ءبىزدءىڭ ايتپاعىمىز, دۇنيەجۇزى قازاقتارىنىڭ نەمەسە الەمدىك دىندەر جەتەكشىلەرىنىڭ قۇرىلتايى ەمەس. شىمكەنتتە وتەتىن قازاق  بلوگگەرلەرىنىڭ جيىنى جونىندەگى اڭگىمە. ينتەرنەتتىڭ قازاق تىلىندەگى سەگمەنتىن  قالىپتاستىرۋعا  ءھام دامىتۋعا  ۇلەس قوسىپ جۇرگەن بۇل  جاستار وسىمەن رەسمي تۇردە ءۇشىنشى رەت جينالماق. بىراق، «بۇل جيىن بۇرىنعىدان وزگەرەك» بولاتىن ءتۇرى بار.  سەبەبى، بلوگگەرلەردى قولداۋعا وڭتۇستىك قازاقستان وبلىسىنىڭ اكىمى اسقار مىرزاحمەتوۆ ءاۋ باستا-اق كەلىسىم بەرگەن-ءدى. ءسويتىپ جۇرگەندە  مەملەكەتتىك حاتشى مارات ءتاجيننىڭ ءوزى بلوگشىلاردى دا «ادام قاتارىنا» قوسا قويدى. قىسقاسى،  BlogCamp-2013 جاڭا سيپاتتا وتەتىن ءتۇرى بار.

ءبىزدءىڭ ايتپاعىمىز, دۇنيەجۇزى قازاقتارىنىڭ نەمەسە الەمدىك دىندەر جەتەكشىلەرىنىڭ قۇرىلتايى ەمەس. شىمكەنتتە وتەتىن قازاق  بلوگگەرلەرىنىڭ جيىنى جونىندەگى اڭگىمە. ينتەرنەتتىڭ قازاق تىلىندەگى سەگمەنتىن  قالىپتاستىرۋعا  ءھام دامىتۋعا  ۇلەس قوسىپ جۇرگەن بۇل  جاستار وسىمەن رەسمي تۇردە ءۇشىنشى رەت جينالماق. بىراق، «بۇل جيىن بۇرىنعىدان وزگەرەك» بولاتىن ءتۇرى بار.  سەبەبى، بلوگگەرلەردى قولداۋعا وڭتۇستىك قازاقستان وبلىسىنىڭ اكىمى اسقار مىرزاحمەتوۆ ءاۋ باستا-اق كەلىسىم بەرگەن-ءدى. ءسويتىپ جۇرگەندە  مەملەكەتتىك حاتشى مارات ءتاجيننىڭ ءوزى بلوگشىلاردى دا «ادام قاتارىنا» قوسا قويدى. قىسقاسى،  BlogCamp-2013 جاڭا سيپاتتا وتەتىن ءتۇرى بار.

جالپى، «BlogCamp» اتالىپ كەتكەن  بۇل جيىندى ءبىزدىڭ قىز-جىگىتتەر «بلوگقۇرىلتاي» دەپ قازاقشالاپ الدىق. بلوگكەمپ جيىندارىنىڭ رەسمي باسقوسۋلاردان، ءتۇرلى پارتيالار مەن ساياسي ۇيىمداردىڭ  بيىك مىنبەرلى جينالىستارىنان  ەڭ باستى ايىرماشىلىعى- BlogCamp-ءتى ۇيىمداستىرۋعا  جوعارىدان بۇيرىق تۇسپەيدى. قىزىعۋشىلار  وزدەرى ۇيىمداستىرادى. ادەتتە،  بلوگگەرلەردىڭ  كەلىسىمى ينتەرنەت ارقىلى  جۇرەدى. سودان سوڭ ولار ارالارىنان بىرنەشە  ۇيلەستىرۋشىنى تاڭداپ الادى دا، ورتاق مۇددەگە بايلانىستى اتقارىلاتىن جۇمىستاردى سولارعا تاپسىرادى. ال، بلوگكەمپكە قاتىسۋشىلار قاجەت كەزىندە ولارعا كومەكتەسىپ وتىرادى. نەگىزى دۇنيەجۇزىندە بلوگكەمپكە كوبىنە بلوگگەرلەر قاتىسادى. ال، قازاقستاندا  بلوگقۇرىلتايعا Iت ماماندار، بلوگگەرلەر، جاڭا مەديا تەحنولوگيالارىنىڭ  ماماندارى، جۋرناليستەر، ستۋدەنتتەر، زەرتتەۋشىلەر قاتىسا بەرەدى. ءتىپتى،  بلوگشىلاردىڭ اراسىندا ساياساتكەرلەر دە جۇرەدى بىزدە. الدىڭعى  بلوگقۇرىلتايدا سولاي بولعان. قىسقاسى،  قازاقتىڭ BlogCamp-ءى وزگەلەردىكىنەن باسقاشالاۋ سيپاتقا يە. وسى جولى قازاق جاستارىنىڭ ينتەرنەتتەگى  بەلسەندى ءبىر توبىن  رەسمي بيلىك، دالىرەك ايتقاندا جەرگىلىكتى اتقارۋشى بيلىك قولداپ وتىر. وڭتۇستىك قازاقستان وبلىسىنىڭ باسشىلارى شىمكەنتتە  وتەتىن بلوگقۇرىلتايدى ۇيىمداستىرۋعا بەلسەنە ارالاسىپ جاتقان جايى بار. ءبىزدىڭ نازارىمىزعا ىلىككەن  ءبىرىنشى جاڭالىق وسى بولدى.

شاماسى وبلىس باسشىلارى  بلوگگەرلەردىڭ  اقپارات كەڭىستىگىندە، سونىڭ ىشىندە «جاڭا مەديا» سالاسىندا كادىمگىدەي  كۇشكە اينالىپ  كەلە جاتقاندىعىن سەزىنگەن ءتارىزدى. ءتىپتى، وبلىس اكىمىنىڭ بۇل قادامىن  «بيلىكتىڭ جاستار الدىنداعى جاۋاپكەرشىلىگىن سەزىنۋى» دەپ تە باعالاۋعا  بولادى. ادەتتە،  بەلسەندىسى بار، بەلسەندى ەمەسى بار، ءبىراز جاستاردىڭ باسىن «جاسوتان» ارقىلى  قوساتىن  بيلىك  وسى جولى «ءوز بەتەرىمەن جۇرگەن» بلوگشىلارعا نازار اۋدارىپ وتىر. ەڭ قىزىعى  بلوگگەرلەردىڭ  ءۇشىنشى قۇرىلتايىنا قولداۋ بىلدىرەتىندىكتەرى تۋرالى وڭتۇستىك قازاقستان وبلىسى اكىمى اپپاراتى باسشىسىنىڭ ورىنباسارى-ءباسپاسوز قىزمەتىنىڭ  باسشىسى بەرىك ءۋالي وتكەن كۇزدە-اق ايتقان ەدى. قازىر شەنەۋنىك بولعانىمەن، بۇرىن كاسىبي جۋرناليست بولعان، ءوزى دە ينتەرنەتتە  بلوگ جۇرگىزگەن بۇل ازامات  رەسمي بيلىكتىڭ جۇمىسىن ناسيحاتتاۋدا بلوگگەرلەردىڭ، الەۋمەتتىك جەلىلەردە بەلسەنىپ جۇرەتىندەردىڭ مۇمكىندىگى زور ەكەندىگىن جاقسى بىلسە كەرەك. ايتەۋ، بلوگشىلار قۇرىلتايىن وبلىس باسشىلارىنىڭ قولداۋعا ءازىر ەكەندىگىن ەلدەن بۇرىن ايتقان-دى. بىرەۋ سىبىرلادى ما، جوق الدە وڭتۇستىكتى باسقارىپ وتىرعان ازاماتتار شىنىمەن دە ينتەرنەتتىڭ بەتالىسىن سەزىنە قويدى ما، قايدام،  ايتەۋىر وڭتۇستىك وڭىردەگى  ءتاۋىر ىستەردى  ينتەرنەت ارقىلى بۇقاراعا جەتكىزۋ دە  ءتيىمدى ەكەندىگىن  بۇل وبلىستىڭ باسشىلارى وزگەلەردەن ءسال-ءپال ەرتەرەك سەزىنە قويدى. جارق ەتكەن جاقسىلىعى  نازاردان تىس قالىپ،  وعاش قىلىقتارى بايقالسا بارلىق ءباسپاسوز شۋىلداپ  قويا بەرەتىن شىمكەنتتىكتەردىڭ ءتاۋىر تابىستارى جايلى ەل-جۇرتتى حاباردار ەتۋ  ءۇشىن شىنىندا دا ينتەرنەت  وتە ءتيىمدى.  ايتپەسە، 2011 جىلعى بلوگقۇرىلتاي الماتىدا، 2012 جىلعىسى استانادا وتكەن-ءدى. سول جيىنداردا «وۋ، مۇندا قازاقتىڭ بەلسەندى جاستارى جينالىپ قالعان ەكەن، بارەكەلدى!» دەپ  توبە كورسەتكەن شەنەۋنىكتى كورمەدىك. احمەتجان ەسىموۆ تە، يمانعالي تاسماعامبەتوۆ تا «بلوگگەرلەر» دەگەن ءبىر قاۋىم ەل بار ەكەندىگىن ەستەرىنە العان جوق، كوزگە دە ىلمەدى. ال، اسقار مىرزاحمەتوۆ  وزگە باستامالارىن ايتپاعاننىڭ وزىندە، بلوگگەرلەرگە قولداۋ بىلدىرۋىمەن-اق وزگەلەردەن وزىپ شىعا  كەلدى. قازىر وبلىس باسشىلارى  بلوگقۇرىلتايدىڭ بارىنشا جاقسى وتۋىنە  مۇددەلى بولىپ وتىر. بىرىنشىدەن،  بۇل -قازاقتىڭ جاستارىن  قولداۋ بولسا، ەكىنشىدەن قايمانا قازاق قونىس قىلعان قازعىعۇرتتىڭ باۋرايى مەن تۇركىستاننىڭ  توڭىرەگىن ءارىسى الەمگە، بەرىسى ەلىمىزدىڭ وزگە وڭىرلەرىنە  تاعى ءبىر تانىتۋ. ۇشىنشىدەن، بيلىكتىڭ قامقورلىعى  بلوگگەرلەر ءۇشىن دە جامان بولمايدى.

ايتپاقشى، «قامقورلىق» دەگەندە  مەملەكەتتىك حاتشى مارات ءتاجيننىڭ ايتقاندارى ەسكە تۇسەدى. اقپان ايى اياقتالار تۇتسا ءبىراز «مىقتىنى» جيناپ، باسقوسۋ وتكىزگەن-ءدى ءتاجين مىرزا. ونى ءبىز ايتقانبىز. پىكىر بىلدىرگەنبىز. سول جيىندا  بلوگگەرلەر تۋرالى دا ايتىپ ەدى مەملەكەتتىك حاتشى. بلوگگەرلەردى قولداۋ كەرەكتىگىن ءسوز ەتكەن. ءبىراز جۇرت ماسەلەنىڭ  ءمانىسىن تۇسىنبەي «ءتاجيننىڭ ءتىزىمى» دەگەن تىركەس تە  پايدا بولدى ينتەرنەتتە. ءبىر قاراعاندا وڭتۇستىكتىڭ باسشىلارى بلوگقۇرىلتايدى ءتاجين ايتاقان سوڭ وتكىزىپ جاتقانداي كورىنەدى. بىراق، قۇرىلتايدىڭ شىمكەنتتە وتەتىندىگى وتكەن جىلى بەلگىلى بولعان، ال ونى اتقارۋشى بيلىكتىڭ قولدايتىنى جاڭا جىل  كىرگەن بەتتە انىق بولدى. ايتپەسە، «ءتاجين ءتىزىمىن» جاساۋعا جانتالاسىپ جاتقان ەشكىم جوق مۇندا. بىراق، ءتاجيننىڭ ايتقانىن ەسكەرىپ، بلوگگەرلەرگە  «قامقور» بولعىسى كەلەتىندەر جاڭبىردان  كەيىنگى ساڭىراۋقۇلاقتاي قاپتاپ شىقپاسىنا ەشكىم كەپىلدىك بەرە المايدى. ازىرگە ءبىراز اكىم اڭ-تاڭ بولىپ وتىرعان شىعار. شىمكەنتتە  وتەتىن قۇرىلتايدان سوڭ مىرزاحمەتوۆتى مىسال ەتىپ شىعا كەلۋى مۇمكىن. ال، بلوگگەرلەردىڭ كۇنى بۇگىنگە دەيىن ءوز ەرىكتەرىمەن جۇرگەنى وتىرىك ەمەس ەدى. اسىرەسە، ورىس تىلىندە جازىپ-سىزاتىندار جەكە ءبىر «الەم». وتاندىق باق سياقتى  بلوگوسفەرامىز دا ەكى ءتۇرلى «ءان» ايتاتىن. قازاقشا جانە ورىسشا. ورىسشا  جازعىشتار وزدەرىن قازاقستاندىق قوعامعا ىقپال ەتۋشى «وراسان زور كۇشپىز»  دەگەن  سەزىمدە جۇرەدى ادەتتە. قازاقشا جازاتىن بلوگشىلار ءدال ولارداي «ىقپالدىمىز»  دەمەيدى. الايدا،  قاي تىلدە جازسا دا ءبىزدىڭ ەلدە بلوگشىلار كەرەمەت ىقپالدى ەمەس. ادەتتە، «اۋزى دۋالى» دەگەن «مارتەبەسى» بار،    تەلەديداردان كوپ كورىنگەن، كەز-كەلگەن ماسەلەگە پىكىر ايتقىش، اتاق-داڭقتارى دا جەر جاراتىن ادامداردىڭ ايتقاندارىن عانا تىڭدايدى ءبىزدىڭ قوعام. ايتپەسە،. بلوگوسفەرادا  بەلسەنىپ جۇرگەندەر از ەمەس. ءتىپتى، بلوگشىلاردىڭ اراسىندا  كوسەمسىپ كەتەتىن  جۋرناليستەردى دە ۇيالتقاندار بولعان. Rafaello دەگەن اتپەن  تانىلعان ءبىر بلوگشى تالاي مارتە ءبىزدى سىناعان-دى. جۋرناليستەردىڭ كەيدە ماتەريالداردى  سايتتار مەن بلوگتاردان «ۇرلاپ»  باساتىندىعىن، اقپاراتتى تەكسەرمەيتىندىگىن سىناعان. ادەيى قاۋەسەت تاراتىپ، سوعان ءبىراز جۇرتتى سەندىرگەن كەزدەرى دە بولدى. قىسقاسى، قاراپايىم جۇرت بىلمەسە دە مىقتى بلوگشىلار كوپ بىزدە. سولار تاعى باس قوسادى وسى جولى.

ايتپاقشى، وسى جولعى بلوگقۇرىلتايدىڭ تاعى ءبىر ەرەكشەلىگى بار. ول - باسقوسۋدىڭ بەيرەسمي  بولىمدەرىنىڭ تاۋ باۋرايىنداعى دەمالىس ورىندارىنىڭ بىرىندە وتەتىندىگى. ءبىر-ءبىرىن ينتەرنەتتە عانا بىلەتىن بلوگشىلار ناۋرىزدىڭ قوڭىرسالقىن كەشتەرىندە ارقا-جارقا ارالاسىپ، وففلايندا جۇزدەسۋ مۇمكىندىكتەرى مولىراق بولۋى ءۇشىن ۇيىمداستىرىلدى بۇل لاگەر. قازىردىڭ وزىندە بلوگقۇرىلتايعا قاتىسۋشىلار  www.blogcamp.kz/ سايتىندا تىركەلىپ جاتىر. باسقوسۋدا  كوتەرىلەتىن تاقىرىپتار دا بەلگىلەنۋدە. الايدا،  تىركەلۋ 16 ناۋرىزدا اياقتالاتىن كورىنەدى. وڭتۇستىككە ناقتى قانشا  بلوگگەردىڭ كەلەتىندىگى ءبىر اپتادان سوڭ  بەلگىلى بولماق. ال، قازاق ينتەرنەتىندە وزىندىك قولتاڭباسى بار ءبىراز ازاماتتار  بۇل  قۇرىلتايدىڭ وزگەشە دەڭگەيدە وتەتىندىگىنەن ءۇمىتتى.

Abai.kz