رەسەيدىڭ ۋكرايناعا باسقىنشىلىق سوعىسى باستالعالى اقش پرەزيدەنتى دجو بايدەن مەن ۋكراينا كوشباسشىسى ۆلاديمير زەلەنسكيدىڭ قارىم-قاتىناسى قالاي وزگەردى دەگەن سۇراققا New York Times باسىلىمى جاۋاپ بەرىپ، ماقالا جاريالاپتى.

سوعىسقا ءبىر جىل تولعاندا بايدەننىڭ زەلەنسكيگە دەگەن كوزقاراسى وزگەردى، ول 2022 جىلدىڭ اقپانىندا ۋكراينا پرەزيدەنتىنىڭ «رەسەي قىسىمىنا» توتەپ بەرە الاتىنىنا سەنبەگەن.

امەريكالىقتار زەلەنسكي قازا تابادى، نە قۋعىنعا ۇشىرايدى دەپ ويلاعان. سوندىقتان ولار زەلەنسكيگە كيەۆتەن كەتۋگە ۇسىنىس جاسايدى. ۋكراينا كوشباسشىسى بۇل ۇسىنىسقا كەرىسىنشە «اشۋلانادى». ال بايدەنگە ۋكراينا پرەزيدەنتىنىڭ بارعان سايىن كوپ قارۋ سۇراي باستاعانى ۇنامادى.

2022 جىلدىڭ جازىندا بايدەن زەلەنسكيگە قوڭىراۋ شالىپ، 1 ميلليارد دوللار بولىنەتىنىن حابارلادى.

«سوعىسقا ءبىر جىل تولعاندا امەريكا پرەزيدەنتى زەلەنسكي تۋرالى ويىنىڭ قاتە بولعانىنا قۋاندى جانە ونىڭ «جاي عانا كوميك» ەمەس ەكەنىنە سەندى»،-دەپ جازىپتى باسىلىم.

سوڭعى ايلاردا امەريكا-ۋكراينا قارىم-قاتىناسى نىعايا تۇسكەن. زەلەنسكي جاڭا جىلدا ۆاشينگتونعا ساپارلادى.

NYT حابارلاۋىنشا، 20 اقپاندا، رەسەيدىڭ ۋكرايناعا باسىپ كىرگەنىنە ءبىر جىل تولعاندا بايدەننىڭ كيەۆكە ساپارى امەريكا پرەزيدەنتى مەن ۋكراينا پرەزيدەنتىنىڭ ءتىپتى جاقىن دوستىعىن كورسەتتى.

اقش-تىڭ ۋكرايناداعى بۇرىنعى ەلشىسى دجون حەربست: «العاشىندا ەكى ەلدىڭ قارىم-قاتىناسى قيىن ەدى. قازىر دە قۇبىلمالىلىق بار، دەگەمەن جاقسى دەپ باعالاۋعا بولادى»،- دەپ پىكىر بىردىرگەن. ول سونداي-اق بايدەننىڭ اكىمشىلىگى ءالى دە «ۋكراينالىقتاردىڭ العىسىنا ريزا ەمەس» دەگەندى ايتقان.

باسىلىمنىڭ جازۋىنشا، بايدەن مەن زەلەنسكي ءبىر-بىرىنە تەڭ ەمەس ساياساتكەرلەر. ءبىرى – كەزىندە تەلەديداردا پرەزيدەنت ءرولىن ويناعان، بىراق ەشقاشان مەملەكەتتىك قىزمەتتە جۇمىس ىستەمەگەن 45 جاستاعى ساتيريك، ءبىرى – زەلەنسكي تۋعانشا بەس جىل بۇرىن سەناتتا انت بەرگەن 80 جاستاعى ساياساتكەر.

كەرىمسال جۇباتقانوۆ

Abai.kz