2021 جىلى رەسەيدە مەملەكەتتىك دۋما تاراپىنان ارنايى ۇسىنىس جاسالدى. ۇسىنىس ارتىنشا پەسكوۆتىڭ پىكىرىندە دە كورىنىس تاپتى. ول "رەسەيدە ءبىر عانا پرەزيدەنت بولۋى كەرەك، قالعان سۋبەكت باسشىلارى مەن رەسەي ىشىندەگى رەسپۋبليكا پرەزيدەنتتەرى بۇل تيتۋلدى يەمدەنبەۋى ءتيىس" دەگەن پىكىرىن ايتتى.

2021 جىلعا دەيىن رەسەيدە ەكى پرەزيدەنت تيتۋلى بولدى. بىرەۋى پۋتين، ەكىنشىسى تاتارستان پرەزيدەنتى ميننيحانوۆ. بىرنەشە جىل بۇرىن  قادىروۆ پرەزيدەنت دەگەن ستاتۋستان ءوز ەركىمەن باس تارتتى. تاتارستان بۇل تيتۋلدان باس تارتۋعا كوندىگۋگە دايىن ەمەستىگىن اڭعارتتى. "تالقىلاۋعا، تۇسىندىرۋگە ۋاقىت كەرەك" دەدى.

"تاتارستان پارلامەنتى فەدەرالدى زاڭدى مويىنداماي وتىر". رەسەي ساراپشىلارى وسىلاي دەپ شۋلاۋدا. تاتارستان پارلامەنتى قازىرگى پرەزيدەنت ميننيحانوۆتى "پرەزيدەنت ستاتۋسىندا قالادى" دەدى. "ەل حالقى قازىرگى پرەزيدەنتكە داۋىس بەرەر ساتتە ول پرەزيدەنتتىككە كانديدات رەتىندە ءتۇستى، سوندىقتان وزگەرىستەر كەلەسى باسشىدان باستالادى" دەيدى ولار.

ماسكەۋ "پرەزيدەنت" دەگەن ءسوزدىڭ ورنىنا "باسشى" دەگەن ءسوز قولدانىلۋى ءتيىس دەگەندى 2015 جىلى ەنگىزگەن بولاتىن. تاتارستان پارلامەنتى كونستيتۋتسياعا وزگەرىس ەنگىزىپ، ەندىگى تاڭدا كەلەسى پرەزيدەنتتى پرەزيدەنت ەمەس "تاتارستان رەسپۋبليكاسىنىڭ رايس-باسشىسى" دەپ وزگەرتۋدى ۇسىندى. ماسكەۋ "تاتارستان رەسپۋبليكاسىنىڭ باسشىسى" ءسوزى قولدانىلۋى كەرەك دەگەن بولاتىن. تاتار دەپۋتاتتارى "تاتارستان رەسپۋبليكاسىنىڭ رايسى" دەپ قولدانا بەرۋگە بولاتىنىن، بۇل ءسوزدىڭ مادەني تۇرعىدان تاتار حالقىنا جاقىنداۋ ەكەندىگىن ايتتى. "رايس" ءسوزى اراب تىلىندە كوبىنە "مەملەكەت تىزگىنىن ۇستاۋشى" دەگەن ماعىنا بەرەدى. ارينە، بۇل نۇسقا كرەملگە ۇنامايدى.

كرەمل "قازان فەدەرالدى زاڭدى ورەسكەل بۇزۋىن جالعاستىرۋدا" دەگەن سيپاتتاعى ماقالالاردى سايتتارعا شىعارتۋدا. تاتار دەپۋتاتتارىنىڭ قازىرگى ۇسىنىسى قابىلداناتىن بولسا، وندا 2025 جىلعا دەيىن ميننيحانوۆ "پرەزيدەنت" دەپ اتالا بەرمەك.

كا مىرزا

Abai.kz