ساۋدا جانە ينتەگراتسيا ءمينيسترى سەرىك جۇمانعارين ەكىباستۇز جىلۋ-ەلەكتر ورتالىعىن مەملەكەت مەنشىگىنە بەرۋ ماسەلەسى تۋرالى ايتتى.

«بۇل ماسەلە ءالى تالداۋ ساتىسىندا تۇر. مۇندا شەشىم قابىلداماي تۇرىپ، ونىڭ جاعدايىن تەكسەرۋ كەرەك. ەگەر بۇل مەملەكەتكە ۇلكەن اۋىرتپالىق سالسا جانە ءىس جۇزىندە ءبىز وبەكتىنى الىپ، يەسىنە سىيلىق جاساعانداي بولامىز. سوسىن وعان بارلىق قاراجاتتى سالامىز. سوندىقتان، ەڭ الدىمەن، جاعدايدى بىرلەسىپ تۇزەتۋ ماسەلەسىن قاراستىرۋ قاجەت»، - دەدى سەرىك جۇمانعارين ۇكىمەتتە جۋرناليستەرگە بەرگەن سۇحباتىندا.

سونىمەن بىرگە سەرىك جۇمانعارين الەكساندر كلەبانوۆتىڭ «ەكىباستۇز جەو-سىن مەملەكەتكە ءبىر تەڭگەگە ساتۋعا دايىنمىن” دەگەن پىكىرىنە قاتىستى سۇراققا جاۋاپ بەردى.

«ۇكىمەت بۇل ورتالىقتى ءبىر تەڭگەگە ساتىپ الىپ، 1 ملرد تەڭگە شىعىنعا ۇشىراۋى مۇمكىن. سول ءۇشىن جەو جاي-كۇيىن تولىق قاراستىرىپ، قانشا قاراجات كەتەتىنىن تالداۋ كەرەك»، - دەدى مينيستر.

بۇدان بۇرىن وليگارح الەكساندر كلەبانوۆ ەكىباستۇز جىلۋ-ەلەكتر ورتالىعىن مەملەكەتكە ءبىر تەڭگەگە ساتۋعا دايىن ەكەندىگىن ايتقان بولاتىن.

Abai.kz