا باستادى.

قاينار ولجاي

Abai.kz