ماسكەۋدىڭ وڭتۇستىگىندە ورنالاسقان، ءىىم قۇرىلىمىنا كىرەتىن "ساحاروۆو" ميگراتسيا ورتالىعى اسكەرگە قىزمەت ەتۋ تۋرالى جارنامانى قوعامدىق كولىكتەرگە تاجىك، وزبەك جانە قىرعىز تىلدەرىندە ىلگەن.

وندا ارمياعا بارعان ەڭبەك ميگرانتتارىنا بىردەن رەسەي ازاماتتىعى بەرىلەتىنى ايتىلعان.

بۇل جارنامانىڭ سۋرەتى الەۋمەتتىك جەلىلەردە جەلتوقسان ايىنان بەرى پايدا بولدى. ماسكەۋ قالاسى كولىك قىزمەتى بۇل اقپارات سوڭعى ەكى ايدان بەرى قوعامدىق كولىكتەرگە ىلىنگەنىن راستاپ، بۇل ميگراتسيا قىزمەتىنىڭ تاپسىرىسى ەكەنىن ايتقان.

بيىل كۇزدە رەسەي دۋماسى ارمياعا باراتىن شەتەل ازاماتتارىنا جەڭىلدەتىلگەن تۇردە ازاماتتىق بەرۋ جونىندە زاڭ قابىلداعان. بۇل ۋكراينادا سوعىس ءجۇرىپ جاتقان كەزەڭمەن سايكەس كەلىپ تۇر.

كۇزدە ماسكەۋ مەرى سەرگەي سوبيانين "ساحاروۆو" ورتالىعىندا اسكەرگە بارعىسى كەلەتىن ميگرانتتاردى قابىلدايتىن ورتالىق اشاتىنىن مالىمدەگەن.

وزبەكستان، تاجىكستاننىڭ رەسەيدەگى ەلشىلىكتەرى شەتەل اۋماعىندا ءجۇرىپ جاتقان سوعىس ارەكەتتەرىنە قاتىسقان ازاماتتارى قىلمىستىق جاۋاپكەرشىلىككە تارتىلاتىنىن ەسكەرتكەن.

Abai.kz