استانادا، ۇكىمەت ۇيىنە قاراي ون مىڭداعان سيىرلار ىعى-جىعى جايىلىپ كەلەدى. جولاي، تال-جاپىراقتارىن شايناپ، قاندارى قايناپ... تۇستەرى سۋىق، قۇيرىقتارىن ولاي دا، بىلاي دا، بۇلعاڭداتىپ، ءبارى جاپپاي موڭىرەگەندە، ءتىپتى، پاتەرلەردەگى تاراقاندار دا تىم-تىراقاي قاشتى.

ارالارىندا بۇزاۋلارى دا بار. ەڭ باسىندا كەلە جاتقان بۇقالاردىڭ مۇيىزدەرىنە: «بىزگە جايىلىم كەرەك!»، «ۇكىمەت، حالىقتىڭ جايىلىمىن قايتارىڭدار!»، «الپاۋىتتار جايىلىمدى ساتىپ الىپ، بوس جاتىر!»، «جەر بىزدىكى، ءسۇت سىزدىكى!»، «جوڭىشقا قىمبات!» – دەگەن پلاكاتتار، ۇراندار ءىلىنىپتى.

ماجىلىستە دەپۋتاتتار «قازاقستان جاستارىنىڭ شەكتەۋلى  جاسى جيىرما توعىز ەمەس، سەكسەن جاس بولسىن!» – دەگەن زاڭ جوباسىن تالقىلاپ جاتقان. ويتكەنى، ۇكىمەتتە دە، سەناتتا دا شال-شاۋقاندار، كەمپىر-سەمپىرلەر عوي.  دەپۋتاتتار دالاعا شىققاندا، سۇمدىق كورىنىسكە تاپ بولدى! سيىرلار شەرۋى!

ءبىر دەپۋتات: «نە دەگەن مالدار! سيىرلاردى سوتتاۋ كەرەك!» – دەپ ايقايلاعان ەدى، ارىق، جەلىنىندە جەلى دە جوق ءبىر سيىر ونى قۋالاي ءسۇزىپ، شالبارىن جىرتا تىستەپ، شايناپ جەپ قويدى. ماسقارا!

دەپۋتات ترۋسيشەڭ قاشتى! موينىندا گالستۋگ! سيىر بىتكەن استانانىڭ «ءبىز راحات ءومىر سۇرەمىز!»، «بار جاقسىلىق اۋىلعا!» –دەگەن بيلبوردتارىن ءسۇزىپ قۇلاتىپ، ايالداما ورىندىقتارىن ءمۇجىپ جەپ قويدى.

ءبىر كەلىنشەكتىڭ كويلەگىن شايناپ، جىرتىپ تاستادى. ول بايعۇس دۇكەنگە جالاڭاش كىرىپ كەتىپ، قورىققانىنان ءبىر ەركەكتى قۇشاقتاي الىپ ەدى، اناۋ ونى باسقا بولمەگە كوتەرىپ الا جونەلدى...

ءبىر كەزدە، وي، اللا، ساربازدار، پوليتسەيلەر شەرۋگە شىققان سيىرلاردىڭ الدىنا تۇرا قالىپ، قارۋلاردان وق بوراتتى. بۇقالاردىڭ ءتورت اياعى اسپاننان كەلىپ، سەسپەي قاتتى. سوندا دا، سيىرلار بۇقا «كۇيەۋلەرىنىڭ» ولىمىنە ازالى موڭىرەپ، پوليتسەيلەردى ءسۇزىپ جاتتى. «بىزگە جايىلىم بەرىڭدەر!» – دەپ مۇڭايا موڭىرەستى. ءبىر كىشكەنتاي بۇزاۋ كوشەدەن تايراڭداپ وتە بەرگەن، تىعىلىپ تۇرعان سارباز سنايپەرمەن اتىپ قۇلاتتى. سيىر بايعۇس ءولىپ جاتقان بۇزاۋىن جالادى. كوزىنەن جاس پارلاپ، جەلىنىنەن ءسۇت اقتى... قىسقاسى، جايىلىم، دەموكراتيا سۇراعان سيىرلار كۇشپەن جانشىلىپ، ءبىرازى ەتكە ءوتىپ كەتتى. كەيبىرىن دەپۋتتاتار سويىپ الدى، قۋىرداق جەپ، تويىپ الدى. مىڭداعان سيىر تۇرمەگە قامالدى. سيىرلاردى دا سوتتايىن دەپ جاتىر...

مۇحتار شەرىم

Abai.kz