بۇگىن استانادا «ازياگازچۋندجا» جشس قىلمىستىق ەپيزودىنا قاتىستى قايرات بورانباەۆتىڭ سوتى ءوتىپ جاتىر. 

بۇگىن سوتتا قايرات بورانباەۆ ءسوز الىپ، وزىنە قاتىستى سوت پروتسەسسى جايلى پىكىرىن ايتىپتى.

قايرات بورانباەۆ:

«30 جەلتوقسان كۇنى سوتتا وتىرامىن دەپ ەشقاشان ويلاماپپىن. سوت قارسى بولماسا، وسى ىسكە قاتىستى ءوز ويىمدى ەكى اۋىز سوزبەن جەتكىزگىم كەلەدى.

وسى 9 ايدىڭ ىشىندە ماعان قاتىستى ءتۇرلى جاعدايلار ورىن الدى. قازاقستاندا بولعان «قاڭتار وقيعاسى» وتباسىمەن (نازارباەۆ وتباسىن ايتادى) بايلانىسى بارلاردىڭ بارلىعىن قامتىعانىن تۇسەنەمىن. مەن دە سولاردىڭ ءبىرىمىن. ونى بارلىقتارىڭىز جاقسى بىلەسىزدەر.

بىراق، كونستيتۋتسيا كەپىلدىك بەرگەن «كىناسىزدىك بولجامى» بار. وندا بىلاي دەپ جازىلعان: «تۇلعا ونىڭ قىلمىسىن دالەلدەيتىن سوت شەشىمى كۇشىنە ەنبەي جاتىپ قىلمىسكەر دەپ ەسەپتەلمەيدى». الايدا وسى 9 اي بويى قۇزىرلى ورگاندار (قما)  مەنى جانە مەنىڭ سەرىكتەستىمدى ايىپتاۋمەن كەلەدى. ءبىز بۇل ءىستى - «شىندىقتى بۇرمالاۋدىڭ ۇلگىسى» دەپ اتايمىز. بۇل – بيزنەستى قورقىتىپ-ۇركىتۋ. نەگىزگى ماقساتتارى وسى عوي.

ءبىز قورعاۋشىلارىمىزدىڭ تالاپتارىن قولدايمىز. ءوزىمىزدى بالاعاتتاۋعا جول بەرمەيمىز. ولاردىڭ (قما-نىڭ) بارلىق ايتقاندارى – جاپتىم-جالا. جۇرەگىڭ اينىيتىن جالا. قىلمىستىق تەرگەۋ – ەسەپ ايىرىسۋعا اينالماۋى كەرەك!

بۇل قورىتىندىسى الدىن-الا شەشىلىپ قويعان قويىلىم. بۇل قويىلىمدا قورعالۋشى تاراپتىڭ ۋاجدەرىن سوت بيلىگى مەن تەرگەۋشى ورگاندار اياققا تاپتايدى.

زاڭ الدىندا بارلىعى تەڭ. سوندىقتان بارلىعىمىز ادىلەتتىلىكتى تالاپ ەتۋگە قۇقىلىمىز. تازا، ءادىل سوتتى قالايمىز. مەن دە وسى زالدا ءادىل، تازا سوت وتەدى دەن ۇمىتتەنەمىن.

قۇرمەتتى سوت! مەن بيزنەسپەن 90-شى جىلداربان بەرى اينالىسىپ كەلەمىن. بۇل – قاراپايىم ساتىپ الۋ مەن ساتۋدىڭ كەلىسىمى عانا. ودان اركىم ءوز پايداسىن الادى. 2019 جىلدىڭ قورىتىندىسى بويىنشا، الەمدىك توپ 4 اۋديتورلىق كومپانيانىڭ ءبىرى سانالاتىن اۋديتتىك كومپانيانىڭ تەكسەرىسى كورسەتكەندەي، كومپانيا 300 ملن دوللار پايدا تاپقان. تەك قانا ءبىزدىڭ كەلىسىمدەر بويىنشا كومپانيا 220 ملن دوللار پايدا كورگەن. وندا قانداي ماسەلە جايلى ءسوز بولىپ وتىر؟ بۇل ابسۋرد. «Qazaq Gaz» بەن «ازياگازچۋندجا» كەلىسىمشارتىندا باعا فورمۋلاسى كورسەتىلگەن. وندا «قازترانسگازدىڭ» مارجاسى 10 دوللار ەكەنى كورسەتىلگەن. دەمەك، كەلىسىمشارتتى تۇزگەنى ءۇشىن عانا ولار 20 ملن دوللار پايدا تاپتى دەگەن ءسوز. سوندا قانداي زيان تۋرالى ءسوز بولۋ مۇمكىن؟..»، - دەيدى...

قايرات بورانباەۆ ەكس-پرەزيدەنت نازارباەۆتىڭ قىزى داريعا نازارباەۆانىڭ بۇرىنعى قۇداسى. ول «Forbes Kazakhstan» رەيتينگى بويىنشا، قازاقستانداعى ەڭ باي ەلۋ كاسىپكەردىڭ ءبىرى. بورانباەۆ جايلى حابار نازارباەۆتىڭ نەمەرە ءىنىسى قايرات ساتىبالدىۇلى ۇستالعاننان كەيىن ەكى كۇننەن كەيىن شىقتى.

جۋىردا قارجىلىق مونيتورينگ اگەنتتىگى «ازياگازچۋندجا» جشس قۇرىلتايشىلارى قايرات بورانباەۆ پەن رومان ناحانوۆقا جانە «Qazaq Gaz» اق باسقارما توراعاسىنىڭ بۇرىنعى ورىنباسارى تاير جانۇزاققا قاتىستى ءىستى تەرگەۋدى اياقتادى. ولارعا سۇيىتىلعان مۇناي گازىن ساتىپ الۋ كەزىندە 14,5 ملرد تەڭگە ۇرلاۋ جانە قىلمىستىق كىرىستەردى زاڭداستىرۋ فاكتىلەرى بويىنشا ايىپتار تاعىلۋدا.

بۇعان دەيىن اگەنتتىك قايرات بورانباەۆتىڭ ۇستىنەن كۆازيمەملەكەتتىك سەكتوردا اسا ءىرى كولەمدە قاراجات جىمقىرۋ فاكتىسىمەن ءىس قوزعاپ، يزولياتورعا قاماعان بولاتىن.

قازىرگى ۋاقىتتا ءىرى مولشەردە، ونىڭ ىشىندە شەتەلدە قىلمىستىق كىرىستى زاڭداستىرۋ بەلگىلەرى بار نەعۇرلىم رەزونانستىق ىستەردى تەرگەپ-تەكسەرۋ ەرەكشە باقىلاۋدا.

Abai.kz