استانادا وڭىرلىك مەرزىمدى باسىلىمداردىڭ العاشقى فورۋمى ءوتىپ جاتىر. ءىس-شارانى ۇيىمداستىرۋشى – قر اقپارات جانە قوعامدىق دامۋ مينيسترلىگى.

فورۋمنىڭ العى سوزىندە پرەمەر-ءمينيستردىڭ ورىنباسارى التاي كولگىنوۆ بۇل جيىننىڭ ماڭىزدىلىعىن اتاپ ءوتتى.

«مەملەكەت باسشىسى سايلاۋالدى باعدارلاماسىندا ەلىمىزدەگى اقپاراتتىق ساياساتى، جاستار ساياساتىن، ازاماتىق قوعاممەن بايلانىس تەتىكتەرىن جەتىلدىرۋ بويىنشا ناقتى تاپسىرمالار بەرىپ، مىندەتتەر قويدى. وسى تۇرعىدا وڭىرلىك باق ماسەلەلەرى، اتاپ ايتقاندا، وقىرماندار سانى مەن باسىلىم تارالىمىن قايتا كوبەيتۋ، قارجىلاندىرۋ جانە تەحنيكالىق جاڭارتۋ، ۋاقىتىلى جەتكىزۋ مەن جەرگىلىكتى باق احۋالىن جاقسارتۋ باعىتىندا مينيسترلىك جانە جەرگىلىكتى اتقارۋشى ورگاندارمەن بىرگە ءتيىمدى ءارى ناقتى شەشۋ جولدارىن پىسىقتاۋ قاجەت دەپ ەسەپتەيمىز»، - دەدى ا.سەيدىرۇلى.

پرەمەر-ءمينيستردىڭ ورىنباسارى، سونىمەن بىرگە، ايماقتىق بۇقارالىق اقپارات قۇرالدارىندا ءار ءوڭىردىڭ وزىندىك ەرەكشەلىكتەرىن ەسكەرە وتىرىپ، مەملەكەتتىك اقپاراتتىق ساياساتتى ءتيىمدى جۇزەگە اسىرۋ فورماتىن قالىپتاستىرۋ قاجەتتىگىن ايتتى. وعان قوسا، وتاندىق مەديا كەڭىستىكتىڭ قاۋىپسىزدىگىن قامتاماسىز ەتۋگە دە نازار اۋداردى.

«سول ءۇشىن ەلىمىزدەگى باق وكىلدەرىنىڭ كاسىپقويلىعى مەن ساپاسىن ودان ءارى ارتتىرۋ جۇمىستارىن جالعاستىرۋىمىز قاجەت. حالىقتى ارزان دۇنيەلەرمەن ەمەس، پايدالى اقپاراتپەن سۋسىنداتىپ، رۋحاني، مادەني، تانىمدىق، ۇلتتىق قۇندىلىقتارمەن بايىتا بىلگەنىمىز ابزال»، - دەدى ول.

مۇنان سوڭ ءسوز العان اقپارات جانە قوعامدىق دامۋ ءمينيسترى دارحان قىدىرالى «وتكەن جىلى وڭىرلەرگە ساپارلار كەزىندە كوپتەگەن باسىلىمداردىڭ رەداكتسياسىنا ارنايى بارىپ، جاي-كۇيىمەن جاقىن تانىسقان ەدىك. سول كەزدە وڭىردەگى وزەكتى ماسەلەلەردى استانادا ويلاسامىز دەپ ۋادە ەتكەنبىز. سونىڭ ورايى بۇگىن كەلىپ وتىر»، - دەدى مينيستر.

سونىمەن بىرگە دارحان قۋاندىقۇلى وڭىرلىك مەرزىمدى باسىلىمداردىڭ جاعدايىنا ناقتى عىلىمي زەرتتەۋ جاسالۋ كەرەكتىگىن، مۇنى قازاقستاندىق قوعامدىق دامۋ ينستيتۋتى جاساۋ كەرەكتىگىن ايتتى. بۇل تۇرعىدا قازىر تالقىلانىپ جاتقان «ماسس-مەديا تۋرالى»، اقپاراتقا قول جەتكىزۋ، اقپاراتتىق دوكترينا تالقىلاۋدان وتكەنىن مالىمدەدى.

"ايماقتاعى باسىلىمداردى قارجىلاندىرۋ تەتىگى مەن ەرەجەلەرىن قايتا قاراستىرىپ جاتىرمىز. باق-قا بەرىلەتىن مەملەكەتتىك تاپسىرىستىڭ تالاپتارىن جەڭىلدەتۋگە مۇددەلىمىز. اتاپ ايتقاندا، جەرگىلىكتى باق-تى قولداۋ تاريفتەرى 2019 جىلدان بەرى وزگەرمەگەنى بەلگىلى. سوعان بايلانىستى ءبىز تاريفتەردى ۇلعايتۋدى جوسپارلاپ وتىرمىز. بۇل شارالار جوبالىق تاسىلدە وڭىرلىك مەملەكەتتىك اقپاراتتىق تاپسىرىستى قالىپتاستىرۋعا مۇمكىندىك بەرەدى. سونداي-اق جەرگىلىكتى باق-قا جاڭا سەرپىن بەرىپ، وڭ اسەر ەتەدى دەگەن ۇمىتتەمىز»، - دەدى دارحان قىدىرالى.

ايتا كەتۋ كەرەك، فورۋمعا ەلىمىزدىڭ ءار وڭىرىنەن 200-دەن استام دەلەگات قاتىسىپ جاتىر. ەكى كۇن بويى ءتۇرلى سەسسيالار، ماستەر-كلاسستار، تاعىلىمدى تالقىلار ۇيىمداستىرىلادى.

Abai.kz