قازاقستان رەسپۋبليكاسىنىڭ اقپارات جانە قوعامدىق دامۋ مينيسترلىگى ازىرلەپ، E-gov سايتىندا جاريالانعان «ماسس-مەديا تۋرالى» زاڭىنىڭ جوباسىمەن تانىسىپ شىقتىق. بۇرىن اۋىزشا ءباسپاسوز تۋرالى زاڭ دەپ ايتا بەرۋشى ەدىك، بۇل جوبا «ماسس-مەديا تۋرالى» دەپ اتالىپتى. جوبا ۇستىمىزدەگى جىلعى 2-اقپاندا ۇسىنىلىپتى دا تالقىلاۋ 16-ناۋرىزعا دەيىن جالعاسادى ەكەن. 70 باپتان تۇراتىن جوبا ۇزاقتاۋ كورىنگەن. سويتسەك بۇل جوبا ءىس جۇزىندە قازاقستان رەسپۋبليكاسىنىڭ «بۇقارالىق اقپارات قۇرالدارى تۋرالى» جانە «تەلەراديو حابارلارىن تاراتۋ تۋرالى» ەكى زاڭدى ءبىر اتاۋمەن بىرىكتىرىپ وتىرعانى بايقالادى.

جوبانىڭ باستى ارتىقشىلىعى مۇندا ءجۋرناليستىڭ قۇقىقتارى مەن مىندەتتەرى بارىنشا ناقتىلانىپ، جۋرناليست مارتەبەسى تۇڭعىش رەت بەلگىلەنىلىپتى. وتىز جىلدان بەرى ايتىپ جۇرگەن ماسەلەمىز. ول ءۇشىن جۋرناليستەردى باسقا جازعىشتاردان اجىراتاتىن «پرەسس كارتا» ەنگىزىلۋى دە مەن ءۇشىن قۇپتارلىق قادام. ءباسپاسوز كارتاسى جۋرناليستىك جوعارى ءبىلىمى بار، باق-تا كەمىندە ءۇش جىل، ديپلومى جوقتارعا كەمىندە بەس جىل تاجىريبەسى بار ازاماتتارعا بەرىلەدى. بۇل ءارى قاراي جۋرناليست مارتەبەسىن يەلەنگەندەردىڭ الەۋمەتتىك جاعدايلارىن شەشۋگە دە ىقپال ەتسە جاقسى بولار ەدى.

ارينە، مۇنداي قاعيدالار بلوگەرلەرگە، ينتەرنەت رەسۋرستاردا جۇمىس ىستەيتىندەرگە جاقپاۋى مۇمكىن. مەنىڭشە ولارعا ارنالعان باسقا زاڭ جوباسى ازىرلەنگەنى دۇرىس بولار ەدى.

جوبادا تاعى ءبىر اتاپ وتەتىن نارسە مەملەكەتتىك تىلگە قاتىستى تالاپتاردىڭ كۇشەيتىلۋى. ەڭ الدىمەن مەملەكەتتىك تىلىمىزدەگى تەلە-راديو باعدارلامالارىنىڭ كولەمى باسقا تىلدەردەگى تەلە-, راديوباعدارلامالاردىڭ جيىنتىق كولەمiنەن كەم بولماۋعا تيiس ەكەندىگى كورسەتىلگەن. سۋبتيتر پايدالانىلاتىن تەلەباعدارلامالار مەن فيلمدەردىڭ اۋدارماسى مەملەكەتتىك تىلدەگى تەلەباعدارلامالاردىڭ جالپى كولەمىنە كىرمەيتىندىگى دە تىلگە قاتىستى تالاپتاردى كۇشەيتە تۇسكەن.

ءوز باسىما زاڭ جوباسىنىڭ 24 بابىنداعى شەتەلدىك تەلە-, راديوارنانىڭ ماتەريالدارى قازاقستان رەسپۋبليكاسىنىڭ كونستيتۋتسيالىق قۇرىلىسىن كۇشتەپ وزگەرتۋدi, تۇتاستىعىن بۇزۋدى، مەملەكەت قاۋiپسiزدiگiنە نۇقسان كەلتiرۋدi, سوعىستى، ەكسترەميزمدi نەمەسە تەرروريزمدى، قاتىگەزدiك پەن زورلىق-زومبىلىقتى ناسيحاتتايتىن بولسا ونداي شەتەلدىك بۇقارالىق قۇرالدارىن ەسەپكە قويۋدان باس تارتىلاتىنى ۇنادى. ياعني سوعىستى ناسيحاتتايتىندار، Z بەلگىسىنە قۇمار تەلەارنالار قازاقستان اۋماعىندا تايراڭداي المايدى دەگەن ءسوز. سونداي-اق دىبىستىق سۇيەمەلدەۋدىڭ كوپ ارنالى بەرىلۋىن پايدالاناتىن تەلەارنالار نەگىزگى دىبىستىق سۇيەمەلدەۋدى مەملەكەتتىك تىلدە پايدالانۋعا ءتيىس ەكەندىگى دە مىندەتتەلگەن.

قوسىمشا ايتارىم، ۋاكىلەتتى ورگاننىڭ باقىلاۋ-قاداعالاۋ قىزمەتىن دەموكراتيالىق تالاپتار ەسكەرىلە وتىرىپ جاسالعانى دۇرىس پا دەيمىن. وسى تۇرعىدان العاندا بۇقارالىق اقپارات قۇرالدارى قىزمەتىنىڭ ماسەلەلەرى جونىندەگى رەسپۋبليكالىق جانە وڭىرلىك قوعامدىق-كاسىپتىك كەڭەستەر قۇرۋ (41 باپ) قاجەتى بار ما دەگەن وي كەلەدى. ارينە، جوبانىڭ ۇساق-تۇيەك كەمشىن تۇستارى بولۋى ىقتيمال. جالپى العاندا بۇل جوبا الداعى ۋاقىتتا ماسس-مەديا سالاسىنىڭ جەمىستى جۇمىس ىستەۋىنە ابدەن جاراپ تۇر. سوندىقتان قالامداس ارىپتەستەر، جوباعا قولداۋ كورسەتەيىك!

مارات ءبايدىلداۇلى،

جازۋشى-پۋبليتسيست

Abai.kz