مەملەكەت باسشىسى پرەمەر-ءمينيستردىڭ ءبىرىنشى ورىنباسارى رومان سكليارعا جانە پاۆلودار وبلىسىنىڭ اكىمى اسايىن بايحانوۆقا ەكىباستۇزداعى قالا تۇرعىندارىنىڭ پاتەرلەرىندە جانە الەۋمەتتىك نىسانداردا تەمپەراتۋرا رەجيمىن تۇراقتاندىرۋ ءۇشىن بارلىق قاجەتتى شارانى قابىلداۋدى تاپسىردى، دەپ حابارلايدى اقوردا.

سونىمەن قاتار پرەزيدەنت جىلىتۋ ماۋسىمىن جانە جوندەۋ، قالپىنا كەلتىرۋ جۇمىستارىنىڭ بارىسىن تۇراقتى باقىلاۋدا ۇستاۋعا تاپسىرما بەردى.

ەسكە سالايىق، 2022 جىلعى 27 قاراشادا ەكىباستۇز جىلۋ ەلەكتر ورتالىعىندا اپات بولدى. سالدارىنان قالا تۇرعىندارى جىلۋسىز قالدى. 28 قاراشا كۇنى تاڭەرتەڭ قالادا جەرگىلىكتى اۋقىمداعى توتەنشە جاعداي جاريالاندى. ەكىباستۇزداعى اپات بويىنشا تەرگەۋ باستالىپ، باس پروكۋراتۋرا تەرگەۋدىڭ ەكى ايعا دەيىن سوزىلاتىنىن ءمالىم ەتتى.

سونىمەن قاتار ۇكىمەتتىڭ كەڭەيتىلگەن وتىرىسىنا قاتىسقان پرەزيدەنت قاسىم-جومارت توقاەۆ ەكىباستۇز تۇرعىندارىنا جىلۋ جەلىسىندەگى اپاتتىڭ شىعىندارىن مەملەكەت پەن جەو يەسى ءبولىپ تولەسىن دەپ تاپسىرما بەردى.

بيىلعى 26 قاڭتاردا «ەكىباستۇزجىلۋەنەرگو» جشس-عا 1,1 ملن تەڭگەگە ايىپپۇل سالىنعانى بەلگىلى بولدى.

توتەنشە جاعداي كەزىندە زارداپ شەككەن پاتەرلەردى جوندەۋ جۇمىستارى جالعاسىپ جاتىر. 30 قاڭتارداعى مالىمەت بويىنشا، جوندەۋ 152 پاتەردە جاسالعان.

Abai.kz