قازاقستان رەسپۋبليكاسىنىڭ پرەمەر-ءمينيسترى
اليحان اسحانۇلى سمايىلوۆقا،
قازاقستان رەسپۋبليكاسى پرەزيدەنتى اكىمشىلىگىنىڭ باسشىسى
مۇرات ابۋعاليۇلى نۇرتىلەۋگە،
قازاقستان رەسپۋبليكاسىنىڭ مەملەكەتتىك كەڭەسشىسى
ەرلان تىنىمبايۇلى قارينگە،
ەڭبەك جانە حالىقتى الەۋمەتتىك قورعاۋ ءمينيسترى
تامارا بوسىمبەكوۆنا دۋيسەنوۆاعا
قازاقستان رەسپۋبليكاسىنىڭ مادەنيەت جانە سپورت ءمينيسترى
داۋرەن اسكەربەكۇلى اباەۆقا!

بۇل حاتتى جوعارىدا اتى اتالعان لاۋازىمدى تۇلعالارعا جولداۋىمنىڭ سەبەبى، قويىلعالى تۇرعان سۇراقتىڭ ناقتى جاۋابىن تەك سولار عانا بەرە الاتىنىن بىلەمىن.

​وكىنىشكە قاراي، كوتەرىلگەلى تۇرعان ماسەلە جالعىز الماتى قالاسى اكىمدىگىنىڭ مادەنيەت باسقارماسىنا قاراستى «الاتاۋ» ءداستۇرلى ونەر تەاترىنىڭ عانا ەمەس، كۇللى حالىقتىڭ قابىرعاسىنا باتىپ تۇر.

قۇرمەتتى حاتتا اتى كورسەتىلگەن حانىمدار مەن مىرزالار!

مەن قازاقستان رەسپۋبليكاسىنىڭ ازاماتى، مادەنيەت سالاسىنىڭ ۇزدىگى، «قۇرمەت» وردەنىنىڭ يەگەرى، «الاتاۋ» ءداستۇرلى ونەر تەاترىنىڭ  ديرەكتورى، ايتىسكەر اقىن  جانە وتكەندە عانا وتكەن قازاقستان رەسپۋبليكاسىنىڭ پرەزيدەنتىن ۇلىقتاۋ راسىمىندە تىكەلەي بولىپ، پرەزيدەنتتى ءوز كوزىمەن كورىپ، ايتقانىن ءوز قۇلاعىمەن ەستىگەن ادام رەتىندە سىزدەرگە ءبىر سۇراق قويعىم كەلەدى.

​«الاتاۋ» ءداستۇرلى ونەر تەاترى الماتى قالاسىنا عانا ەمەس، قازاقستان مەملەكەتىنىڭ بارلىق اۋماعىنا اتادان قالعان اسىل مۇرا - ۇلتتىق ءداستۇرلى ونەرىمىزدى جاڭاشا ۇلگىدە تانىستىرىپ، ناسيحاتتاپ وتىرعان بىردەن-ءبىر مەكەمە.

مەنىڭ بۇل تەاترعا تاعايىندالعانىما 703 كۇن بولدى. اتالعان ۋاقىتتىڭ ىشىندە قازاقستاندا ۇلتتىق ونەرگە، مادەنيەتكە بار كۇش-جىگەرىمەن ۇلەس قوسىپ، ءوز مەملەكەتىنىڭ قارىشتاپ دامۋىن قالايتىن ازاماتتاردىڭ بار ەكەنىنە مەنىڭ كوزىم ابدەن جەتتى.

ول اتالمىش تەاتردىڭ ۇجىمى.

جانعا باتاتىنى، جۇمىسىن ادال ىستەپ، اكىمدىكتىڭ جۇمساعانىنا جۇگىرىپ، كەرەگىنە جاراپ، جاڭا پرەزيدەنتپەن جاڭاشا ءومىر سۇرۋگە ۇمىتتەنىپ وتىرعان قىزمەتكەرلەردىڭ جاعدايىن قانشا جاسىرساق تا كۇننەن-كۇنگە تومەندەپ بارادى.

ويتكەنى، اينالانى جايلاعان قىمباتشىلىق تەاتردى دا اينالىپ وتپەيتىنى انىق.

كۇنى كەشە، ءبىزدىڭ دەپۋتاتتاردىڭ ىشىنەن «قازاقستاندا كەز-كەلگەن ازاماتتىڭ ءومىر ءسۇرۋى ءۇشىن ايىنا 100 مىڭ تەڭگە جەتەدى»، - دەپ جۇرتتى شۋلاتىپتى.

حالىق دەپۋتاتتى جەردەن الىپ، جەرگە سالىپ «100 مىڭ تەڭگە قايدا جەتەدى؟»، - دەپ وكپەلەدى.

ءدال وسى كەزدە ەكى جىلعا جۋىق ۋاقىت بويى بىرنەشە بۋحگالتەرلەرمەن اقىلداسىپ، ءوزىم جاۋابىن تاپپاي جۇرگەن ءبىر سۇراقتى وزدەرىڭىزگە قويۋعا بەل بۋدىم.

ەندىگى سۇراق: «الاتاۋ» ءداستۇرلى ونەر تەاترىنىڭ كاسسيرى سارسەنوۆا ا. م. ءۇش بالانىڭ اناسى، يپوتەكا تولەپ وتىر، ايلىعى - 74 705 تگ. ءدال وسىنداي جاعدايداعى كونترولەر راحىمگاليەۆا گ. ۋ. 72 791 تگ الادى. ال ءۇيى جوق ءۇش بالانىڭ اناسى كونترولەر تابانوۆا ر. س. 67 044 تگ ايلىقتى قاناعات تۇتۋعا ءماجبۇر. (تاعى سول سياقتى 100-دەن اسا مىسال كەلتىرىپ بەرە الامىن)

ايتىڭىزدارشى، دۇكەندەگى باعالارمەن بالالاردىڭ قاراپايىم نەگىزگى قاجەتتىلىكتەرىن ەسكەرە وتىرساق، كورسەتىلگەن اقشانى ولار 30 كۇنگە قالاي جەتكىزبەك؟!

جاۋابىن سىزدەر بىلۋلەرىڭىز كەرەك. ولاي دەيتىن سەبەبىم، مەملەكەتتىڭ شەشۋشى لاۋازىمدارىنا ورنالاسىپ، تەلەديداردان «قازاقستان دامىپ كەلە جاتىر، ەلدىڭ جاعدايى جامان دەيتىندەر ەكسترەميستەر، پوپۋليستەر مەن ارانداتۋشىلار» دەپ ايدار تاعىپ وتىرعان وزدەرىڭىز.

مەنى دە سول قاتارعا وڭاي قوسپاۋلارىڭىز ءۇشىن سۇراعىما قاناعاتتانارلىق جاۋاپ تاۋىپ بەرە الساڭىزدار قىزمەتىمدى ءوز ەركىممەن بوساتىپ، سىزدەردىڭ تاراپتارىڭىزعا بىردە ءبىر جامان ءسوز ايتپاي، بەرگەن بارلىق ماداق-اتاقتارىڭىزدى قايتارىپ بەرىپ، سونىمەن قاتار ايتىستان ۇتقان «اسىل دومبىرامدى» سىيعا تارتۋعا ۋادە بەرەمىن.

ەرتەڭگە دەگەن ۇمىتپەن رينات زايتوۆ

Abai.kz