سمايىلوۆ توقاەۆقا ۇكىمەتتىڭ 2023 جىلى اتقاراتىن جۇمىستارىنىڭ نەگىزگى باعىتتارى تۋرالى باياندادى، دەپ جازادى "ادىرنا" پورتالى. 

اقوردانىڭ حابارلاۋىنششا، قاسىم-جومارت توقاەۆقا ونىڭ سايلاۋالدى باعدارلاماسىن ىسكە اسىرۋ ءۇشىن جۇرگىزىلىپ جاتقان جۇمىستار مەن جوسپارلار، ۇكىمەتتىڭ ەكونوميكالىق ساياساتى، سونداي-اق ينفلياتسيانى تومەندەتۋ، مۇناي-گاز جانە ەنەرگەتيكا سالالارىن، وڭدەۋ ونەركاسىبىن، اۋىل شارۋاشىلىعىن، كاسىپكەرلىكتى جانە ەكونوميكانىڭ باسقا دا سەكتورلارىن دامىتۋ شارالارى جونىندە ەگجەي-تەگجەيلى اقپارات بەرىلدى.

ء"اليحان سمايىلوۆ 44 رەتتەۋ سالاسىندا بيزنەسكە كەدەرگى كەلتىرەتىن 10 مىڭعا جۋىق تالاپتى جويۋ جانە قايتا قاراۋ، شاعىن جانە ورتا بيزنەستەگى جۇمىسپەن قامتىلعاندار سانىن 3,8 ميلليون ادامعا دەيىن ارتتىرۋ، 38 مىڭ جۇمىس ورنىن اشا وتىرىپ، قۇنى 4,2 تريلليون تەڭگە بولاتىن 289 جاڭا ينۆەستيتسيالىق جوبانى ىسكە اسىرۋ، بىرقاتار ءىرى ينفراقۇرىلىم نىسانىن سالۋ جانە باسقا دا جۇمىستاردى اتقارۋ كوزدەلىپ وتىرعانىن جەتكىزدى", - دەلىنگەن حابارلامادا.

سونىمەن قاتار پرەزيدەنت ۇكىمەتتىڭ ىشكى نارىقتى وتاندىق ءوندىرىس تاۋارلارىمەن قامتاماسىز ەتۋ، ازىق-تۇلىك تاۋارلارىنىڭ تۇراقتاندىرۋ قورلارىنىڭ قىزمەتىن قايتا جاساقتاۋ، جاڭا فورماتتاعى مەكتەپتەر سالۋ، اۋىلدىق دەنساۋلىق ساقتاۋ نىساندارىن جاڭعىرتۋ، ازاماتتاردى جۇمىسپەن قامتۋ جانە باسقا دا جوسپارلارىمەن تانىستى. بۇدان بولەك، پرەمەر-مينيستر ەكسپورتتى، ناقتى جالاقىنى جانە جالپى ەكونوميكانىڭ ءوسىمىن ارتتىرۋدى، سونداي-اق ينفلياتسيانى تومەندەتۋدى قامتيتىن رەسپۋبليكانىڭ الەۋمەتتىك-ەكونوميكالىق دامۋىنا قاتىستى الداعى جىلعا ارنالعان بولجامىن جەتكىزدى.

مەملەكەت باسشىسى ۇكىمەتكە سايلاۋالدى باعدارلامانى ورىنداۋ جونىندە كەشەندى شارالار قابىلداۋدى، سونداي-اق مەملەكەتتىڭ ماكروەكونوميكالىق جوسپارلارى مەن الەۋمەتتىك مىندەتتەمەلەرىن ىسكە اسىرۋدى تاپسىردى.

پرەزيدەنت ۇكىمەتكە ەلىمىزدە قولايلى ينۆەستيتسيالىق جانە بيزنەس-احۋالدى قامتاماسىز ەتۋ، ينفلياتسيا دەڭگەيىن تومەندەتۋ، دەنساۋلىق ساقتاۋ سالاسىنداعى جاعدايدى جاقسارتۋ، جىلىتۋ ماۋسىمىنىڭ بارىسىن ەرەكشە باقىلاۋدا ۇستاۋ جونىندە بىرقاتار مىندەت جۇكتەدى.

Abai.kz