كەشە ۋكراينا قارۋلى كۇشتەرىنىڭ كۇنى بولدى. زەلەنسكي دونباسسقا كەلىپ، الدىڭعى شەپتە وتان ءۇشىن وت كەشىپ جاتقان ساربازداردى ارنايى قۇتتىقتادى. 

پرەزيدەنت زەلەنسكي مايدان دالاسىنان 40 شاقىرىمداي جەردە ورنالاسقان سلاۆيانسك قالاسىنا كەلىپ، ۆيدەو ۇندەۋ جاسادى. "بۇگىن دونباسسقا كەلىپ، سىزدەرمەن بىرگە بولۋىم مەن ءۇشىن ۇلكەن ابىروي. سىزدەردى بۇگىنگى مەرەكەلەرىڭىزبەن، جالپى ءبىزدىڭ مەملەكەتىمىزدىڭ ۇلى مەيرامى ۋكراينا قارۋلى كۇشتەرى كۇنىمەن قۇتتىقتاۋعا رۇقسات ەتىڭىزدەر. سىزدەرگە ەلىمىزدى ەرلىكپەن قورعاپ جاتقان كۇش جىگەردىڭ سارقىلماۋىن تىلەيمىن", – دەدى ۆلاديمير زەلەنسكي.

زەلەنسكي ساربازداردىڭ قولىن الىپ، بىلاي دەدى: "سىزدەردى وسىنداي ەرجۇرەك ەتىپ تاربيەلەگەن اتا-انالارىڭىزعا العىس ايتقىم كەلەدى، سىزدەرگە كۇن سايىن قولداۋ بىلدىرەتىن جۇبايلارىڭىزعا، بالالارىڭىز بەن جاقىندارىڭىزعا ريزاشىلىعىمدى بىلدىرەمىن".

ۋكراينا باسشىسى ۇرىس دالاسىندا قازا تاۋىپ، تۋعان جەرىن سوڭىنا دەيىن قورعاپ وتكەن قاھارمانداردى ەسكە الىپ، ءبىر مينۋتتىق ۇنسىزدىك جاريالادى. "قازا تاپقان جاۋىنگەرلەر ءبىزدىڭ جادىمىزدا ماڭگىگە ساقتالماق. ءبىز بۇل جاۋىنگەرلەردى ءبىر مينۋتتىق ۇسىزدىكپەن ەسكە الساق، ولار ەرلىكپەن قازا تابۋ ارقىلى ءبىزدىڭ ەلىمىزگە ونداعان جىلداردى سىيعا تارتتى", - دەدى ول.

زەلەنسكي قازىرگى ساتتە ەڭ اۋىر شايقاستار دونباسستا ءجۇرىپ جاتقانىن ايتتى. باسقا ايماقتاردا دا ۋكراينا اسكەرى قيىن وپەراتسيالاردى ىسكە اسىرۋدا. ولار زاپوروجە جانە حەرسون باعىتىنداعى دەوككۋپاتسيانى جالعاستىرۋدا. "جاقىن ارالىقتا ءبىز ۋكراينا قالالارى سانالاتىن دونەتسك پەن لۋگانسكتە كەزدەسەتىنىمىزگە سەنىمدىمىن، ارينە قىرىمدا دا جولىعاتىن بولامىز" دەپ ساربازداردى ءبىر سەرپىلتىپ قويدى. ءسوز سوڭىندا ۋكراينا پرەزيدەنتى جاۋىنگەرلەرگە مەملەكەتتىك ماراپاتتاردى ۇلەستىرىپ، باعالى سىيلىقتار تابىستادى.

زەلەنسكيدىڭ ۋكراينا جەرى سانالاتىن دونباسسقا بارۋى باسقىنشىلار مەن سەپاراتيستەردىڭ قان قىسىمىن كوتەردى. سولوۆەۆ ءوز باعدارلاماسىندا كيەۆتى اياۋسىز اتقىلاۋعا شاقىرسا، رەسەي مەمدۋما دەپۋتاتتارى "زەلەنسكي رەسەي جەرىنە رۇقساتسىز كىرۋ ارقىلى اۋماقتىق تۇتاستىعىمىزدى بۇزدى" دەپ ساندىراقتادى.

بۇۇ-دا رەسەيدىڭ ارنايى وكىلى ۆاسيلي نەبەنزيا مالىمدەمە جاساپ، بىلاي دەدى: ء"بىز ۋكراينامەن اراداعى قاقتىعىستى كەلىسسوز ارقىلى شەشۋگە دايىن ەكەنىمىزدى ايتقىم كەلەدى. ەگەر ۋكراينادان تونەتىن قاۋىپتى بەيبىت جولمەن شەشە الماساق، وندا ءبىز اسكەري جولمەن شەشەتىن بولامىز". ماعىنالىق تۇرعىدان ءبىرىنشى سويلەمى ەكىنشىسىنە قاراما-قايشى كەلەتىن مالىمدەمەنى كيەۆ "رەاكتسيا بىلدىرۋگە تۇرمايتىن بوس ءسوز" دەپ اتادى.

زەلەنسكيدىڭ دونباسسقا ەمىن-ەركىن بارىپ، مايدان دالاسىنا جاقىن ورنالاسقان قالادا ءجۇرۋى كوپتەگەن رەسەيلىكتىڭ اشۋىنا ءتيدى. ولار الەۋمەتتىك جەلىدە قىزۋ پىكىر الماسىپ، تالقىعا سالدى. "زەلەنسكي دونباسستا ءجۇر، ال پۋتين بۋنكەردە وتىر", "زەلەنكسي تابىتتا جاتۋدىڭ ورنىنا ءبىزدىڭ جەرىمىزدە تايراڭداۋدا", "حەرسونعا باردى، حاركوۆكە باردى، ەندى مىنە دونباسستا، كەلىسى ايماق قىرىم شىعار" دەپ جازدى اشۋلى باسقىنشىلار.

Abai.kz