يمانعالي تاسماعانبەتوۆ جاڭا جىلدان باستاپ ۇقشۇ-نىڭ باس حاتشىلىعىنا كىرىسكەلى بەرى ەلدى ەلەڭ ەتكىزەتىن ەكى كەزدەسۋ وتكىزدى. اقپاننىڭ 14-ىندە بەلارۋس باسشىسى لۋكاشەنكومەن كەزدەسسە، كۇنى كەشە رەسەيدىڭ قورعانىس ءمينيسترى شويگۋدىڭ قابىلداۋىندا بولدى.

بۇل كەزدەسۋلەر تەڭ دارەجەلى كەزدەسۋ دەگەننەن گورى ەسەپ بەرۋگە ۇقساپ كەتتى. شويگۋدەن ءپۋتيننىڭ مەن-مەندىگى انىق اڭعارىلدى. الدىندا باتكا دا: "رەسەي مەن ۋكراينا اراسىنداعى قاقتىعىستى وزىنە قاتىسى جوق دەپ ويلاپ، ءۇنسىز وتىرا بەرۋ دەگەن بولمايدى. بەلگىلى ءبىر پوزيتسيانى ۇستاناتىن ۋاقىت جەتتى", - دەپ ۇيىمنىڭ تىزگىنىن جاڭا ۇستاعان يمەكەڭە جول-جورىق بەرىپ، دىكەڭدەگەندەي بولعان. كەشەگى كەزدەسۋدە دە يمەكەڭ ورىس اسكەرىنىڭ باس قولباسشىسىنا ۇيىم جۇمىسىنان، باتكامەن كەزدەسۋىنەن ەسەپ بەردى.

"قىركۇيەك ايىندا ء"وزارا ءىس-قيمىل-2023", جەدەل ارەكەت ەتۋ ۇجىمدىق كۇشتەرىمەن وقۋ-جاتتىعۋى، "ىزدەۋ – 2023" جانە "ەشەلون – 2023" بارلاۋ كۇشتەرىمەن ماتەريالدىق-تەحنيكالىق قامتاماسىز ەتۋ بولىمشەلەرىمەن ارنايى وقۋ-جاتتىعۋ جوسپارلانعانىن، ۇجىمدىق كۇشتەردىڭ باسقارۋ جۇيەسىن، اتاپ ايتقاندا، بايلانىس سالاسىن جەتىلدىرۋ بويىنشا جۇمىستار جۇرگىزىلىپ جاتقانىن" باياندادى، تاسماعانبەتوۆ ۇقشۇ باس حاتشىسى سالاۋاتىمەن شويگۋگە..

ورىس اسكەرباسىنا دا كەرەگى وسى ەكەنى انىق. ءپۋتيننىڭ اتالمىش ارناۋلى وپەراتسياسىنا جىل تولدى. جەڭىستىڭ اۋىلى الىس ەكەنى ايداي انىق بولدى. باتكا باستاپ، شويگۋ قوستاپ، باس حاتشىمەن كەزدەسۋ ۇيىمداستىرۋداعى ماقساتتارى قاڭتار وقيعاسىندا قايتا جان كىرگەن اسكەري ۇيىمدى كوز-كوز ەتىپ باتىسقا ءدوڭ ايبات كورسەتۋ، بىزدە ءالى دە قاۋقار بار دەگەندى جەتكىزۋ عانا ەكەنى ءمالىم.

سونى ەسكەرسەك قازاقستاننىڭ ساناۋلى ۇلتجاندى قايراتكەرىنىڭ بىرەگەيى سانالاتىن تاسماعانبەتوۆتىڭ گەوساياسي جاعداي ۇشىققان، كۇللى باتىستىڭ دامىعان مەملەكەتتەرى ۋكرايناعا قولداۋ ءبىلدىرىپ، رەسەيدىڭ باسقىنشىلىعىن ايىپتاپ جاتقان ءولىارا كەزەڭدە، "ۆارشاۆا شارتى ۇيىمىن" ەسكە تۇسىرەتىن، رەسەي ىقپالىنداعى ۇيىمعا جەتەكشى بولۋى ەلگە دە، يمەكەڭنىڭ جەكە وزىنە دە ابىروي اپەرمەسى انىق. ەل تالقىسىنا تۇسكەن ەكى كەزدەسۋدەن سونى تۇيدىك.

ەڭبەك ءوتىلىن وقىتۋشىلىقتان باستاعان يمەكەڭنىڭ نازارباەۆقا جاعىپ، بيلىكتىڭ بيىك باسپالداعىنا كوتەرىلگەنى بەلگىلى. تۇڭعىش پرەزيدەنت ونى وتقا دا سالدى، جانبادى، سۋعا دا سالدى، باتپادى. كەرەك كەزىندە قورعانىس سالاسىن دا باسقاردى. قوعام ويانىپ، ساياسي تالاپ كۇشەيىپ، بيلىك ءترانزيتىن تالاپ ەتە باستاعاندا، ەلشى بولىپ كەتە باردى، ارتىنان ءبىر-اق كۇندە زەينەتكەر اتاندى.

يمەكەڭ نازارباەۆ بيلىگىنە ادال بولىپ كەلسە دە، حالىق ونى ءوزى اتقارعان لاۋازىمداردىڭ كولەمىنە سىيدىرمايدى، جوعارى باعالايدى، بيىك كورەدى. وتكەن قاراشادا وتكەن پرەزيدەنت سايلاۋىندا دا ونى پرەزيدەنتتىككە كانديدات رەتىندە كورگىسى كەلەتىندەردىڭ قاراسى مول بولدى. بىراق ول باسقا جولدى تاڭدادى. ەلدى توقاەۆتى قولداۋعا شاقىرىپ، ارتىنان قازاق ەلىندە جەك كورىنىشتى ۇيىمعا باس حاتشىلىققا سايلاندى. بۇل ول كىسىنىڭ جەكە تاڭداۋى ەمەس ەكەنى بەسەنەدەن بەلگىلى. كرەملدىڭ ۇلتجاندى تۇلعانى حالىققا سۇيكىمسىز ەتىپ كورسەتۋ، بەدەلدى تۇلعالاردىڭ حالىقپەن بىرىگىپ، ناعىز ۇلتتىق مەملەكەت قۇرۋ كۇرەسىنىڭ جولىن كەسۋ ارەكەتى بولۋى مۇمكىن.

ءپۋتيننىڭ ۋكرايناعا باسىپ كىرگەنىنە جىل تولعاندا، الەمدىك گەوساياسي جاعدايدىڭ بەتالىسى، كىمنىڭ جەڭىمپاز بولاتىنى ايقىن بىلىنە باستادى. كەشە بايدەن كەزىندە كەڭەس بيلىگى شىعىس ەۋروپا ەلدەرىن كۇشتەپ كىرگىزگەن "ۆارشاۆا شارتى" ۇيىمىنىڭ باس شتابى بولعان پولشا استاناسىندا پۋتينگە قارسى ءسوز سويلەدى. بۇل ارەكەتىنىڭ ساياسي، سيمۆولدىق استارى بار ەكەنى ايتپاسا دا تۇسىنىكتى. تاسماعانبەتوۆتىڭ ۇقشۇ-عا باس حاتشى بولۋى قازاقستان ءۇشىن دە، يمەكەڭنىڭ جەكە ءوز باسى ءۇشىن دە دۇرىس قادام بولماعانىنا كوز جەتكىزەتىن كەز الىس ەمەس دەگەن ءسوز.

ەسبول ۇسەنۇلى

Abai.kz